ក្រុមវេជ្ជបណ្ឌិតចិនដែលព្យាបាលជំងឺជយលាភីពានរង្វាន់ណូបែល លោក លីវ ស៊ាវប៉ូ នោះ បានព្រមានទៅក្រុមវេជ្ជបណ្ឌិតអាមេរិក និងអាល្លឺម៉ង់ថា លោក លីវ មានជំងឺធ្ងន់ធ្ងរ មិនអាចធ្វើដំណើរទៅព្យាបាលនៅខាងក្រៅបានទេ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP បានចុះផ្សាយបែបនេះ ដោយបានដកស្រង់សម្ដីរបស់ក្រុមគ្រូពេទ្យចិន ដែលបានរៀបរាប់នៅក្នុងសេចក្ដីប្រកាសព័ត៌មានមួយ កាលពីថ្ងៃម្សិលមិញនេះ។
ក្រុមវេជ្ជបណ្ឌិតបរទេស បានធ្វើដំណើរទៅសួរសុខទុក្ខលោក លីវ នៅឯមន្ទីរពេទ្យ នៅទីក្រុងហ្ស៊ិនយ៉ាង ស្ថិតនៅភាគឦសានប្រទេសចិន បន្ទាប់ពីមានសម្ពាធពីអន្តរជាតិទៅលើប្រទេសចិន ឲ្យនាំយករូបលោកទៅព្យាបាលនៅឯបរទេស ឬក៏អនុញ្ញាតឲ្យគាត់ជ្រើសរើសយកការព្យាបាលដោយខ្លួនឯង។ លោក លីវ គឺជាអ្នកគាំទ្រលទ្ធិប្រជាធិបតេយ្យដ៏ឈានមុខនៅក្នុងប្រទេសចិន។
ក្រុងប៉េកាំង បានរងការរិះគន់ពីសំណាក់ក្រុមសិទ្ធិមនុស្ស ជុំវិញការប្រព្រឹត្តទៅលើសកម្មជនរូបនេះ និងការពន្យារពេលរហូតទាល់តែលោកធ្លាក់ខ្លួនមានជំងឺធ្ងន់ធ្ងរ ទើបដោះលែងរូបលោកពីពន្ធនាគារ កាលពីជាងមួយខែមុន។
ប៉ុន្តែ មន្ទីរពេទ្យនោះ ប្រាប់ថា ក្រុមអ្នកជំនាញយល់ឃើញស្របគ្នាថា លោក លីវ ទទួលបានការព្យាបាលពីក្រុមវេជ្ជបណ្ឌិតល្បីៗហើយ។
មន្ទីរពេទ្យទី១នៃសាកលវិទ្យាល័យវេជ្ជសាស្ត្រចិន បាននិយាយថា លោក លីវ អាយុ ៦១ឆ្នាំ ត្រូវបានវេជ្ជបណ្ឌិតអាមេរិក លោក ចូសេប ហ័រមេន និងវេជ្ជបណ្ឌិតអាល្លឺម៉ង់ លោក ម៉ាកូស ប៊ូល័រ ចូលទៅសួរសុខទុក្ខ។
វេបសាយមន្ទីរពេទ្យនោះ បានរៀបរាប់ថា វេជ្ជបណ្ឌិតទាំងពីរនេះ បានរកឃើញថា លោក លីវ មានសម្ពាធឈាមខុសប្រក្រតី និងស្ថិតក្នុងស្ថានភាពធ្ងន់ធ្ងរ៕
