តំណាងរាស្ត្រមួយរូបនិងជាកូនប្រុសលោក ហ៊ុន សែន ស្នើឲ្យសភាតាមដានពីប្រសិទ្ធភាពនៃការអនុវត្តច្បាប់ស្តីពីគណបក្សនយោបាយ ដែលឳពុករបស់ខ្លួនស្នើធ្វើវិសោធនកម្មជាលើកទី២ ខណៈលោក សម រង្ស៊ី បន្តរិះគន់ការអនុម័តច្បាប់នេះថាជា «សភាទីងមោង»។
នៅថ្ងៃទី១០ខែកក្កដានេះ តំណាងរាស្ត្ររបស់គណបក្សប្រជាជនកម្ពុជាចំនួន៦៦រូបដែលបានចូលប្រជុំសភាពេញអង្គ បានអនុម័តយល់ព្រមលើសេចក្តីស្នើច្បាប់ស្តីពីគណបក្សនយោបាយ ដែលលោក ហ៊ុន សែន ស្នើធ្វើវិសោធនកម្មជាលើកទី២ ។
ក្នុងកិច្ចប្រជុំដែលគ្មានតំណាងរាស្ត្របក្សប្រឆាំងចូលរួមនោះ តំណាងរាស្ត្របក្សកាន់អំណាចបានឡើងការពារច្បាប់នេះតែរៀងៗខ្លួនដោយថា ច្បាប់នេះបានជួយជំរុញយន្តការប្រជាធិបតេយ្យសេរីពហុបក្សនៅកម្ពុជា។
លោក ហ៊ុន ម៉ានី លើកឡើងថា សេចក្តីស្នើច្បាប់ ជាលើកទី២នេះ លោកថាបានបង្ហាញពីការរីកចម្រើននៃការពង្រឹងប្រជាធិបតេយ្យ សេរីពហុបក្ស ដូចដែលមានក្នុងរដ្ឋធម្មនុញ្ញ ពិសេសលោកថា ច្បាប់នេះក៏បានជួយតម្រង់ទិសអ្នកនយោបាយខ្មែរ ឲ្យប្រកួតប្រជែងគ្នាដោយគិតពីផលប្រយោជន៍ជាតិ ការពារសន្តិភាពផងដែរ ។
លោកថា៖ «ផ្អែកទៅលើមូលដ្ឋាននេះ បើសិនជាមានការធ្វើខុសទៅលើអ្វីដែលមានចែងនៅក្នុងច្បាប់ហើយ គឺខ្ញុំស្នើឲ្យមានការអនុវត្តច្បាប់ ទៅតាមអ្វីដែលមានចែងនៅក្នុងច្បាប់នេះ ដែលមានជាធរមាន ដើម្បីការពារសុខសន្តិភាព ការពារជាតិស្ថេរភាព ការពារផលប្រយោជន៍ជាតិ ដើម្បីផ្តោតអារម្មណ៍ ផ្អែកទៅលើមូលដ្ឋានស្ថេរភាពនិងសុខសន្តិភាព»។
តំណាងរាស្ត្របក្សកាន់មួយរូបទៀត គឺលោក ម៉ុម ជឹមហ៊ុយ បានថ្លែងដែរថា សេចក្តីស្នើច្បាប់នេះជំរុញឲ្យអ្នកនយោបាយខ្មែរដើរលើគន្លងប្រជាធិបតេយ្យ និងថ្លៃងការពារដូចអ្វីដែលលោក ហ៊ុន សែន លើកឡើងដែរថា សង្គ្រាមនៅកម្ពុជាអាចផ្ទុះឡើងបាន បើទោះបីភាគីម្ខាងទៀតគ្មានអាវុធក៏ដោយ។
លោកបន្តថា៖ «ពីព្រោះបើមិនមានការកំណត់នេះទេ ការតស៊ូបែបនយោបាយនឹងធ្វើឲ្យប៉ះពាល់ដល់លទ្ធិប្រជាធិបតេយ្យ ពីព្រោះសង្គ្រាម វាមិនមែនកើតចេញដោយសារមានអាវុធមានអីទេ ជាទស្សនៈរបស់ខ្ញុំ ជាទស្សនៈ របស់អង្គការសហប្រជាជាតិ ជាទស្សនៈរបស់យូនីស្កូដែលជាអង្គការឯកទេស របស់អង្គការសហប្រជាជាតិ គេនិយាយថាសង្គ្រាមវាចេញពីក្បាលរបស់មនុស្ស ចិត្តគំនិតរបស់មនុស្សវាចេញពីហ្នឹង»។
ក្រោយតំណាងរាស្ត្រឡើងការពារចប់ អនុប្រធានទី២នៃរដ្ឋសភាកូតាមកពីបក្សកាន់អំណាចលោក ងួន ញិល ស្នើឲ្យរដ្ឋសភាអនុម័ត ដោយថាច្បាប់នេះ ប្រកាសជាការប្រញាប់។
មន្ត្រីផ្នែកអង្កេតនៅអង្គការខុមហ្វ្រែល ដែលជាអង្គការមួយឃ្លាំមើលដំណើរការសភា លោក កង សាវាង្ស លើកឡើងថា ច្បាប់នេះ ហាក់មិនបានបើកទូលាយឲ្យគ្រប់ភាគីពាក់ព័ន្ធ បានចូលរួមផ្តល់យោបល់ តាមបែបប្រជាធិបតេយ្យទេ។ លោកថា ខុមហ្វែ្រលកំពុងតាមដានករណីនេះ។
លោកថា៖ «យើងមើលឲ្យមែនទែនទៅការធ្វើច្បាប់នេះ វាមិនមែនសំដៅទៅលើប្រយោជន៍រួម ឬក៏ប្រយោជន៍ទូទៅទេ គឺការប្រើប្រាស់ច្បាប់មួយសម្រាប់តែបុគ្គលម្នាក់។ អញ្ចឹងយើងមើលឃើញថាការធ្វើច្បាប់នេះ ហាក់អត់ទាន់បានគិតអំពីគេហៅថាគោលការណ៍នៃលទ្ធិប្រជាធិបតេយ្យឬមួយជាគោលការណ៍រួមនៅឡើយទេ ហើយសម្រាប់យើងៗហាក់មិនមានការគាំទ្រច្បាប់សម្រាប់បុគ្គលឬក៏ជាបែបហ្នឹងទេណាស់ យើងអត់មានការគាំទ្រទេ។ ប៉ុន្តែយើងនឹងជជែកផ្លូវច្បាប់បន្ថែមទៀតថាតើ វាបង្ហាញពីរបៀបម៉េច វាខុសត្រង់ចំនុចណាខ្លះ។ នេះគ្រាន់តែជាការវាយតម្លៃបឋមរបស់ខ្ញុំទេបាទ»។
ទោះជាយ៉ាងណា អតីតមេដឹកនាំបក្សប្រឆាំងដែលកំពុងនីរទេសខ្លួន លោក សម រង្ស៊ី បានរិះគន់ធ្ងន់ថា ការស្នើឲ្យកែច្បាប់ជាលើកទី២ដដែលៗនេះ លោកថាជា «សភាទីងមោង»។
ចំណែកគណបក្សសង្រ្គោះជាតិបានចេញសេចក្តីថ្លែងការណ៍មួយនៅថ្ងៃនេះ ដោយហៅច្បាប់នោះថា មានចរិកនយោបាយ គាបសង្កត់សិទ្ធិបុគ្គល និងគណបក្សនយោបាយធ្វើឲ្យខ្មែរបែកបាក់គ្នា ហើយថាច្បាប់នេះ ផ្ទុយនឹងគោលការណ៍ប្រជាធិបតេយ្យ សេរីពហុបក្សដែលធានាដោយរដ្ឋធម្មនុញ្ញ៕
សេចក្តីកែតម្រូវ៖ នៅថ្ងៃទី១២ខែកក្កដាឆ្នាំ២០១៧នេះ វីអូឌី សុំធ្វើការកែតម្រូវព័ត៌មាន ដែលបានផ្សាយពីថ្ងៃ១០ខែកក្កដាឆ្នាំ២០១៧ ដែលមានចំណងជើងថា «កូនប្រុសលោក ហ៊ុន សែន ស្នើឲ្យអនុវត្តច្បាប់ប្រឆាំង លោក សម រង្ស៊ី ឲ្យមានប្រសិទ្ធភាព» ដោយកែទៅជា «កូនប្រុសលោក ហ៊ុន សែន ស្នើឲ្យអនុវត្តច្បាប់ស្តីពីគណបក្សនយោបាយ ឲ្យមានប្រសិទ្ធភាព» វិញ។
