ក្រសួងការងារកម្ពុជា ណែនាំឲ្យពលករខ្មែរដែលកំពុងធ្វើការងារនៅក្នុងប្រទេសថៃដែលផ្លាស់ប្តូរថៅកែ និង ពលករដែលមិនមានឯកសារផ្លូវច្បាប់ ឲ្យសហការជាមួយថៅកែ ទៅបង្ហាញខ្លួននៅមុខមន្ត្រីក្រសួងការងារថៃ ដើម្បីទទួលបានភាពស្របច្បាប់ក្នុងការបំពេញការងារ។
អ្នកនាំពាក្យក្រសួងការងារកម្ពុជាលោក ហេង សួគ៌ បានធ្វើសេចក្តីប្រកាសតាមហ្វេសប៊ុករបស់លោកកាលពីម្សិលមិញថា ថៃចាប់ផ្តើមស្រង់ទិន្នន័យពលករបរទេស នៅទូទាំងប្រទេសដែលមានការិយាល័យចំនួន៩៧។
បើតាមលោក ហេង សួគ៌ ដើម្បីពលករទទួលបានភាពស្របច្បាប់នៅថៃគឺមាន៣ណាក់កាលគឺ១ ចាប់ពីថ្ងៃទី២៤ខែកក្កដា ដល់ថ្ងៃទី៧ខែសីហា ថៅកែថៃយកឈ្មោះពលករទៅបង្ហាញនៅក្រសួង ទី២គឺពលករទៅបង្ហាញខ្លួននៅមុខអាជ្ញាធរថៃពីថ្ងៃទី៨ខែសីហាដល់ថ្ងៃទី៩ខែកញ្ញា និងទី៣ ចាប់ពីថ្ងៃទី៩ខែកញ្ញា ដល់ថ្ងៃទី៣១ខែធ្នូឆ្នាំ២០១៧ ជាពេលដែលពលករស្នាក់នៅ និង រងចាំធ្វើការបញ្ជាក់អត្តសញ្ញាណពីគណៈកម្មាធិការផ្តល់ភាពស្របច្បាប់ សម្រាប់ការងារស្នាក់នៅនិងធ្វើការងារនៅក្នុងប្រទេសថៃ៕
