គ្រាប់កាំភ្លើងប្រភេទ AK47 ចំនួន១កេះជិត១០០០គ្រាប់និងសំភារៈមួយចំនួនទៀតត្រូវអ្នកភូមិប្រទះឃើញ ខណៈពួកគេចុះរកត្រីក្នុងអូរមួយនៅភូមិតាគង់ ឃុំពាមឯក ស្រុកឯកភ្នំ ខេត្តបាត់ដំបង។
ស្នងការរងនគរបាលខេត្តបាត់ដំបងលោក ជេត វន្នី ឲ្យដឹងថា គ្រាប់កាំភ្លើងប្រភេទ AK47 ចំនួន១កេសដែក និង គ្រាប់នៅរាយខាងក្រៅកេសសរុបចំនួន៩៥០គ្រាប់ បង់៩និងទូសៀ ត្រូវបានអ្នកភូមិប្រទះឃើញក្នុងអូរមួយកាល ពីថ្ងៃទី២៧ ខែកក្តដា ឆ្នាំ២០១៧។ លោកបន្តថា បន្ទាប់ពីប្រជាពលរដ្ឋ រាយការណ៍ព័ត៌មាននេះ សមត្ថកិច្ចបានយកគ្រាប់ទាំងនោះមករក្សាទុកដើម្បីធ្វើការស៊ើបអង្កេតតាមនីតិវិធីបន្ត។
កាលពីខែមិថុនា ឆ្នាំ២០១៧ កន្លងទៅកសិករដាំម្រេចនៅស្រុកសំឡូត ខេត្តបាត់ដំបង បានប្រទះឃើញគ្រាប់ មិនទាន់ផ្ទុះជិត៣០០គ្រាប់ដែរ តែមានសភាពចាស់ច្រេះស៊ី។
គ្រាប់មិនទាន់ផ្ទុះបន្សល់ពីសង្រ្គាមត្រូវបាន អ្នកភូមិនៅតាមខេត្តនានាប្រទះឃើញជាបន្តបន្ទាប់ ហើយថ្មីៗនេះនៅខេត្តឧត្តរមានជ័យមានការការផ្ទុះស្លាប់កសិករម្នាក់ផងដែរ។ ដោយឡែកគ្រាប់កាំភ្លើងជិត១០០០គ្រាប់ ដែលអ្នកភូមិប្រទះឃើញនេះ គេហទំព័រអគ្គស្នងការដ្ឋាននគរបាលជាតិចុះផ្សាយថា ជាគ្រាប់ថ្មីៗមិនមែនបន្សល់ពីសម័យសង្គ្រាមនោះទេ៕
ហូរ តុងហាន់
