អតីតមេបក្សប្រឆាំង បានបង្ហោះសារបែបចំអកថា នរណាបង្ហោះរូបលោកជាមួយលោក កឹម សុខា នឹងមានទោស នៅក្រោមច្បាប់ថ្មី តែបើបង្ហាញរូបលោកជាមួយលោកនាយករដ្ឋមន្ត្រី ហ៊ុន សែន លោក ស ខេង និងលោក សាយ ឈុំ តើមានទោសដែរឬទេ?
លោក សម រង្ស៊ី ដែលកំពុងរស់នៅនិរទេសខ្លួនឯងនៅឯក្រៅប្រទេសនោះ បានបង្ហោះសារបែបចំអកបែបនេះ នៅលើទំព័រហ្វេសប៊ុករបស់លោក នៅព្រឹកថ្ងៃនេះ។
នៅលើទំព័រហ្វេសប៊ុកនោះ លោករៀបរាប់ថា ចាប់ពីសប្ដាហ៍ក្រោយទៅ ដោយសារតែច្បាប់ចេញថ្មី នរណាហ៊ានបង្ហាញរូបខ្ញុំជាមួយលោក កឹម សុខា នឹងមានទោស។ ប៉ុន្តែ លោកចោទសួរវិញថា តែបើបង្ហាញរូបលោកជាមួយមនុស្ស ៣នាក់ មានលោក ហ៊ុន សែន លោក ស ខេង និងលោក សាយ ឈុំ តើនឹងមានទោសដែរឬទេ?
សំណើវិសោធនកម្មច្បាប់ស្ដីពីគណបក្សនយោបាយ នឹងចូលជាធរមាននៅសប្ដាហ៍ក្រោយនេះ ក្រោយប្រមុខរដ្ឋ ឬប្រមុខរដ្ឋស្តីទីចុះហត្ថលេខារួច។ សំណើវិសោធនកម្មច្បាប់ជាលើកទីពីរនេះ ត្រូវបានគេមើលឃើញថា ជាការប៉ុនប៉ងពីសំណាក់បក្សកាន់អំណាច ដើម្បីបិទផ្លូវនយោបាយលោក សម រង្ស៊ី៕
