ក្រសួងយុត្តិធម៌ ជំរុញឲ្យមន្ត្រីតុលាការ សហការគ្នាធ្វើការប្រកបដោយឯករាជភាព ដោយថាដើម្បីពង្រឹងប្រព័ន្ធយុត្តិធម៌នៅកម្ពុជា។
ក្រោយពីសិក្ខាសាលាស្តីពី «ការគ្រប់គ្រង និងការដឹកនាំសាលាដំបូង និងអយ្យការអមសាលាដំបូង» អ្នកនាំពាក្យក្រសួងយុត្តិធម៌ លោក ជិន ម៉ាលីន បានថ្លែងប្រាប់អ្នកសារព័ត៌មាននៅថ្ងៃទី៣១កក្កដានេះថា កាលពីកន្លងទៅ ប្រធានសាលាដំបូងរាជធានីភ្នំពេញទូទំាងរាជធានី-ខេត្ត មានតួនាទីដឹកនាំតុលាការនិងចាត់ចែងការងាររដ្ឋបាលផងដែរ ដោយថាកិច្ចការទំាងនោះធ្វើឲ្យមានភាពស្មុគស្មាញ យឺតយ៉ាវ និងអាចមានភាពមិនប្រក្រតី នៅក្នុងដំណើរការរឿងក្តីជាដើម។
ករណីនេះ លោក ម៉ាលីន បានបញ្ជាក់ថា ក្រសួងយុត្តិធម៌បានសហការជាមួយឧត្តមក្រុមប្រឹក្សានៃអង្គចៅក្រម ឧត្តមស្នងការអង្គការសហប្រជាជាតិទទួលសិទ្ធិមនុស្សប្រចំានៅកម្ពុជា រួមជាមួយប្រធានសាលាដំបូង ព្រះរាជអាជ្ញានៃអយ្យការអមសាលាដំបូង ប្រធានលេខាធិការដ្ឋានរដ្ឋបាលសាលាដំបូងរាជធានី-ខេត្តទូទំាងប្រទេស ដើម្បីជជែកគ្នាធ្វើកំណែទម្រង់ប្រព័ន្ធយុត្តិធម៌នៅកម្ពុជា ក្នុងការផ្តល់សេវាជូនប្រជាពលរដ្ឋប្រកបដោយឯករាជភាព ។
លោកនិយាយថា «ការកែទម្រង់របស់យើង គឺឲ្យប្រធានតុលាការ ព្រះរាជអាជ្ញាផ្តោតយកចិត្តទុកដាក់តែ ការងារសំខាន់ គឺការងារសម្រេចសេចក្តី និងដំណើរការនីតិវិធីធ្វើម៉េចឲ្យវាត្រឹមត្រូវតាមច្បាប់ ប្រកបដោយសុចរិតភាព សច្ចភាព និងយុត្តិធម៌ ដើម្បីបំរើប្រយោជន៍ដល់ប្រជាពលរដ្ឋ។ ចំណែកការងាររដ្ឋបាល ការងារទំនាក់ទំនងសាធារណៈ ការងារហិរញ្ញវត្ថុ ការងារបុគ្គលិក ការងារចង្ក្រាន ជើងឆ្នាំងរបស់តុលាការគឺជាបន្ទុករបស់អង្គភាពថ្មីមួយទៀត គឺយើងហៅថា អង្គភាពរដ្ឋបាលតុលាការ គឺអង្គភាពនេះនៅក្នុងទីតំាងរបស់តុលាការតែម្តង»។
តំណាងការិយាល័យឧត្តមស្នងការ អង្គការសហប្រជាជាតិទទួលបន្ទុកសិទ្ធិមនុស្សប្រចំានៅកម្ពុជាលោក ស្រី ស៊ីប៊ែល អូផែរ បានថ្លែងក្នុងសិក្ខាសាលាថា ការបង្កើតឲ្យមានលេខាធិការដ្ឋានរដ្ឋបាលនៅតាមសាលាដំបូងរាជធានី-ខេត្តទូទំាងប្រទេស គឺជាជំហានវិជ្ជមានមួយដែលគួរឈានទៅរកប្រព័ន្ធយុត្តិធម៌មួយដែលកាន់តែមាន ប្រសិទ្ធភាព ធានាការពារសិទ្ធិទទួលបានយុត្តិធម៌ទំាងអស់គ្នា។
អ្នកនាំពាក្យសមាគមអាដហុក លោក សំ ចាន់គា យល់ថា កំណែទម្រង់ប្រព័ន្ធយុត្តិធម៌នៅកម្ពុជា មិនមានឯករាជភាពនោះទេ ដោយលោកថា មន្ត្រីទំាងនោះភាគច្រើន សុទ្ធតែសកម្មជនបក្សកាន់អំណាច។ លោកយល់ថា «ប្រព័ន្ធរដ្ឋបាលនៅប្រទេសកម្ពុជាឡើង ហើយចុះ ចាត់ចែកស្អីគឺដោយបក្ស[គណបក្សប្រជាជនកម្ពុជា] បើដោយបក្សអ្នកណាដែលកាន់ការងារបក្ស អ្នកនោះនៅតែមានឥទ្ធិពលដដែល ទៅលើមន្ត្រីចៅក្រម ឬព្រះរាជអាជ្ញា បើចង់កែទម្រង់លុះត្រាតែលែងឲ្យមន្ត្រីតុលាការទំាងអស់ គាត់លាលែងចេញពីសកម្មជន របស់គណបក្ស បានក្រុមពួកគាត់ ចាប់ផ្តើមពង្រឹងភាពឯករាជ្យមុខវិជ្ជាជីវៈរបស់គាត់បាន»។
យោងតាមការស្ទង់មតិមួយដែលត្រូវបានផ្សាយនៅលើទំព័រហ្វេសប៊ុកផ្លូវការ របស់លោក សម រង្ស៊ី កាលពីថ្ងៃទី១៩ខែមិថុនា បានបង្ហាញថា ចំពោះ យុត្តិធម៌ក្នុងករណីឃាតកម្មលោកកែម ឡី គឺតែមាន១៨ភាគរយប៉ុណ្ណោះឆ្លើយថា ពួកគេមានជំនឿខ្លាំងថាកម្ពុជាមានយុត្តិធម៌។ ប៉ុន្តែ៦៦ ភាគរយទៀតឆ្លើយថា ពួកគេគ្មានជំនឿទៅលើយុត្តិធម៌នៅកម្ពុជាទេ៕
