នាយករដ្ឋមន្ត្រីកម្ពុជា លោក ហ៊ុន សែន បញ្ជាឲ្យបិទអង្គការមួយរបស់អាមេរិកនៅកម្ពុជា ដោយថាអង្គការនោះបាននិយាយបង្ខូចឈ្មោះកម្ពុជា នៅលើឆាកអន្តរជាតិ ទាក់ទិននឹងការជួញដូរមនុស្ស។
កាសែត ខេមបូឌា ដេលី ចុះផ្សាយកាលពីថ្ងៃម្សិលមិញថា កាលពីថ្ងៃសុក្រ ក្រសួងមហាផ្ទៃថានឹងស៊ើបអង្កេតលើ ព័ត៌មាន ដែលចុះផ្សាយមួយ ស្តីពីពេស្យាចារ្យកុមារនៅក្នុងរាជធានីភ្នំពេញ ដែលលេចឡើង ជាថ្មីទៀតនៅលើបណ្តាញសារព័ត៌មាន CNN។
ការសែតបានចុះផ្សាយទៀតថា អង្គការមេត្រីអន្តរជាតិ (Agape International Missions) ដែលធ្វើការផ្តោតលើការជួញដូរមនុស្ស បាននិយាយប្រាប់ CNN ថា «ពេលពួកគេចុះជួបស្ត្រីមួយចំនួនរកស៊ីផ្លូវភេទនៅតំបន់ស្វាយប៉ាកកន្លងទៅ ដើម្បីជួបជាមួយក្មេងស្រីៗ ដែលត្រូវបានលក់ឲ្យបម្រើផ្លូវភេទ ជួនកាលត្រូវបានលក់ដោយឪពុកម្តាយរបស់ពួកគេតែម្តង»។
ក្នុងពិធីចែកសញ្ញាបត្រដល់និស្សិត ក្នុងរាជធានីភ្នំពេញ នាថ្ងៃទី១ខែសីហានេះ នាយករដ្ឋម្ត្រីកម្ពុជា លោក ហ៊ុន សែន ថ្លែងថា ការនិយាយបែបនេះ លោកថាជាការប្រមាថដល់ស្ត្រីនៅកម្ពុជា និងថាលោកបានបញ្ជារួចហើយ ឲ្យក្រសួងពាក់ព័ន្ធបិទអង្គការនេះ។
លោកថា៖ «ខ្ញុំដាក់បញ្ជាឲ្យរដ្ឋមន្ត្រីក្រសួងមហាផ្ទៃនិងក្រសួងការបរទេស ពិនិត្យមើលហើយបិទចោលភ្លាមៗ នូវទង្វើបែបនេះ គឺមិនអាចទទួលយកកើតទេ»។
លោក ហ៊ុន សែន ក៏បានថ្លែងការពារដែរថា ការបញ្ជាបែបនេះ ដើម្បីបញ្ជៀសបាតុកម្មនៅមុខស្ថានទូតអាមេរិក។
លោកថា៖ «ព្រោះយើងមិនចង់ឲ្យមានបាតុកម្ម ដើម្បីទៅប្រឆាំងដល់ស្ថានទូតអាមេរិកនិងអង្គការក្រៅរដ្ឋាភិបាលទេ។កុំភ្លេចនៅប្រទេសច្រើនណាស់ ជួនកាលគ្រាន់តែគូររូបថ្លុក មហាម៉ាត់គឺទស្សនាវដ្ដីនោះត្រូវបានគេវាយប្រហារ ឬត្រូវបានគេធ្វើរឿងនេះឬធ្វើរឿងនោះ។ ប៉ុន្តែសម្រាប់ប្រទេសរបស់យើងត្រូវបានគេប្រមាថថា ម្តាយយកកូនទៅលក់តើវាសមហេតុសមផលទេ»។
អ្នកនាំពាក្យស្ថានទូតសហរដ្ឋអាមេរិក លោក Arend Zwartjes ប្រាប់វីអូឌីតាមរយៈអ៊ីម៉ែលនៅល្ងាចថ្ងៃទី១មិថុនានេះថា លោកសុំមិនឆ្លើយសំនួរពាក់ព័ន្ធនឹងសកម្មភាពការងាររបស់អង្គការមេត្រីអន្តរជាតិ (AIM) ដោយបង្វែរសំនួរ ទៅសួរអង្គការនេះវិញ។ ទោះជាយ៉ាងណា លោកថា ប្រទេសកម្ពុជា បានបោះជំហានយ៉ាងរហ័ស ចំពោះការប្រយុទ្ធប្រឆាំងការជួញដូរផ្លូវភេទកុមារ ដូចក្នុងរបាយការណ៍ចេញផ្សាយដោយក្រសួងការបរទេសអាមេរិក។
លោកបន្តថា សហរដ្ឋអាមេរិក ជឿថា ការប្តេជ្ញារបស់ក្រុមអង្គការក្រៅរដ្ឋាភិបាល ដែលធ្វើការយ៉ាងជិតស្និទ្នជាមួយរដ្ឋាភិបាលកម្ពុជា និងសហគមន៍អន្តរជាតិ គឺជាផ្នែកសំខាន់បំផុតនៃដំណោះស្រាយ។
វីអូឌី នៅមិនទាន់បានទាក់ទងនាយកប្រតិបត្តិអង្គការមេត្រីអន្តរជាតិនេះ ដើម្បីសុំការអត្ថាធិប្បាយបន្ថែមបាននៅឡើយ។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត លើកឡើងថា វិធានការច្បាប់ជារឿងមួយ ប៉ុន្តែលោកថាបើរដ្ឋាភិបាលមិនបានស៊ើបអង្កេតដោយឯករាជ្យស្វែងរកការពិត លោកថា រដ្ឋាភិបាលនឹងនៅតែរងការចោទថា វិធានការនេះ ហាក់បង្កប់នូវរូបភាពគំរាមកំហែងដល់អង្គការសង្គមស៊ីវិល។
លោកថា៖ «វាត្រូវតែមានការស៊ើបអង្កេត ហើយត្រូវបង្ហាញភស្តុតាងច្បាស់លាស់ណាមួយជាមុនទៀតណាស់។ហើយបើសិនជាការបិទហ្នឹងយើងមិនទាន់បានធ្វើការស៊ើបអង្កេតឲ្យមានភស្តុតាងគ្រប់គ្រាន់ទេអាហ្នឹងនាំឲ្យមានការយល់ច្រឡំ ពីមតិសាធារណមតិជាតិនិងអន្តរជាតិ គេអាចយល់ច្រឡំទៅរឿងផ្សេង ថាការបិទហ្នឹងទៅនឹងការគំរាមកំហែង ជាការបំភិតបំភ័យទៅលើអង្គការសង្គមស៊ីវិលផ្សេងទៀត»។
កន្លងទៅមន្ត្រីជាន់ខ្ពស់មួយរូប របស់គណបក្សប្រជាជនកម្ពុជា លោក ឈាង វុន ធ្លាប់ធ្វើសន្និសីទសារព័ត៌មាននៅមន្ទីររដ្ឋសភា ដោយចោទប្រកាន់ចំៗថា សហរដ្ឋមេរិក បានផ្តល់ជំនួយ ឲ្យអង្គការសង្គមស៊ីវិលទាំងជាតិនិងអន្តរជាតិ នៅកម្ពុជា ដោយថាដើម្បីឲ្យធ្វើសកម្មភាព ផ្តួលរំលំរដ្ឋាភិបាលកម្ពុជា។ ប៉ុន្តែការចោទប្រកាន់នេះត្រូវបានមន្ត្រីស្ថានទូតអាមេរិកច្រានចោល៕
