អតីតមេដឹកនាំបក្សប្រឆាំង លោក សម រង្ស៊ី បានបង្ហោះឯកសារមួយចំនួន ដោយថា តុលាការអាមេរិកបានបង្គាប់បញ្ជាទៅក្រុមហ៊ុន Chevron ដែលជាក្រុមហ៊ុនមេនៃក្រុមហ៊ុន Caltex នៅកម្ពុជា ឲ្យផ្ដល់ភស្តុតាង និងឯកសារទាំងអស់ ទាក់ទងនឹងឃាតកម្មលើអ្នកវិភាគនយោបាយល្បីឈ្មោះ លោកបណ្ឌិត កែម ឡី។
នៅលើទំព័រហ្វេសប៊ុកផ្លូវការរបស់លោកនៅថ្ងៃនេះ លោក សម រង្ស៊ី បានរៀបរាប់ថា តុលាការរដ្ឋកាលីហ្វរនីញ៉ា តម្រូវឲ្យក្រុមហ៊ុនអាមេរិក Chevron ផ្ដល់ភស្តុតាង និងឯកសារទាំងអស់ដែលខ្លួនមានទាក់ទងនឹងការបាញ់សម្លាប់លោកបណ្ឌិត កែម ឡី កាលពីថ្ងៃទី១០ ខែកក្កដា ឆ្នាំមុន នៅក្នុងស្ថានីយ៍ប្រេងសាំង Caltex ដែលជាកម្មសិទ្ធិរបស់ក្រុមហ៊ុន Chevron នៅទីក្រុងភ្នំពេញ។
លោក សម រង្ស៊ី បានចាត់ទុកសេចក្ដីសម្រេចបែបនេះរបស់តុលាការអាមេរិកថា នឹងជួយជំរុញដល់បណ្ដឹងនៅចំពោះមុខតុលាការព្រហ្មទណ្ឌអន្តរជាតិ ទាក់ទងនឹងអំពើឃោឃៅរបស់ថ្នាក់ដឹកនាំកម្ពុជាសព្វថ្ងៃនេះ។
ឃាតកម្មលើអ្នកវិភាគនយោបាយល្បីឈ្មោះ លោក កែម ឡី រហូតមកដល់ពេលនេះ មិនត្រូវបានគេទទួលស្គាល់ថា មានយុត្តិធម៌នៅឡើយទេ ខណៈដែលមានតែខ្មាន់កាំភ្លើងឈ្មោះ អឿត អាង ហៅ ជួប សម្លាប់ តែម្នាក់ប៉ុណ្ណោះ ត្រូវបានចាប់ខ្លួន និងកាត់ទោស៕
