ប្រជាពលរដ្ឋដែលរស់នៅតាមបណ្តោយផ្លូវដែកប្រមាណ៨សហគមន៍ បានមកដាក់ញត្តិជាថ្មីនៅសាលាក្រុងភ្នំពេញ នៅព្រឹកថ្ងៃទី៧ សីហានេះ ក្នុងគោលបំណងទាមទារការឆ្លើយតបអំពីផែនការអភិវឌ្ឍន៍របស់សាលាក្រុង និងតាមដានលទ្ធផលនៃការដាក់ញត្តិកាលពីលើកមុនៗ ខណៈពួកគេព្រួយបារម្ភការបណ្តេញចេញដូចសហគមន៍ដទៃ។
សហគមន៍ទាំងនោះមានដូចជាសហគមន៍អភិវឌ្ឍថ្មី សហគមន៍រួមចិត្តតែមួយ សហគមន៍ភូមិ២ សហគមន៍ភូមិ១៧ សហគមន៍ភូមិ២១ សហគមន៍ភូមិ២៣ សហគមន៍ភូមិ១០៤ សហគមភូមិ១០៥ ស្ថិតនៅខណ្ឌដូនពេញ និងខណ្ឌទួលគោក រាជធានីភ្នំពេញ។
ប្រជាពលរដ្ឋ រស់នៅក្នុងសហគមន៍ភូមិ២៣ អ្នកស្រី មាស ស្រីមុំ បានប្រាប់អ្នកសារពត៌មានថា អ្នកស្រីមានការព្រួយបារម្ភខ្លាំងចំពោះភាពនៅស្ងៀមរបស់សាលាក្រុង ពោលគឺដោយសារតែសាលាក្រុងមិនព្រមបង្ហាញគម្រោងអភិវឌ្ឍន៍។ អ្នកស្រីថា អ្នកស្រី និងគ្រួសារដទៃទៀតនៅតំបន់ផ្លូវដែកនេះចង់បានការអភិវឌ្ឍនៅនឹងកន្លែង សុំប័ណ្ឌកមុ្មសិទ្ធ មិនមានការបណ្តេញចេញដោយបង្ខំ។
អ្នកស្រីបានធ្វើការព្រមានទៅអាជ្ញាធរថា បើសិនជាសាលាក្រុងនៅតែមិនផ្តល់ចម្លើយទេ អ្នកស្រីនិងក្រុមសហគមន៍នឹងបន្តការទាមទារនេះតទៅទៀត អាចទៅដល់ខុទ្ទកាល័យនាយករដ្ឋមន្ត្រី ស្វែងរកការជួយពីស្ថាប័នផ្សេងទៀត។
អ្នកស្រីថា៖ «ពួកយើងនឹងបន្តក្រាញននៀលនៅទីនេះបន្តទៀត ដើម្បីឲ្យរាជរដ្ឋាភិបាលធ្វើយ៉ាងណាឲ្យពលរដ្ឋអាចរស់នៅបានដោយសុខសាន្ត…។ តាមពិតខ្ញុំបានឃើញគំរូហើយ គឺអភិវឌ្ឍដើម្បីសង្គមជាតិ។ ខ្ញុំមិនជំទាស់អ្វីទេ តែត្រូវអភិវឌ្ឍន៏ឲ្យមានតម្លាភាព រវាងរាស្ត្រនិងរដ្ឋ កុំឲ្យរាស្ត្រចេញទៅទឹកភ្នែកដូចជា បុរីកីឡា បឹងកក់ ដីក្រហម យើងឃើញស្រាប់ហើយពិតជាលំបាកណាស់។ ហើយបើសិនជាទីនេះនៅមិនស្វាគមន៍យើងទេ យើងនឹងនាំគ្នាទៅដល់ខុទ្ទកាល័យសម្តេច (ហ៊ុន សែន) ថាឲ្យគាត់ត្រួតពិនិត្យមើល»។
លោក នាង ផាននិត្យ ប្រជាសហគមន៍អភិវឌ្ឍថ្មី ថ្លែងថាខាងសាលាក្រុងនៅមិនទាន់បានចេញសញ្ញាអ្វីពីការបង្ហាញផែនការអភិវឌ្ឍឬយល់ស្របជាមួយញត្តិដែលបានដាក់ទៅកន្លងមកទេ។
លោកថា៖ «ព័ត៌មានច្បាស់ការណ៍គឺគាត់នៅមិនទាន់ចេញឲ្យយើងទេ គឺគាត់នៅឲ្យពួកយើងរក្សាភាពស្ងៀមស្ងាត់ នៅទីណាទីហ្នឹងសិនទៅ។ ហើយគាត់ប្រាប់ថាបើសិនជាគាត់មានការអភិវឌ្ឍ ឬ សាងសង់អ្វី គឺគាត់នឹងចុះបើកវេទិការសាធារណៈជាមួយបងប្អូនហើយ។… ខ្ញុំគិតថា ពួកយើងមិនអាចស្ងប់ស្ងាត់បានទេ ព្រោះវាគ្មានអីច្បាស់ការជាមួយប្រជាពលរដ្ឋសោះ»។
ឆ្លើយតបទៅនឹងបញ្ហានេះ លោក ម៉េត មាសភក្តី បានប្រាប់ VOD នៅថ្ងៃនេះថា ខាងសាលាក្រុងនៅមិនទាន់មានគម្រោងធ្វើការអភិវឌ្ឍអ្វីទៅលើសហគមន៍ផ្លូវដែកទាំងនេះទេ ហើយ លោកក៏បញ្ជាក់ដែរថា សាលាក្រុងក៏នឹងមានការបើកវេទិកាពិភាក្សាគ្នាជាមួយពលរដ្ឋជាបន្តបន្ទាប់ទៀត បើសិនជាមានសកម្មភាពអភិវឌ្ឍន៍លើកក្រោយ។
លោកមានប្រសាសន៍ថា៖ «យើងអត់មានអីឲ្យមើលផង ព្រោះយើងមិនទាន់មានគម្រោងធ្វើអ្វី លើសហគមន៍គាត់ទេ ឬ ផ្លូវដែកក្នុងសហគមន៍របស់គាត់ទេ។ អញ្ជឹងយើងមិនមានគម្រោងអីដែលត្រូវឲ្យគាត់មើលទេ តែវាច្បាស់ណាស់ថា បើថ្ងៃក្រោយទៅយើងមានគោលបំណងធ្វើការអភិវឌ្ឍ យើងនឹងជូនដំណឹងដល់គាត់ជាមុន ឬ បើកវេទិកាសាធារណៈជាមុន ជាមួយប្រជាពលរដ្ឋនៅតាមផ្លូវដែកហ្នឹង»។
គួរបញ្ជាក់ផងដែរថា ប្រជាពលរដ្ឋនៅសហគមន៍ផ្លូវដែកមួយចំនួន បានអះអាងថា មានសុរិយោដី បានទៅវាស់វែងផ្លូវនៅផ្ទះពួកគាត់ មានសរសេរលេខលើជញ្ជាំងផ្ទះ ដែលធ្វើឲ្យគាត់មានការព្រួយបារម្ភ។ ឆ្លើយតបនឹងបញ្ហានេះ មន្រ្តីសាលាក្រុង ប្រាប់ថា នេះគ្រាន់តែជាការចុះស្រង់ស្ថិតិរបស់សហគមន៍នៅក្នុងទីក្រុងប៉ុណ្ណោះ គ្មានអ្វីទាក់ទងការអភិវឌ្ឍសមាគមផ្លូវដែកទេ។
មូលហេតុដែលពលរដ្ឋតំបន់ផ្លូវដែកនៅមានការព្រួយបារម្ភ និងតែងដាក់ញត្តិទៅសាលាក្រុង ដោយពួកគេថា កន្លងទៅការអភិវឌ្ឍនៅក្នុងរាជធានីភ្នំពេញមានការបណ្ដេញពលរដ្ឋចេញពីលំនៅស្ថានមានដូចជា បឹងកក់ បុរីកីឡា ដីក្រហម សំបុកចាប ដោយបើកផ្លូវឲ្យក្រុមហ៊ុនចូលអភិវឌ្ឍ ហើយមកដល់ពេលនេះអ្នកខ្លះមិនទាន់បានសំណងនៅឡើយ៕
