លោកនាយករដ្ឋមន្រ្តី ហ៊ុន សែន អះអាងថា លោក សួន សេរីរដ្ឋា មេបក្សអំណាចខ្មែរ នឹងមានទោសធ្ងន់ធ្ងរមួយករណីទៀត បន្ថែមពីលើទោសដែលរដ្ឋាភិបាលចោទថា បានប្រមាថមើលងាយកងទ័ពនោះ។
ក្នុងពិធីចែកសញ្ញាបត្រនៅព្រឹកនេះ លោក ហ៊ុន សែន ថ្លែងថា លោក សួន សេរីរដ្ឋា បានសារភាពនិងទទួលស្គាល់ចំពោះសាររបស់ខ្លួន ដែលបានផ្ញើទៅសកម្មជននៅប្រទេសបារាំង ដែលលោកថា ក្នុងសារនោះ បានមើលងាយព្រះមហាក្សត្រ។
នេះជាអ្វីដែលប្រមុខរដ្ឋាភិបាល អះអាងថា លោក សួន សេរីរដ្ឋា នឹងមានទោសធ្ងន់ជាងការបង្ហោះ ជេរប្រមាថមេទ័ពកម្ពុជាថា «ជាមេទ័ពចោរ» នោះទៅទៀត។
លោក ហ៊ុន សែន ក៏បានចោទសួរថា តើគណបក្សអំណាចខ្មែរអាចនឹងត្រូវរំលាយចោលទេ?
លោក សួន សេរីរដ្ឋា ត្រូវបានកម្លាំងសមត្ថកិច្ចចាប់ខ្លួន កាលពីថ្ងៃអាទិត្យម្សិលមិញ ខណៈលោកធ្វើដំណើតាមរថយន្តនៅខាងជើងទីក្រុងភ្នំពេញ។
រដ្ឋាភិបាលបានចោទប្រកាន់ប្រធានគណបក្សអំណាចខ្មែររូបនេះថាជេរប្រមាថកងទ័ព បន្ទាប់ពីលោកបានបង្ហោះសារ នៅលើហ្វេសប៊ុកថា «ពេលសង្គ្រាមកើតឡើងជាមួយនឹងប្រទេសលាវនោះ លទ្ធផលវាហ្នឹងមិនខុសពីសង្គ្រាមដែលកើតឡើងជាមួយនឹងប្រទេសសៀមទេ ! គឺកូនខ្មែរ កងទ័ពជាតិ នឹងស្លាប់ក្នុងសមរភូមិយ៉ាងវេទនា… ហើយមេទ័ពចោរ នឹងឡើងបុណ្យសក្តិ ប្រមូលបានលុយកាក់ សប្បាយជាមួយស្រីញីយ៉ាងគគ្រឹកគគ្រេង !។ ពីព្រោះកន្លងមកដូចយើងដឹងហើយ សង្គ្រាមដែលកើត ឡើងជាមួយនឹងប្រទេសសៀម គឺស្លាប់តែកូនខ្មែរអ្នកស្នេហាជាតិ ដែលចូលប្រយុទ្ធនៅជួរមុខទេ។ ចំណែកឯពួកមេៗពាក់ផ្កាយ និងកូនលោកធំៗដែលនៅជួរ ក្រោយចេញមុខចេញមាត់នោះ ប្រមូលលុយ ប្រមូលលាភ ហើយដេកតែម៉ាស៊ីនត្រជាក់ជាមួយស្រីកំដរ ក៏ឡើងបុណ្យឡើងផ្កាយដែរ»៕
