លោកនាយករដ្ឋមន្ត្រី ហ៊ុន សែន នៅព្រឹកថ្ងៃនេះ បានបញ្ជាក់ជាថ្មីម្ដងទៀតថា ប្រទេសកម្ពុជាមិនហាមឃាត់ការនាំចូលរថយន្តមួយទឹកពីបរទេសចូលមកក្នុងប្រទេសនេះនោះទេ។
ក្នុងពិធីចែកសញ្ញាបត្រដល់និស្សិតសាកលវិទ្យាល័យភូមិន្ទភ្នំពេញ នៅកោះពេជ្រនៅព្រឹកនេះ លោក ហ៊ុន សែន ថ្លែងថា កម្ពុជាមិនដាក់ការហាមឃាត់ចំពោះការនាំចូលរថយន្តមួយទឹកនោះទេ។
អតីតអភិបាលរាជធានីភ្នំពេញ លោក ប៉ា សុជាតិវង្ស ធ្លាប់បានលើកឡើងកាលពីចុងឆ្នាំមុននូវសំណើបញ្ឈប់ការនាំចូលរថយន្តមួយទឹក ដោយថា ដើម្បីកាត់បន្ថយការកកស្ទះចរាចរណ៍នៅក្នុងទីក្រុងមួយនេះ។
លោក ហ៊ុន សែន បានបញ្ជាក់ម្ដងរួចមកហើយកាលពីចុងឆ្នាំមុនថា លោកមិនយល់ស្របនឹងសំណើបែបនេះនោះទេ ប៉ុន្តែ លោកហាមឃាត់ការនាំចូលរថយន្តចង្កួតស្ដាំ។
ជុំវិញបញ្ហាកកស្ទះចរាចរណ៍នៅរាជធានីភ្នំពេញ លោក ហ៊ុន សែន ថ្លែងថា ប្រសិនបើរថយន្តទាំងអស់ចេញ ១០០ភាគរយ ទីក្រុងភ្នំពេញនឹងប្រឈមមុខនឹងការកកស្ទះចរាចរណ៍ទាំងអស់ ហើយបើទោះបីជាចំនួនរថយន្តចរាចរណ៍ត្រឹមតែ ៣០ភាគរយក៏ដោយ ក៏ទីក្រុងភ្នំពេញប្រឈមនឹងការកកស្ទះចរាចរណ៍ដដែល៕
