រដ្ឋមន្ត្រីការពារជាតិអាមេរិក លោក Jim Mattis បានព្រមាននៅថ្ងៃនេះថា ការវាយប្រហារពីសំណាក់កូរ៉េខាងជើងប្រឆាំងនឹងអាមេរិក អាចបង្កទៅជាសង្គ្រាមយ៉ាងឆាប់រហ័ស ខណៈដែលមេដឹកនាំកូរ៉េខាងត្បូង បានប្រកាសថា គ្មានទេសង្គ្រាមនៅលើឧបទ្វីបកូរ៉េ ប្រសិនបើគ្មានការឯកភាពពីក្រុងសេអ៊ូលនោះ។
កាលពីសប្ដាហ៍មុន កូរ៉េខាងជើងបាននិយាយថា ខ្លួនកំពុងគូសវាសផែនការបាញ់សាកល្បងគ្រាប់មីស៊ីលចំនួន ៤ ដែលនឹងបាញ់សំដៅទៅកោះហ្គាំ ប៉ុន្តែ នឹងផ្ទុះនៅលើសមុទ្រ មិនវាយប្រហារដែនដីកោះដ៏តូចរបស់អាមេរិកមួយនេះ។ ក្រុងព្យុងយ៉ាងបានព្រមានបែបនេះ បន្ទាប់ប្រធានាធិបតីអាមេរិក លោក ដូណាល់ ត្រាំ បានប្ដេជ្ញាឆ្លើយតបនឹងការគំរាមកំហែងពីក្រុងព្យុងយ៉ាង។
ជាមួយនឹងការគំរាមបែបនេះរបស់កូរ៉េខាងជើង លោក Mattis បានប្រាប់អ្នកយកព័ត៌មាននៅមន្ទីរបញ្ចកោណថា ប្រសិនបើក្រុងព្យុងយ៉ាងបាញ់មីស៊ីលដាក់អាមេរិក អាវអាចបង្កទៅជាសង្គ្រាមយ៉ាងឆាប់រហ័ស។ នេះដោយយោងតាមទីភ្នាក់ងារព័ត៌មាន AFP។
AFP បានផ្សាយបន្តថា លោក Mattis បានលើកឡើងដូច្នេះ បន្ទាប់ពីរូបលោក និងរដ្ឋមន្ត្រីការបរទេសអាមេរិក លោក Rex Tillerson បាននិយាយថា អាមេរិកគ្មានចំណាប់អារម្មណ៍លើការផ្លាស់ប្ដូររបបនៅក្រុងព្យុងយ៉ាង ឬការជំរុញការបង្រួបបង្រួមកូរ៉េទាំងពីរនោះឡើយ។
ខណៈដែលប្រមុខការពារជាតិអាមេរិកលើកឡើងបែបនេះ នៅឯកូរ៉េខាងត្បូងឯណោះវិញ ប្រធានាធិបតី លោក មូន ជែអ៊ីន បានថ្លែងថា វិធានការយោធានៅលើឧបទ្វីបកូរ៉េខាងត្បូង មានតែកូរ៉េខាងត្បូងម្នាក់គត់អាចសម្រេចបាន។ លោកបន្ថែមថា គ្មាននរណាផ្សេងទៀតអាចសម្រេចប្រើប្រាស់វិធានការយោធាដោយគ្មានការឯកភាពពីកូរ៉េខាងត្បូងនោះឡើយ។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
Reuters បានចុះផ្សាយថា លោក មូន បានថ្លែងបែបនេះអំឡុងពេលថ្លែងសុន្ទរកថារំលឹកខួប ៧២ឆ្នាំ នៃការរំដោះប្រទេសចេញពីរបបយោធាជប៉ុន ដែលបានដាក់អាណានិគមលើកូរ៉េកាលពីឆ្នាំ១៩១០ និងបញ្ចប់ទៅវិញនៅឆ្នាំ១៩៤៥៕