រថយន្តដឹកអ្នកដំណើរមួយបានបើកចូលក្នុងហ្វូងមនុស្សច្រើននៅក្នុងរដ្ឋធានី Barcelona របស់អេស្ប៉ាញកាលពីម្សិលមិញនៅលើផ្លូវធំមួយទាំងកណ្តាលថ្ងៃ ហើយបានបណ្តាលឲ្យមនុស្ស១៣នាក់ស្លាប់ សកម្មភាពនេះពួកក្រុមភេរវកម្ម IS អះអាងថា ពួកគេជាអ្នកធ្វើ។
នគរបាលបានប្រកាសថា ពួកគេបានឃាត់ខ្លួនមនុស្សពីរនាក់ជាជនសង្ស័យគឺពីរនាក់នោះត្រូវបានគេរកឃើញថា ម្នាក់ជាជនជាតិ Morocco និងម្នាក់ទៀតជាជនជាតិអេស្ប៉ាញ។ ចំណែកអ្នកដែលបើកបររថយន្តបុកចូលក្នុងហ្វូងមនុស្សបានរត់គេចខ្លួន ហើយសមត្ថកិច្ចកំពុងតាមចាប់ខ្លួន។ នេះបើតាមសារព័ត៌មាន Channel News Asia។
សាក្សីនៅកន្លែងកើតហេតុបានថ្លែងថា ភាពចលាចលកើតឡើងនៅពេលដែលឃើញមានសាកសព និង អ្នករងរបួសជាច្រើននៅលើមហាវិថី ហើយអ្នកនៅទីនោះបានរត់គេចពីកន្លែងកើតហេតុ ដើម្បីអាចរស់រានមានជីវិតផ្ទាល់ខ្លួនគេចចេញពីការស្លាប់។
មួយរយៈកាលចុងក្រោយនេះ ពួក IS បានប្រើប្រាស់រថយន្តធ្វើជាមធ្យោបាយបើកចូលហ្វូងមនុស្ស ដើម្បីសម្លាប់ជាបន្តបន្ទាប់ ពិសេសកើតមាននៅអឺរ៉ុប៕
