ប្រធានរាជបណ្ឌិត្យសភាកម្ពុជា លោក សុខ ទូច បានអះអាងថា លោកនឹងបោះពុម្ពសៀវភៅពាក់ព័ន្ធឡាវរំលោភបំពានទឹកដីកម្ពុជាក្នុងខេត្តស្ទឹងត្រែង ដោយថា ដើម្បីកុំឲ្យអ្នកនយោបាយយកបញ្ហាព្រំដែនកេងចំណេញនិងបំពុលសង្គម។
កាលពីពេលថ្មីៗនេះ លោកនាយករដ្ឋមន្ត្រី ហ៊ុន សែន បានបញ្ជាឲ្យបញ្ជូនកម្លាំងទ័ពចេញពីក្រុងតាខ្មៅឆ្ពោះទៅកាន់ព្រំដែនក្នុងខេត្តស្ទឹងត្រែង ដោយព្រមានវាយបណ្តេញទ័ពឡាវចេញពីទឹកដីខ្មែរ ប៉ុន្តែក្រោយពីព្រមានមិនបានមួយសប្តាហ៍ផង ឡាវបានដកទ័ពចេញពីទឹកដីកម្ពុជា។
ក្នុងសន្និសីទសារព័ត៌មាននៅថ្ងៃទី១៨ខែសីហានេះ លោក សុខ ទូច បានថ្លែងថា កម្ពុជាមានផែនទីខ្នាត ១/១០០០ ចំនួន១១ផ្ទាំង ដែលមានប្រវែង៥៤០គីឡូម៉ែត្រ រវាងព្រំដែនកម្ពុជានិងឡាវ។ យោងតាមផែនទីនេះ លោកថា នឹងបោះពុម្ពសៀវភៅមួយក្បាលកំរាស់ប្រហែល១០០ទំព័រ ពាក់ព័ន្ធនឹងកងទ័ពឡាវលួចចូលទឹកដីកម្ពុជា ស្ថិតនៅស្រុកសៀមប៉ាង ខេត្តស្ទឹងត្រែង ដើម្បីទុកឲ្យកូនចៅជំនាន់ក្រោយសិក្សាយល់ដឹងពីប្រវត្តិសាស្ត្រកម្ពុជា ដោយថា កុំឲ្យអ្នកនយោបាយមួយចំនួន យកបញ្ហាព្រំដែនបកស្រាយ ដើម្បីកេងចំណេញ និងបំភ្ល័យខុសពីការពិត។
លោកថ្លែងថា៖ «ប្រហែលជាមិនយូរទេ យើងនឹងចេញសៀវភៅប្រហែលជាមួយរយទំព័រ សម្រាប់និយាយពីតំបន់[ស្រុកសៀមប៉ាង]នេះ និងយុទ្ធសាស្ត្រប្រវត្តិសាស្ត្រ ដើម្បីឲ្យកូនខ្មែរជំនាន់ក្រោយ ប្រសិនបើឡាវ មកជាន់ដី[ស្រុកសៀមប៉ាង]យើងមានសៀវភៅភ្លាម…នាយករដ្ឋមន្ត្រី [នៃប្រទេស]ទំាងពីរបានយល់ព្រមហើយទំាងអស់ បានយើងបានរៀបចំសៀវភៅ កុំឲ្យអ្នកនយោបាយធ្វើពាណិជ្ជកម្មនៅលើបញ្ហាព្រំដែន យកព្រំដែន ដើម្បីបំពុលបរិយាកាសនៅក្នុងសង្គម»។
អ្នកនាំពាក្យគណបក្សប្រជាធិបតេយ្យមូលដ្ឋានលោក សាម អ៊ីន យល់ថា បញ្ហាព្រំដែនជារឿងរស៊ើបរបស់រដ្ឋាភិបាល ករណីនេះ លោកថាដើម្បីចងក្រងឯកសារប្រវត្តិសាស្ត្រពាក់ព័ន្ធព្រំដែនជាមួយប្រទេសជិតខាងឲ្យមានភាពជឿជាក់ដល់សាធារណជននោះ លោកថា លុះត្រាតែមានភាគីចម្រុះចូលរួម។
លោកមានប្រសាសន៍ថា៖ «វាត្រូវតែមានក្រុមការងារបី ដើម្បីធ្វើកិច្ចការព្រំដែន ទីមួយក្រុមការងារអ្នកច្បាប់ ក្រុមការងារប្រវត្តិសាស្រ្ត និងក្រុមការងារអ្នកជំនាញព្រំដែន ដើម្បីធ្វើកិច្ចការហ្នឹង ចងក្រងជាឯកសារ ប្រមូលព័ត៌មាន ប្រមូលទិន្នន័យទំាងឡាយ ហើយនឹងបើកទូលាយពីលទ្ធផលនៃការសិក្សាស្រាវជ្រាវដាក់ជូនទៅរាជរដ្ឋាភិបាល ដាក់ជូនមកឲ្យសាធារណជន ខ្ញុំគិតថាលោក សុខ ទូច ដែលគាត់ធ្វើហ្នឹងប្រហែលជាទើបតែបានជ្រុយណាមួយទេ មិនបានជ្រុងសព្វគ្រប់ទំាងអស់ ពីព្រោះថាលោក សុខ ទូច លោកបំពេញការងារក្នុងក្របខ័ណ្ឌរាជរដ្ឋាភិបាល»។
កាលពីចុងសប្តាហ៍មុន លោកនាយករដ្ឋមន្ត្រី ហ៊ុន សែន បានបញ្ជាឲ្យបញ្ជូនកម្លាំងទ័ពចេញពីក្រុងតាខ្មៅឆ្ពោះទៅកាន់ព្រំដែនជាមួយឡាវ ក្រោយពីលោកព្រមានវាយបណ្តេញទ័ពឡាវចេញពីទឹកដីនៅព្រំដែន។ សកម្មភាពបញ្ជូនទ័ពទៅព្រំដែននេះ ត្រូវបានមហាជនមួយចំនួនគាំទ្រ និងបានសរសើរថា ជាភាពក្លាហាន ការពារបូរណភាពទឹកដី ប៉ុន្តែក៏មានអ្នកខ្លះទៀតថា ជាឆាកល្ខោនរបស់រដ្ឋាភិបាល ដើម្បីយកប្រជាប្រិយភាពសម្រាប់ការបោះឆ្នោតឆ្នាំ២០១៨ខាងមុខ។
អ្វីគួរឲ្យកត់សំគាល់ជាងនេះទៀត ក្រោយពីលើកឡើងរបស់លោក ហ៊ុន សែន គឺប្រធានគណបក្សអំណាចខ្មែរ លោក សួន សេរីរដ្ឋា បាន បង្ហោះព័ត៌មាននៅលើហ្វេសប៊ុក ជេរប្រមាថមេទ័ពកម្ពុជាថា «ជាមេទ័ពចោរ»។ ករណីនេះ ត្រូវបានតុលាការចោទប្រកាន់ និងឃុំខ្លួននៅពន្ធនាគារផងដែរ៕
