លោកនាយករដ្ឋមន្ត្រីកម្ពុជានៅថ្ងៃអង្គារនេះ ប្រាប់ឲ្យស្ថាប័នសារព័ត៌មានឯករាជ្យមួយដែលធ្វើការនៅកម្ពុជាជាង២០ឆ្នាំមកហើយឲ្យបង់ពន្ធចូលរដ្ឋ ប្រសិនជាស្ថាប័នកាសែតនេះចង់បន្តការងារកម្ពុជា ក្រោយរដ្ឋាភិបាលក៏បានព្រមានចាត់វិធានការតាមច្បាប់។
អគ្គនាយកដ្ឋានពន្ធដារ កាលពីថ្ងៃទី៤ ខែសីហា បានទុកពេល៣០ថ្ងៃ ឲ្យអ្នកគ្រប់គ្រងកាសែតខេមបូឌាដេលីទៅបង់ពន្ធ ដែលរដ្ឋថា បានជំពាក់ខ្លួនជាង១០ឆ្នាំមកនេះ ក្នុងទំហំទឹកប្រាក់ជាង៦លានដុល្លា ដោយថានឹងមានវិធានការ ប្រសិនស្ថាប័នកាសែតឯករាជ្យមួយនេះមិនព្រមបំពេញកាតព្វកិច្ចទៅបង់។
បន្ថែមលើការជូនដំណឹងនេះ លោកនាយករដ្ឋមន្ត្រី ហ៊ុន សែន បានថ្លែងនៅថ្ងៃទី២២សីហានេះថា បើកាសែតនេះចង់នៅបន្តអាជីវកម្មនៅកម្ពុជាទៀតនោះស្ថាប័ននេះត្រូវបង់ពន្ធជូនរដ្ឋ។
លោកថា៖ «តែអានេះ តាំងពីកើតចេញជារូបរាងមកមិនដែលបង់ពន្ធឲ្យរដ្ឋទេ! សុំទោស! ឥឡូវកំពុងបង្វែរទៅជាផ្លូវនយោបាយហើយ។ ខ្លួនឯង ជាមេចោររួចហើយ មកបង្រៀនគេ បង់ពន្ធឲ្យរដ្ឋមកបើចង់នៅតទៅទៀត បង់ពន្ធឲ្យរដ្ឋ។ បើមិនបង់ពន្ធឲ្យរដ្ឋទេ វិចបង្វិចចាកចេញទៅ អាហ្នឹងនិយាយគ្នាឲ្យច្បាស់ៗហើយគ្នារឿងនយោបាយក្នុងហ្នឹងទេ!»។
សារព័ត៌មានដែលគេថា ស្និទ្ធនឹងរដ្ឋាភិបាល Fresh News បានស្រង់សម្តី អគ្គនាយកនៃអគ្គនាយកដ្ឋានពន្ធដារ ក្រសួងសេដ្ឋកិច្ច និងហិរញ្ញវត្ថុ លោក គង់ វិបុល មកចុះផ្សាយថា «កាសែត Cambodia Daily អាចនឹងបិទទាំងស្រុង និងរឹបអូសយកទ្រព្យសម្បត្តិ ប្រសិនបើឱសានវាទនៃការកំណត់ របស់អគ្គនាយកដ្ឋានពន្ធដារ ចូលមកដល់នៅថ្ងៃទី០៤ខែកញ្ញាឆ្នាំ២០១៧»។
អ្នកគ្រប់គ្រងការសែតខេមបូឌាដេលីលោក Douglas Steele បានឲ្យវីអូឌីដឹងតាមរយៈសារអេឡិចត្រូនិចអ៊ីម៉ែលថា ប្រសិនជាលោកហ៊ុន សែន នៅតែចង់បិទទ្វារកាសែតខេមបូឌាដេលីមែននោះ គាត់នឹងបង្កើតកំហុសមួយទៀតដូចដែល សម្តេច សីហនុ ធ្វើកាលពីឆ្នាំ១៩៦៥ ហើយវាជាការប្រើលេសជំនួសការសម្រេចចិត្តនយោបាយមួយក្នុងការបិទកាសែតឯករាជ្យដែលលោកធ្វើមុនការបោះឆ្នោតឆ្នាំក្រោយ។ តើវាមិនគួរឲ្យតក់ស្លុតទេដែលអ្នកនយោបាយធ្វើនយោបាយបែបនេះ?
នាយកវិទ្យាស្ថានកម្ពុជាសម្រាប់ការសិក្សាផ្នែកព័ត៌មាន លោក មឿន ឈានណារិទ្ធ លើកឡើងថា កាសែតខេមបូឌា ដេលី ធ្លាប់ចុះផ្សាយចំនុចខ្វះខាត របស់អាជ្ញាធរថ្នាក់ក្រោមជាតិ រួមទាំងចំនុចរសើបរបស់រដ្ឋាភិបាល។ លោកថា ការព្រមាន កាសែត ដេលី ជាផ្នែកមួយគំរាមដល់សារព័ត៌មានដទៃទៀត ដែលបានចូលរួមផ្សព្វផ្សាយ ដោយឆ្លុះបញ្ចាំងពីការពិតក្នុងសង្គម ជំរុញឲ្យមានអភិបាលកិច្ច តាមបែបប្រជាធិបតេយ្យ។
លោកថា៖ «កាសែតប្រៀបបានជាសវនករ ឫជាក្រុមហ៊ុនសវនកម្ម ដែលផ្តល់សេវា ដោយមិនគិតកម្រៃ ដើម្បីជួយកែលម្អចំពោះការជួយបំពេញការងារ ចំពោះមន្ត្រីរាជការ ក្រសួងមន្ទីរ និងស្ថាប័នផ្សេងៗ របស់រដ្ឋនៅពេលដែលកាសែតមើលឃើញថា មន្ត្រីណាម្នាក់នៅក្នុងជួររដ្ឋាភិបាល គាត់ធ្វើការមិនបានល្អ ស្ថាប័នណាមួយធ្វើមិនបានល្អ ដូចជាមានអំពើពុករលួយសារព័ត៌មានចុះផ្សាយ វាហាក់ដូចជាជួយដល់រដ្ឋាភិបាល ដើម្បីឲ្យគាត់កែលម្អនូវការផ្តល់សេវាកាន់តែល្អជូនសាធារណជនកាន់តែប្រសើរ»។
លោក មឿន ឈានណារិទ្ធ លើកឡើងដែរថា បើកាសែត រិះគន់រដ្ឋាភិបាលមួយនេះ ត្រូវបានគេបញ្ជាឲ្យបិទដូចការគំរាមមែន លោកថារដ្ឋាភិបាលទៅវិញទេ ជាអ្នកខាតប្រយោជន៍ ដោយថាពេលនេះពលរដ្ឋភាគច្រើនកំពុងចាប់អារម្មណ៍និងឲ្យតម្លៃទៅលើប្រព័ន្ធផ្សព្វផ្សាយ ដែលហ៊ានឆ្លុះបញ្ចាំងការពិតក្នុងសង្គម។
គួរបញ្ជាក់ផងដែរថា កាសែតផ្សាយជាភាសាអង់គ្លេសនិងជាភាសាខ្មែរនេះ បានធ្វើការនៅកម្ពុជាតាំងពីឆ្នាំ១៩៩៣មក ដែលបានសរសេររិះគន់រដ្ឋាភិបាលជាច្រើនពាក់ព័ន្ធនឹងកិច្ចការនយោបាយ និងការគ្រប់គ្រងសង្គម ដែលយូរៗម្តងកាសែតមួយនេះត្រូវបានរដ្ឋាភិបាលប្រតិកម្មទៅនឹងអត្ថបទរបស់ខ្លួនផងដែរ។ នៅឆ្នាំនេះមានអ្នកកាសែតរបស់ខេមបូឌាដេលីពីរនាក់ត្រូវបានសមត្ថកិច្ចខេត្តរតនៈគិរីចាប់ឃាត់ខ្លួនបញ្ជូនទៅតុលាការបន្ទាប់ពីអ្នកកាសែតពីរនាក់នោះបានចុះទៅធ្វើព័ត៌មានពាក់ព័ន្ធទៅនឹងការបោះឆ្នោតក្រុមប្រឹក្សាឃុំសង្កាត់នៅក្នុងខេត្តនេះ៕