ក្រសួងព័ត៌មានការពារចំណាត់ការ ករណីបិទការផ្សាយស្ថានីយវិទ្យុក្នុងស្រុក

រដ្ឋ​មន្ត្រី​ក្រសួងព័ត៌មានលោក ខៀវ កាញារីទ្ធ កាលពីពេលកន្លងទៅ

រដ្ឋមន្រ្តីក្រសួងព័ត៌មាន នៅថ្ងៃព្រហ្បសតិ៍នេះ បាន​ការពារចំណាត់ការរបស់ខ្លួនដោយថា ការបិទការផ្សាយតាមរលកអាកាស របស់ស្ថានីយវិទ្យុមួយចំនួន ជាវិធានការផ្លូវច្បាប់​ ខណៈអ្នកធ្វើការខាងសិទ្ធិមនុស្ស យល់ថា បញ្ហានេះ អាចពាក់ព័ន្ធនឹងរឿងនយោបាយ។

កាលពីថ្ងៃទី២៣ខែសីហា ម្សិលមិញ ក្រសួងព័ត៌មានបានចេញសេចក្តីប្រកាសឲ្យស្ថានីយវិទ្យុចំនួន៥ បិទរលក​​អាកាស​ផ្សាយ​ ក្នុងពេលដំណាលគ្នា ដោយថា ម្ចាស់ស្ថាប័នទាំងនោះ បាន​រំលោភសេចក្តីប្រកាស​អនុញ្ញាត​ឲ្យធ្វើអាជីវកម្ម និងកិច្ចសន្យា ដែល​បានតម្កល់ទុក​ជាផ្លូវការ​នៅក្រសួងព័ត៌មាន។

ពាក់ព័ន្ធនឹងការបិទរលក​​អាកាស​ផ្សាយនេះដែរ ​ធ្វើឲ្យមជ្ឈដ្ឋានជាតិនិងអន្តរជាតិ ថាជា​ការ​​បិទសិទ្ធិ​សេរីភាព​បញ្ចេញ​មតិ​​តាមប្រព័ន្ធផ្សព្វផ្សាយ និងធ្វើឲ្យប៉ះពាល់ដល់​ដំណើរការ​លទ្ធិប្រជា​ធិបតេយ្យ​។

ប៉ុន្តែក្នុងសន្និសទីសារព័ត៌មាន នៅថ្ងៃព្រហ្បសតិ៍នេះ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានបកស្រាយថា ​ការបិទស្ថានីយវិទ្យុ និងផ្អាកមិនឲ្យផ្សាយបន្តទៀតនេះ ជាវិធានការច្បាប់។

លោកថា៖ «នៅពេលបើកស្ថានីយ គឺម្ចាស់ស្ថានីយទាំងអស់ សុទ្ធតែបានបញ្ជាក់ថា នៅពេលជួលម៉ោង របស់ខ្លួនគឺត្រូវឆ្លង សុំការអនុញ្ញតពីក្រសួងព័ត៌មាន។ ចឹងវិទ្យុមួយចំនួន មិនបានឆ្លង គឺក្រសួងត្រូវតែបិទ…ហើយត្រូវការរឹតបន្តឹងផ្នែកច្បាប់ផងដែរ។ ចឹងយើងឃើញថា ពីម្សិលមិញវិទ្យុមួយចំនួននៅតែផ្សាយទេ ដោយសារ វិទ្យុនោះ គេមានការសុំច្បាប់ គឺបានសុំក្រសួងព័ត៌មាន»

មន្ត្រីស៊ើបអង្កេតជាន់ខ្ពស់នៅសមាគមអាដហុកលោក សឹង សែនករុណា យល់ថា ការចាត់វិធានការរបស់ក្រសួងព័ត៌មាន មិនមែនជាចំណាត់ផ្លូវច្បាប់ទេ ប៉ុន្តែអាចជាប់ពាក់ព័ន្ធនឹងរឿងនយោបាយច្រើនជាង។

លោកថា៖ «បើយើងឆ្លុះបញ្ចាំពីរឿងច្បាប់នេះ បើសិនជាការខុសច្បាប់មែន តើហេតុអ្វី បានជាយើងមិន ស្រាវជ្រាវចាត់វិធានការ ជាបន្តបន្ទាប់កន្លងមកហ្នឹង ហេតុអ្វី បានជាចាត់វិធានការអំឡុងពេលដំណើរការ គេហៅថា ​បរិយាកាសនយោបាយ ដែលនៅកម្ពុជា នឹងមានការបោះឆ្នោតនៅពេលខាងមុខ យើងឃើញ ថា មិនមែនតែខាងសារព័ត៌មានទេ ខាងអង្គការសង្គមស៊ីវិលក៏កំពុងតែប្រឈម ប្រហាក់ប្រហែល គ្នានឹងដែរ។ ដូច្នេះ យើងគិតថា វាមិនមែនជាចំណាត់ការមួយ ដែលគ្រាន់តែធ្វើឡើង ដើម្បីអនុវត្តទៅ តាមច្បាប់នោះទេ វាមានហេតុផលនៅពីក្រោយ»

បើតាមសេចក្តីប្រកាសរបស់ក្រសួងព័ត៌មាន ចុះថ្ងៃទី២១ខែសីហា ឲ្យដឹងថា ស្ថានីយវិទ្យុ ដែលក្រសួង​បិទរលកអាកាសផ្សាយ មិនឲ្យផ្សាយកើត នៅក្នុងពេលតែមួយនេះ  FM ៩៣.៥០ មេហ្គាហ៊ឺត (ផ្សាយនៅ​ភ្នំពេញ)​ រួមទាំង FM ៩៣.៧៥ មេហ្គាហ៊ឺត FM ១០៦.២៥ មេហ្គាហ៊ឺត និង FM ៩៣.២៥ មេហ្គាហ៊ឺត​ (ផ្សាយ​តាមខេត្ត) ដែលប្រតិបត្តិការ​ដោយ​ស្ថានីយ​វិទ្យុ​មហានគរ ត្រូវបានបញ្ជាឲ្យផ្អាក​ការផ្សាយ​ចាប់​ពីពេលនេះតទៅ។ ចំណែក ការផ្សាយតាមរលកអាកាស FM ១០៦.៥០ មេហ្គាហ៊ឺត និង FM ១០៦.៧០ មេហ្គាហ៊ឺត (ផ្សាយនៅភ្នំពេញ) ដែលប្រតិបត្តិការដោយវិទ្យុសារិកា និង វីអូឌី ក៏ត្រូវបានផ្អាកការផ្សាយ នៅថ្ងៃនេះដែរ។

យ៉ាងណាក៏ដោយ ចំណាត់ការលើស្ថានីយវិទ្យុឯករាជ្យទាំងនេះ គឺកើតឡើងយ៉ាងឆាប់រហ័ស ក្រោយពីរដ្ឋាភិបាល ព្រមាន​ចាត់​វិធានការកាសែត ខេមបូឌា ដេលី និងចាត់វិធានការលើអង្គការក្រៅរដ្ឋាភិបាលមួយចំនួន៕

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered