សេចក្តីប្រកាសព័ត៌មាន ចេញផ្សាយនៅថ្ងៃនេះ ឲ្យដឹងថា ចាប់តាំងពីដើមសប្តាហ៍នេះ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (ស៊ីស៊ីអាយអឹម) បានទទួល ការជូនដំណឹងជាបន្តបន្ទាប់ពីស្ថានីយ៍វិទ្យុដៃគូជាច្រើន ក្នុងការបញ្ឈប់លែងអោយមានការចាក់ផ្សាយនូវកម្មវីធីវិទ្យុសំឡេងប្រជាធិបតេយ្យ (វីអូឌី) ដោយពុំបានផ្តល់មូលហេតុច្បាស់លាស់។
បន្ទាប់ពីមានការគំរាមកំហែងរបស់រដ្ឋាភិបាលប្រឆាំងនឹងប្រព័ន្ធផ្សព្វផ្សាយឯករាជ្យ ដូចជាសារព័ត៌មាន ឌឹខេមបូឌា ដេលី វិទ្យុអាស៊ីសេរី និងវិទ្យុសំឡេងសហរដ្ឋអាមេរិកក្នុងអំឡុងពេលប៉ុន្មានសប្តាហ៍ថ្មីៗកន្លងមក ការផ្សាយរបស់វិទ្យុសំឡេងប្រជាធិបតេយ្យ វីអូឌី តាមរយៈស្ថានីយ៍វិទ្យុ អេហ្វអឹម 106.5 MHz និង 106.7 MHz ត្រូវបានបញ្ឈប់កាលពីថ្ងៃអង្គារ និងថ្ងៃពុធជាបន្តបន្ទាប់។ គិតត្រឹមថ្ងៃព្រហស្បតិ៍ម្សិលមិញស្ថានីយ៍វិទ្យុនៅតាមបណ្តាខេត្តចំនួនបីផ្សេងទៀតគឺ នៅខេត្តសៀមរាប បាត់ដំបង និងខេត្តបន្ទាយមានជ័យក៏បានផ្អាកការផ្សាយរបស់វីអូឌីទាំងស្រុងផងដែរ។
បើតាមសេចក្តីប្រកាសព័ត៌មាន ស៊ីស៊ីអាយអឹម ជឿជាក់ថា សកម្មភាពរបស់រដ្ឋាភិបាលក្នុងការបិទប្រព័ន្ធផ្សព្វផ្សាយឯករាជ្យនៅប្រទេសកម្ពុជា គឺជាចេតនានយោបាយឈានឆ្ពោះទៅរកការបោះឆ្នោតជ្រើសតាំងតំណាងរាស្រ្តដែលនឹងប្រព្រឹត្តទៅនៅខែកក្កដា ឆ្នាំ២០១៨ ខាងមុខ។
នាយកប្រតិបត្តិ ស៊ីស៊ីអាយអឹម លោក ប៉ា ងួនទៀង បានថ្លែងថា៖ «ការធ្វើទុក្ខបុកម្នេញប្រព័ន្ធផ្សព្វផ្សាយឯករាជ្យនឹងធ្វើអោយប៉ះពាល់យ៉ាងធ្ងន់ធ្ងរដល់ដំណើរការនៃការបោះឆ្នោតរបស់ប្រទេសកម្ពុជា»។
វិទ្យុសំឡេងប្រជាធិបតេយ្យ វីអូឌី បានផ្សាយតាមរលកធាតុអាកាសរបស់ស្ថានីយ៍វិទ្យុ អេហ្វអឹម នានាចាប់តាំងពីឆ្នាំ២០០៣ និងបានដំណើរការការផ្សាយតាមប្រព័ន្ធអ៊ីនធើណិតចាប់ពីឆ្នាំ ២០១២ មកម្ល៉េះ៕
