ជនជាតិដើមភាគតិច ដែលរងគ្រោះពីការសាងសង់ទំនប់វារីអគ្គិសនី នៅខេត្តស្ទឹងត្រែង បាននាំគ្នាស្វែងរកកិច្ចអន្តរាគមន៍ ពីក្រសួងរ៉ែនិងថាមពល បន្ទាប់ពីករណីនៃការរំលោភសិទ្ធិរបស់ពួកគេ ត្រូវបានតំណាងពិសេសរបស់អង្គការសហប្រជាជាតិ បានសួរមកកាន់រដ្ឋាភិបាល។
ជនជាតិដើមភាគតិចពូនង និងឡាវ ចំនួន៧នាក់ ដែលតំណាងឲ្យពលរដ្ឋរងគ្រោះជាង ៦៤២នាក់ផ្សេងទៀត ដែលរស់នៅឃុំក្បាលរមាស និងឃុំស្រែគរ ស្រុកសេសាន ខេត្តស្ទឹងត្រែង បានឡើងមកដាក់ញាត្តិនៅក្រសួងរ៉ែ និងថាមពលនៅព្រឹកនេះ ដើម្បីទាមទាររដ្ឋាភិបាល បញ្ឈប់ការសាងសង់ទំនប់វារីអគ្គិសនីសេសានក្រោមពីរបន្ថែមទៀត ដែលថា កំពុងធ្វើឲ្យប៉ះពាល់ដល់ប្រពៃណី ទំនៀមទំលាប់ និងអត្តសញ្ញាណរបស់ពួកគេ ក្នុងនោះដែរ ពួកគេក៏បាន ស្នើដល់រដ្ឋាភិបាល ឲ្យបើកដំណើការឡើងវិញនូវសេវាសាធារណៈនានា និងបញ្ឈប់នូវការកាប់បំផ្លាញព្រៃឈើ ក្នុងព្រៃសហគមន៍។
តំណាងក្រសួងរ៉ែ និងថាមពល លោក ស៊ូ បុណ្ណារិទ្ធ បានចេញមកទទួលញាត្តិដោយសន្យាថា នឹងយកបញ្ហានេះ បញ្ជូនទៅថ្នាក់លើដើម្បីពិនិត្យ និងអនុម័ត ដោយថា នាពេលខាងមុខក្រុមការងារក្រសួងនឹងចុះទៅខេត្តស្ទឹងត្រែង ដើម្បីដោះស្រាយជូនពូកគេ។
ក្នុងដំណើរទស្សនកិច្ចរបស់អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្ស លោកស្រី រ៉ូណា ស្មីត បានចោទសួររដ្ឋាភិបាលកម្ពុជា ពីការរំលោភសិទ្ធិជនជាតិដើមភាគតិចនៅតំបន់ទំនប់វារីអគ្គិសនីសេសានក្រោមពីរ ក្នុងខេត្តស្ទឹងត្រែងនេះ។ ជាការឆ្លើយតបនៅពេលនោះប្រធានគណៈកម្មាធិការសិទ្ធិមនុស្សកម្ពុជាលោក កែវ រ៉េមី មានប្រសាសន៍ថា លោកបានទាក់ទងទៅ ក្រសួងការបរទេស ឲ្យរៀបចំឯកសារជាមួយភាគីពាក់ព័ន្ធលើករណីនេះ ដើម្បីដាក់ទៅកាន់អង្គការសហប្រជាជាតិនៅពេលខាងមុខផងដែរ។
គម្រោងទំនប់វារីអគ្គិសនីសេសានក្រោមពីរនេះ បានធ្វើឲ្យមានផលប៉ះពាល់ដល់ភូមិចំនួន៦ភូមិ នៃឃុំចំនួនពីរ នៃស្រុកសេសាន ខេត្តស្ទឹងត្រែង ដែលមានពលរដ្ឋរស់នៅចំនួន ៨៤៦គ្រួសារ កំពុងរស់នៅ តែរហូតមកដល់ពេលនេះ អ្នកដែលរងផលប៉ះពាល់ បានសម្រេចទទួលយកសំណងចំនួន ៨៧ភាគរយ ខណៈ១២៦គ្រួសារ កំពុងរង់ចាំដំដោះស្រាយ។
ក្រសួងរ៉ែ និងថាមពល បានឲ្យដឹងថា វារីអគ្គិសនីសេសានក្រោមពីរនេះ ជាគម្រោងរបស់រដ្ឋាភិបាល ដែលបានផ្តល់សិទ្ធិទៅឲ្យក្រុមហ៊ុនឯកជនមួយ ដែលមានភាគហ៊ុនពីចិន៥១ភាគរយ កម្ពុជា៣៩ភាគរយ និងវៀតណាម១០ភាគរយ។ វារីអគ្គិសនីសេសានក្រោមពីរនេះ ចំណាយទឹកប្រាក់ជិត៨០០លានដុល្លារអាមេរិក ដោយរំពឹងថា បានថាមពលអគ្គិសនី៤០០មេហ្គាវ៉ាត់៕
