អង្គការអាមេរិក (NDI) អះអាងថា ខ្លួនបានស្នើសុំចុះបញ្ជីនៅក្រសួងការបរទេសកម្ពុជាតាំងតែពីថ្ងៃទី២១ ខែកញ្ញាឆ្នាំ២០១៦មកម្ល៉េះ ប៉ុន្តែរដ្ឋាភិបាលកម្ពុជា ពុំបានឆ្លើយតបនោះទេ ចាប់តាំងពីពេលនោះមក។
ការលើកឡើងបែបនេះ ស្របពេលដែលរដ្ឋាភិបាល សម្រេចបិទវិទ្យាស្ថានជាតិប្រជាធិបតេយ្យ (NDI) នេះ ដោយចោទថា អង្គការនេះ បានធ្វើប្រតិបត្តិការ នៅក្នុងប្រទេសកម្ពុជា ដោយមិនបានចុះបញ្ជីជាមួយក្រសួងការបរទេស ខណៈសារព័ត៌មានដែលគេថាស្និទ្ធនឹងរដ្ឋាភិបាល ក៏បានផ្សាយថា អង្គការ NDI បានគាំទ្របក្សប្រឆាំង សម្រាប់ការប្រកួតប្រជែងក្នុងការបោះឆ្នោតជាតិនៅឆ្នាំក្រោយ។
នៅក្នុងសេចក្តីប្រកាសព័ត៌មានចុះថ្ងៃទី២៣សីហា វិទ្យាសា្ថនជាតិប្រជាធិបតេយ្យ បានសំដែងការសោកស្តាយយ៉ាងខ្លាំង ចំពោះសេចក្តីសម្រេច ពីសំណាក់រាជរដ្ឋាភិបាលកម្ពុជា។
នាយកវិទ្យាស្ថាន NDI លោក Kenneth Wollack មានប្រសាសន៍ថា៖ «ពួកយើងពិតជាមានការភ្ញាក់ផ្អើល ព្រមទាំងខកចិត្តយ៉ាងខ្លាំងជាមួយនឹងការប្រកាសនេះ។ អស់រយៈពេល២៥ឆ្នាំហើយ បើគិតមកទល់ពេលនេះ ដែល NDI បានធ្វើការជាមួយគ្រប់គណបក្យនយោបាយទាំងអស់នៅក្នុងប្រទេសកម្ពុជា ដែលរួមបញ្ចូលទាំងគណបក្សកាន់អំណាចផង»។
លោកបន្ថែមថា៖ «ពួកយើងធ្វើការប្រកបដោយតម្លាភាព ហើយតែងតែធ្វើអ្វីដែលស្របទៅនឹងច្បាប់។ ពួកយើងគ្រាន់តែសង្ឃឹមថា រដ្ឋាភិបាលអាចនឹងធ្វើការសម្រេចចិត្តសារជាថ្មី»។
បើតាមសេចក្តីប្រកាសព័ត៌មានដដែល ការដែលក្រសួងការបរទេសកម្ពុជា មិនឆ្លើយតបនឹងសំណើរបស់អង្គការខ្លួនបែបនេះ NDI ចាត់ទុកថា ជាការរំលោភទៅលើមាត្រា១៤ នៃច្បាប់ស្ដីពីសមាគម និងអង្គការមិនមែនរដ្ឋាភិបាល។
មាត្រា១៤ នៃច្បាប់សមាគម និងអង្គការមិនមែនរដ្ឋាភិបាល ដែលបានចូលជាធរមានតាំងពីថ្ងៃទី១២ ខែសីហា ឆ្នាំ២០១៥នោះ បានចែងថា ក្រសួងការបរទេសកម្ពុជា ត្រូវពិនិត្យលើខ្លឹមសារនៃសំណុំលិខិត ហើយត្រូវសម្រេចយល់ព្រម ឬមិនយល់ព្រមចុះអនុស្សរណៈជាមួយសមាគម ឬអង្គការមិនមែនរដ្ឋាភិបាលបរទេស យ៉ាងយូរ ៤៥ថ្ងៃ នៃថ្ងៃធ្វើការ។
អ្នកនាំពាក្យក្រសួងការបរទេសអាមេរិក កាលពីម្សិលមិញ ក៏បង្ហាញការគួរឲ្យព្រួយបារម្ភបំផុត ចំពោះការបិទ «វិទ្យាស្ថានជាតិប្រជាធិបតេយ្យ» ដោយថា អង្គការធ្វើការផ្នែកលទ្ធិប្រជាធិបតេយ្យមួយនេះ ទទួលបានការគោរពខ្ពស់បំផុតលើពិភពលោក និងមិនលម្អៀងទៅរកគណបក្សនយោបាយណាមួយឡើយ។
គួររំលឹកថា ក្រៅពីធ្វើការ ដើម្បីផ្សព្វផ្សាយពីលទ្ធិប្រជាធិបតេយ្យ អង្គការរបស់អាមេរិកមួយនេះ បានផ្ដល់ការបណ្ដុះបណ្ដាលទៅដល់ក្រុមមន្ត្រីគណបក្សនយោបាយទាំងអស់ ព្រមទាំងធ្វើការយ៉ាងជិតស្និទ្ធជាមួយក្រសួងមហាផ្ទៃ ដើម្បីលើកកម្ពស់គណនេយ្យភាពរបស់រដ្ឋាភិបាល និងជាមួយគណៈកម្មាធិការជាតិរៀបចំការបោះឆ្នោត ដើម្បីជំរុញឲ្យមានការបោះឆ្នោត ដោយសេរី និងយុត្តិធម៌៕
