ពលរដ្ឋហៅការ «ផ្អាកការផ្សាយវិទ្យុវីអូឌី» ថាដូចផ្តាច់ដង្ហើមរបស់ពួកគេ

ពលរដ្ឋ​កម្ពូជា​មួយ​រូប ស្វែង​រក​កម្មវិធី​ផ្សាយ​នៅ​លើ​វិទ្យុ​ បន្ទាប់​ពី​កម្មវិធី​ផ្សាយព័ត៌មាន​នៅ​លើ​ស្ថានីយ៍​វិទ្យុ​ជាង ៣០​ ត្រូវ​បាន​បិទ​មិន​ឱ្យ​ផ្សាយ កាល​ពី​ថ្ងៃ​ទី​១២ ខែ​កញ្ញា ឆ្នាំ​២០១៧។ (VOD)

ក្រុមប្រជាពលរដ្ឋ ​ដែលថាចូលចិត្តស្តាប់ «កម្មវិធីផ្សាយរបស់វិទ្យុ​​វីអូឌី» មាន​ប្រតិកម្មភ្លាមៗ និងសំដែងការខកចិត្តយ៉ាងខ្លាំង ដោយហៅថា «ការផ្អាកការផ្សាយរបស់វិទ្យុនេះ» តាមរលកអាកាស ថាដូចផ្តាច់ដង្ហើមរបស់ពួកគេ ខណៈការផ្អាកនេះ អាចប៉ះពាល់ដល់អ្នកស្តាប់ជាង៧លាននាក់។

សេចក្តីប្រកាសព័ត៌មានចេញផ្សាយនៅថ្ងៃសុក្រនេះ​ឲ្យដឹងថា ចាប់តាំងពីដើមសប្តាហ៍នេះ មជ្ឈមណ្ឌល​​កម្ពុជាដើម្បីប្រព័ន្ធផ្សព្វផ្សាយឯករាជ្យ​ បានទទួលការជូនដំណឹងជាបន្តបន្ទាប់ពីស្ថានីយវិទ្យុដៃគូជាច្រើន ក្នុងការបញ្ឈប់លែងឲ្យមានការចាក់ផ្សាយនូវកម្មវីធីវិទ្យុ​​សំឡេងប្រជាធិបតេយ្យ ​​ឬ វីអូឌី ដោយពុំបានផ្តល់មូលហេតុច្បាស់លាស់។​

បើតាមសេចក្តីប្រកាសព័ត៌មាន បន្ទាប់ពីមានការគំរាមកំហែងរបស់រដ្ឋាភិបាលប្រឆាំងនឹងប្រព័ន្ធផ្សព្វផ្សាយឯករាជ្យ ដូចជាសារព័ត៌មាន ឌឹខេមបូឌា ដេលី  វិទ្យុអាស៊ីសេរី និងវិទ្យុសម្លេងសហរដ្ឋអាមេរិកក្នុងអំឡុងពេលប៉ុន្មានសប្តាហ៍ថ្មីៗកន្លងមក ការផ្សាយរបស់វិទ្យុសម្លេងប្រជាធិបតេយ្យ វីអូឌី​ តាមរយៈស្ថានីយ៍វិទ្យុ អេហ្វអឹម ១០៦.៥០ MHz និង ១០៦.៧០ MHz ត្រូវបាន​បញ្ឈប់កាលពីថ្ងៃអង្គារ និងថ្ងៃពុធជា​បន្ត​បន្ទាប់។ គិតត្រឹមថ្ងៃព្រហស្បតិ៍ម្សិលមិញ ស្ថានីយ៍វិទ្យុនៅតាមបណ្តាខេត្តចំនួនបីផ្សេងទៀតគឺ នៅខេត្តសៀមរាប បាត់ដំបង និងខេត្តបន្ទាយមានជ័យ ក៏បានផ្អាកការផ្សាយ​របស់​វីអូឌីទាំងស្រុងផងដែរ។​

អ្នកតាម​ដាន​ស្តាប់​វិទ្យុវីអូឌី មក​ពី​ភ្នំពេញ​ម្នាក់ អ្នក​ស្រី អ៊ុំ សំបូរ មាន​ការ​ព្រួយ​បារម្ភថា នៅ​ពេល​វិទ្យុនេះ​ត្រូវ​បាន​ផ្អាក​ការ​ផ្សាយ ហាក់​បី​ដូចជា ​ផ្តាច់​ដង្ហើម​របស់​ប្រជាពលរដ្ឋ ​ក្នុង​ការទទួល​បាន​ពត៌មាន​ដូច្នោះដែរ។ អ្នក​ស្រីថា អ្នក​ស្រីពិតជា​ចង់​ឲ្យ​ស្ថានីយ​មួយ​នេះ ដំណើរការ​ផ្សាយ​វិញ។

អ្នក​ស្រីមាន​ប្រសាសន៍ថា៖ «បារម្ភថា ពេល​វិទ្យុវីអូឌី​ បិទអញ្ជឹង ដូចជា​បិទជីវិត​របស់​ពលរដ្ឋអញ្ជឹង! ខ្ញុំ​ដូចថា ​ពិបាក​ណាស់ គឺថា អត់មាន​ព័ត៌មាន ដូចអត់​មាន​ជីវិត​ណា វាអត់​មាន​ដឹង​។ ប្រជាពលរដ្ឋ​ហ្នឹង​ហា មាន​តំណាង​តាម​ខេត្ត​មក មក​ចូល​រួម​ប្រជុំ​រក​ដំណោះ​ស្រាយ ហើយ​ថា​បិទ​ហ្នឹង ​បិទដើម្បីអី ព្រោះអីព័ត៌មាន ​ជាជីវិត​របស់​ពលរដ្ឋ ហើយ​បើ​បិទអញ្ជឹង ពលរដ្ឋ​មាន​ដង្ហើម​អីដក»។

អ្នក​ស្តាប់​វិទ្យុវីអូឌី ម្នាក់ទៀត នៅភ្នំពេញ​ លោក ជា ចិន្តា មាន​ប្រសាសន៍ថា លោក​ជា​អ្នក​តាម​ដាន​ស្តាប់​វិទ្យុនេះ​រាល់ថ្ងៃនិងល្ងាច ហើយ​លោកថា មាន​ការ​ភ្ញាក់​ផ្អើល ​ដែលស្ថានីយ​មួយ​នេះ​ ត្រូវ​បាន​ផ្អាក​ការ​ផ្សាយ។ លោក​ថា ​លោក​ចង់ឲ្យស្ថានីយ​មួយ​នេះ ​ទទួល​បាន រលកអាកាសផ្សាយ​ឡើង​វិញ ព្រោះថា បើ​ផ្អាក​បែប​នេះ ពលរដ្ឋ​នឹង​បាត់​បង់​ឱកាស ​ស្តាប់​ព័ត៌មាន​ពិត។

លោក​មាន​ប្រសាសន៍ថា៖ «ខ្ញុំ​តែង​តែ​ស្តាប់​រាល់​ល្ងាច រាល់​យប់ ជាពិសេស​ ពេល​ខ្ញុំ​ចេញ​ដំណើរ​ទៅ​ធ្វើ​ការ ខ្ញុំ​ជិះឡាន​ទៅ​ធ្វើ​ការ​អី ខ្ញុំបើក​វីអូឌី​ ស្តាប់​រហូត តែ​ដល់​ពេល​ប៉ុន្មាន​ថ្ងៃហ្នឹង ខ្ញុំ​ឃើញ​នៅ​ក្នុង​ហ្វេស​ប៊ុក គេ​ថាគេ​បាន​បិទ ដល់​ពេល​ខ្ញុំ​ទូរសព្ទ​សួរខាង​ វីអូឌី ​ទៅ​ គឺគេ​បាន​បិទ​មែន! ចង់​បាន ចង់​ឲ្យ​បើក​វិញព្រោះ​ខ្ញុំ​ចូល​ចិត្ត ចូល​ចិត្ត​ស្តាប់​ព័ត៌មាន​ពិត សូម្បី​ម្តាយ​របស់​ខ្ញុំ ឪពុក​របស់​ខ្ញុំ​ ក៏​ចូល​ចិត្ត​ដែរ។ ខ្ញុំ​ចូល​ចិត្ត និយាយ​តាម​ត្រង់ ​ខ្ញុំ​ចូល​ចិត្ត»។ 

មានប្រសាសន៍ ប្រហាក់​ប្រហែល​គ្នា​ដែរ អ្នកស្តាប់វីអូឌី​ម្នាក់​ទៀត នៅ​ខេត្ត​ព្រៃវែង លោក នឹម​ នាង ក៏​មាន​ប្រតិកម្ម​ដែរថា នៅ​សុខៗ លោក​ស្រាប់​តែ​បើក​ស្តាប់​ព័ត៌មាន​មិន​បាន។ លោក​ថា ការ​ផ្អាក​ផ្សាយ​នេះ ដោយ​សារ​តែវីអូឌី និយាយពិត មិន​បម្រើ​ប្រយោជន៍​ឲ្យ​នរណាម្នាក់ តែ​បម្រើ​ឲ្យ​ប្រយោជន៍​រួម ដែល​ជា​ហេតុធ្វើ​ឲ្យ​មាន​ការ​ផ្អាក​ផ្សាយ។

លោក​ថា៖ «ហើយ​ធ្វើ​យ៉ាង​ម៉េច​ទៅ បើ​បិទជិត​ឈឹង​អញ្ជឹង តើ​បាន​អីស្តាប់ទៅ ហើយឥឡូវ​ហ្នឹង គិត​យ៉ាង​ម៉េចទៅ វិទ្យុហ្នឹង។ អញ្ជឹង ឲ្យ​ទៅ​ស្តាប់​ប៉ុស្តិ៍ណា​វិញទៅ ១០៦.៥០​ ក៏​បិទ ១០៦.៧០​ ក៏បិទ។ អានេះគេថា នេះ​មិន​បម្រើ​បុគ្គល បម្រើ​រួម គេ​មិន​ពេញ​ចិត្ត​អញ្ជឹង​ហា បាន​គេ​បិទ​នោះ។ អញ្ចេះ គឺព័ត៌មាន​ហ្នឹង​ គឺវា​ សុចរិត យុត្តិធម៌ ដូច​ខ្ញុំ​អញ្ជឹង ឃើញ​អីថា ​ហ្នឹង​ហើយ មិន​ខ្លាចទេ!»។

ងាកមក លោក ផុក វេត ជាពលរដ្ឋរស់​នៅ​ខេត្ត​សៀមរាប មានប្រសាសន៍​ថា លោក​មាន​ការ​ភ្ញាក់​ផ្អើល​ចំពោះ​ការ​ផ្អាក​ផ្សាយ​របស់​វិទ្យុវីអូឌី ដោយ​ថា ​បើ​នៅ​តែ​ផ្អាក​បែប​នេះ តើ​ឲ្យ​លោក​ទទួល​បាន​ព័ត៌មាន​ពិត​មក​ពី​ណា​ទៅ។ ក្រៅពីនេះ លោក ផុក វេត ក៏​សំណូម​ពរ​ឲ្យ​រដ្ឋាភិបាល ផ្តល់ការផ្សាយឲ្យ​វិទ្យុ​នេះ​ឡើង​វិញ។

នាយកប្រតិបត្តិ​មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ​ លោក ប៉ា ងួនទៀង បានថ្លែងថា ការធ្វើទុក្ខបុកម្នេញប្រព័ន្ធផ្សព្វផ្សាយឯករាជ្យ នឹងធ្វើឲ្យប៉ះពាល់យ៉ាងធ្ងន់ធ្ងរដល់ដំណើរការនៃការបោះឆ្នោតរបស់ប្រទេស​​កម្ពុជា។​

ប៉ុន្តែរដ្ឋមន្រ្តីក្រសួងព័ត៌មាន លោក ខៀវ កាញារីទ្ធ កាលពីម្សិលមិញនេះ បាន​ការពារចំណាត់ការរបស់ខ្លួនដោយថា ការបិទការផ្សាយតាមរលកអាកាស របស់ស្ថានីយវិទ្យុមួយចំនួន ជាវិធានការផ្លូវច្បាប់​ ហើយមិនពាក់ព័ន្ធនឹងរឿងនយោបាយនោះទេ។

ការផ្អាក «កម្មវិធីផ្សាយរបស់វិទ្យុ​​វីអូឌី» តាមរលកអាកាសនេះ នឹងប៉ះពាល់ដល់ប្រជាពលរដ្ឋប្រមាណ ៧លាន៥សែននាក់ នៅក្នុងចំណោម១២ខេត្តរាជធានី នេះបើតាមរបាយការណ៍ប្រចាំឆ្នាំ២០១៦ របស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ។

វិទ្យុសំឡេងប្រជាធិបតេយ្យ វីអូឌី បានផ្សាយតាមរលកធាតុអាកាសរបស់ស្ថានីយ៍វិទ្យុ អេហ្វអឹម នានាចាប់តាំងពីឆ្នាំ​២០០៣ និងបានដំណើរការ ការផ្សាយតាមប្រព័ន្ធអ៊ីនធើណិតចាប់ពីឆ្នាំ២០១២ មកម្ល៉េះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ