លោកនាយករដ្ឋមន្ត្រី ហ៊ុន សែន នៅព្រឹកថ្ងៃអាទិត្យនេះ បន្តជួបកម្មករ និងបុគ្គលិកបម្រើការងារនៅតាមរោងចក្រនានាជាង ៤០០០នាក់ ដែលការជួបប្រជុំនេះធ្វើឡើងនៅមជ្ឈមណ្ឌលកោះពេជ្រ។
តាមហ្វេសប៊ុករបស់លោកនាយករដ្ឋមន្ត្រីហ៊ុន សែន បានឲ្យដឹងថា នៅព្រឹកនេះ លោកជួបជាមួយតំណាងកម្មករដូចជាប្រធានរដ្ឋបាលប្រធានផ្នែក និងមេក្រុមមកពីរោងចក្រផ្សេងៗគ្នាចំនួន៤,៤០៣ នាក់។
ក្នុងឱកាសនោះ លោកនាយករដ្ឋមន្ត្រីក៏បានលើកឡើងប្រាប់តំណាងកម្មករ និង បុគ្គលិកតាមរោងចក្រថា វិស័យឧស្សាហកម្មត្រូវបានបំផ្លាញនៅសម័យសង្គ្រាម ដូចជា សម័យលន់ ណុល និង សម័យខ្មែរក្រហម។ លោក នាយករដ្ឋមន្ត្រីក៏បានលើកឡើងពីការរីកចម្រើនក្រោមការដឹកនាំរបស់លោកថា កាលពីឆ្នាំ១៩៧៩ មានរោងចក្រតែ ៦៤ ហើយថា បច្ចុប្បន្ននេះ មានរោងចក្រកាត់ដេរ ១ ១១៧ ហើយបើសរុបទាំងរោងចក្រសហគ្រាសទាំងអស់មានប្រមាណ១១ ១៦៨ ដែលបានផ្តល់ការងារឲ្យពលរដ្ឋខ្មែរបានប្រមាណ១លាននាក់។
ទោះជាយ៉ាងណាខាងសហជីព ធ្លាប់លើកឡើងថា ការងារកម្ពុជាបច្ចុប្បន្នមិនទាន់គ្រប់គ្រាន់ និង លក្ខខណ្ឌការងារមិនល្អទើបបណ្តាលឲ្យពលរដ្ឋខ្មែរជាង១លាននាក់បាន ក្លាយខ្លួនជាពលករចំណាកស្រុកធ្វើការងារទាំងខុសច្បាប់ និង ស្របច្បាប់នៅបរទេស ពិសេសនៅថៃមានជាង១លាននាក់។
របាយការណ៍ក្រសួងការងារ បង្ហាញថា កម្ពុជាបានបញ្ជូនពលករទៅធ្វើការនៅបរទេសចំនួន៥ប្រទេស រួមមាន ប្រទេសថៃ សាធារណរដ្ឋកូរ៉េ(កូរ៉េខាងត្បូង) ម៉ាឡេស៊ី ជប៉ុន និងសិង្ហបុរី មានពលករប្រមាណ១លាន៥ម៉ឺននាក់ ដែលអាចរកចំណូលបានប្រមាណជិត២ពាន់លានដុល្លារក្នុង១ឆ្នាំ។ ប៉ុន្តែរបាយការណ៍របស់សហជីពមួយចំនួនបង្ហាញថា ពលករដ្ឋខ្មែរទាំងខុសនិង ស្របច្បាប់កំពុងធ្វើការនៅក្រៅប្រទេសមានជាង១លាន៥សែននាក់ ក្នុងនោះនៅថៃមានជាង ១លាននាក់៕
