ប្រធានគណបក្សសង្គ្រោះជាតិ ប្រកាសចុះជួបផ្ទាល់ជាមួយថ្នាក់ដឹកនាំគណបក្សនៅតាមមូលដ្ឋាន នៅ២៥ រាជធានីខេត្តទូទាំងប្រទេស ដោយលោកថា ដើម្បីស្វែងយល់ពីចំណុចខ្សោយនិង ចំណុចខ្លាំង ហើយរៀបចំត្រៀមទទួលជ័យជន្នះក្នុងការបោះឆ្នោតថ្នាក់ជាតិឆ្នាំក្រោយ។
ថ្លែងក្នុងឱកាសជួបជាមួយថ្នាក់ដឹកនាំមូលដ្ឋាននៅខេត្តរតនៈគិរី និង មណ្ឌលគិរី នៅថ្ងៃអាទិត្យនេះ លោក កឹម សុខា លើកឡើងថា លោកជួបដោយផ្ទាល់ជាមួយថ្នាក់ដឹកនាំ ឃុំ-សង្កាត់ ក្រុង-ស្រុក-ខណ្ឌ ខេត្ត-រាជធានី ដើម្បីបានដឹងចំណុចខ្លាំងចំណុចខ្សោយហើយ នឹងត្រៀមខ្លួនរៀបចំទទួលជ័យជម្នះនៅឆ្នាំក្រោយ។
លោកលើកឡើងថា៖«ក្រោយពីបានស្វែងយល់ ស្ថានភាពជាក់ស្ដែងទាំងនេះហើយ ខ្ញុំមានជំនឿថា គណបក្សសង្គ្រោះជាតិ អាចកាត់បន្ថយចំណុចខ្សោយ និងរក្សាបានចំណុចខ្លាំង ហើយយើងអាចឈានទៅរកជ័យជម្នះក្នុងការបោះឆ្នោតជាតិឆ្នាំ២០១៨ខាងមុខនេះ។»
លោក កឹម សុខា ក៏បានបញ្ជាក់ទៀតថា គណបក្សសង្គ្រោះជាតិមានទិសដៅច្បាស់លាស់ឆ្ពោះទៅរកការបោះឆ្នោត ហើយថា មិនធ្វើសកម្មភាពណាមួយដូចមានការលាភពណ៌លើគណបក្សលោកនោះទេ។
ការបោះឆ្នោតជ្រើសតាំងតំណាងរាស្ត្រអាណត្តិទី៦ នឹងប្រព្រឹត្តទៅនៅខែកក្កដាឆ្នាំ២០១៨ខាងមុខនេះ។ ចំណែកអ្នកឃ្លាំមើលនានាបានថ្លែងថា គណបក្សសង្គ្រោះជាតិនៅតែជាគូប្រជែងសំខាន់ជាមួយគណបក្សប្រជាជនកម្ពុជា បន្ទាប់ពីលទ្ធផលការបោះឆ្នោតថ្នាក់ជាតិអាណត្តិទី៥គឺមានតែគណបក្សពីរនេះ ដែលទទួលបានអាសនៈនៅក្នុងសភា។
