គណបក្សអំណាចខ្មែរបានឲ្យដឹងថា នឹងពិចារណាក្នុងការរៀបចំធ្វើបាតុកម្មនៅពេលខាងមុខ ដោយអះអាងថា ដើម្បីទាមទារឲ្យមានយុត្តិធម៌ដល់ប្រធានគណបក្សនេះ ដែលត្រូវបានរដ្ឋាភិបាលចាប់ខ្លួនក្រោយពេលដែលរិះគន់ការបញ្ជូនកងទ័ពទៅព្រំដែនជាមួយប្រទេសឡាវ។
ក្នុងសន្និសីទសារព័ត៌មាននៅថ្ងៃ២៨ ខែសីហានេះ ប្រធានស្តីទីគណបក្សអំណាចខ្មែរ លោក សួង សុភ័ណ្ឌ បានថ្លែងថា ក្រោយពេលធ្វើសមាជរបស់គណបក្សនៅខែក្រោយនេះ លោកនឹងមានការពិចារណា ពីការរៀបចំធ្វើបាតុកម្ម ប្រឆំាងការចាប់ខ្លួន និងកាត់ទោសប្រធានគណបក្សអំណាចខ្មែរ លោក សួន សេរីរដ្ឋា ដោយថា ដើម្បីស្វែងរកយុត្តិធម៌ឲ្យអតីតប្រធានគណបក្សនេះ។
លោកថ្លែងថា «ប្រសិនបើជាអត់ជំរើស ក្រោយអំពីសមាជឲ្យបានជ្រើសរើសប្រធាន អនុប្រធានគណបក្សរួចហើយ យើងអាចឈានចូលទៅដល់ការគិតគូពាក់ព័ន្ធបាតុកម្ម តែទោះបីជាយ៉ាងណាក៏ដោយ ដូចខ្ញុំជម្រាប យើងគោរពច្បាប់ យើងអនុវត្តច្បាប់ យើងមិនចង់ធ្វើអ្វីដែលឲ្យស្ថានការណ៍សង្គមវាតានតឹងទេ ណាមួយជិតបោះឆ្នោតផង តែយើងមិនអាចមើលឃើញនូវភាពអយុត្តិធម៌ចំពោះលោក សួន សេរីរដ្ឋា បានទេ យើងត្រូវតែរកវិធី ដើម្បីទប់ស្កាត់ រកវិធីដើម្បីទប់ទល់ រកវិធីដើម្បីបកស្រាយ»។
លោក សួន សេរីរដ្ឋា ត្រូវបានអាជ្ញាធរចាប់ខ្លួនកាលពីថ្ងៃទី១៣សីហាឆ្នាំ២០១៧នេះ បន្ទាប់ពីលោកបានសរសេរបង្ហោះលើហ្វេសប៊ុករិះគន់ ក្រោយពេលបញ្ជូនកងទ័ពទៅព្រំដែនពេលមានជម្លោះជាមួយឡាវ។ ក្រោយមកលោក សួន សេរីរដ្ឋា ធ្វើលិខិតលាលែងពីតំណែងប្រធានបក្ស ដើម្បីជៀសវាងច្បាប់ស្តីពីគណបក្សនយោបាយរំលាយគណបក្សនេះ បើសិនជាប្រធានបក្សជាប់ទោស។
អ្នកនាំពាក្យគណបក្សប្រជាជនកម្ពុជាលោក សួស យ៉ារ៉ា មានប្រសាសន៍ថា លោកមិនចាប់អារម្មណ៍នឹងការលើកឡើងរបស់លោក សួង សុភ័ណ្ឌ នោះទេ ដោយលោកថា អ្នកដែលចង់ប្រឆំាងនឹងច្បាប់ ជាសិទ្ធិរបស់បុគ្គលនោះ។
លោកនិយាយថា «ចាប់មនុស្ស មិនមែនគេចេះតែចាប់ទេ គេចាប់ពឹងលើច្បាប់ ដូច្នេះអ្វីដែលគេបន្តធ្វើ ដើម្បីប្រឆំាងនឹងច្បាប់ជារឿងរបស់គេ ចំណុចនេះគឺខ្ញុំមិនមានយោបល់អ្វីទំាងអស់»។
លោក សួន សេរីរដ្ឋា ត្រូវបានតុលាការផ្ដន្ទាទោសដាក់ពន្ធនាគារ៥ឆ្នាំ ព្រមទាំងពិន័យជាប្រាក់ ១០លានរៀល កាលពីថ្ងៃទី២៥ខែសីហានេះ ពាក់ព័ន្ធសំណុំរឿងបញ្ចេញមតិលើហ្វេសប៊ុកប្រមាថកងទ័ពកម្ពុជា ជុំវិញជម្លោះព្រំដែនជាមួយឡាវ។ ប៉ុន្តែការសម្រេចនេះ ត្រូវបានភរិយា និងមេធាវីលោក សួន សេរីរដ្ឋា លើកឡើងថា ជារឿងអយុត្តិធម៌ ដោយពុំមានធាតុផ្សំគ្រប់គ្រាន់ដាក់បន្ទុកកូនក្តីលោកនោះទេ៕
