អង្គការសង្គមស៊ីវិលលើកឡើងថា ពួកគេមានការព្រួយបារម្ភចំពោះការរៀបចំនិងអនុវត្ត ទិសដៅអភិវឌ្ឍប្រកបដោយចីរភាពរបស់រដ្ឋាភិបាលកម្ពុជា ដោយថាការប្រតិបត្តិនៅមានភាពយឺតយ៉ាវ និងខ្វះការចូលរួមពីសង្គមស៊ីវិល។
នៅក្នុងសិក្ខាសាលាពិគ្រោះយោបល់អំពី «ទស្សនៈវិស័យចំពោះអង្គការសង្គមស៊ីវិល ទៅលើគោលដៅអភិវឌ្ឍន៍ប្រកបដោយចីរភាពរបស់កម្ពុជា» នៅព្រឹកថ្ងៃទី២៩ សីហានេះ តំណាងអង្គការសង្គមស៊ីវិលបានបង្ហាញការព្រួយបារម្ភចំពោះទិសដៅអភិវឌ្ឍបន្តរបស់ប្រទេសកម្ពុជា ព្រោះថានៅមានចំណុចខ្វះខាតនៅឡើយ។
នាយិកាប្រតិបត្តិអង្គការ សីលការ លោកស្រី ធីតា ឃិះ បានលើកឡើងនៅក្នុងសិក្ខាសាលានោះថា លោកស្រីមានការព្រួយបារម្ភចំពោះការអនុវត្តផែនការគោលដៅអភិវឌ្ឍន៍ប្រកបដោយចីរភាពរបស់កម្ពុជានេះ ដោយថាអាចនឹងជួបប្រទះនឹងឧបសគ្គច្រើន។ លោកស្រីក៏មានប្រសាសន៍បន្ថែមថា ផែនការនេះត្រូវបានពន្យារជាបន្តបន្ទាប់។
លោកស្រីមានប្រសាសន៍ថា៖ «ខ្ញុំយល់ថា ការយល់ដឺងទៅលើរឿងការធ្វើសូចនាករ និងការរៀបចំឲ្យមានសូចនាករ និងទិសដៅមួយៗនៅមានភាពរអាក់រអួលនៅឡើយ ការយល់ដឹង និងការរៀបចំសូចនាករនៅមានបញ្ហាច្រើន ដែលធ្វើឲ្យផែនការមានភាពយឺតយ៉ាវ ដែលផែនការដែលត្រូវចេញតាំងពីខែប្រាំពីរ ហើយឥឡូវខែប្រាំបីមិនទាន់បាន ហើយគេលើកទៅខែ១២ទៀត»។
គោលដៅអភិវឌ្ឍន៍ប្រកបដោយចីរភាព គឺជាគោលដៅផែនការរយៈពេល១៥ឆ្នាំ (២០១៥- ២០៣០) ដែលមានចំនួន១៧ចំណុច ត្រូវបានបង្កើតឡើងដោយអង្គការសហប្រជាជាតិកាលពីឆ្នាំ២០១៥។ គោលដៅអភិវឌ្ឍនេះមានគោលបំណងលើកស្ទួយដល់ការអភិវឌ្ឍរបស់បណ្តាប្រទេសជាសមាជិករបស់អង្គការនេះ។
ពាក់ព័ន្ធគោលការអភិវឌ្ឍនេះ លោកស្រី ធីតា ឃិះ បានបញ្ចេញទស្សនៈថា ក្នុងចំណោមគោលការណ៍អភិវឌ្ឍន៍ទាំងអស់ ចំណុចសំខាន់ដែលកម្ពុជាគួរដោះស្រាយមានដូចជា ការកាត់បន្ថយភាពក្រីក្រ បញ្ហាសុខភាពមាតានិងកុមារ វិស័យអប់រំ វិសមភាពយេនឌ័រ បរិស្ថាន និង អភិបាលកិច្ច។
ថ្លែងនៅក្នុងពីធីនោះ នាយកប្រតិបត្តិ វេទិកានៃអង្គការមិនមែនរដ្ឋាភិបាលស្តីពីកម្ពុជា (NGOForum) លោក តឹក វណ្ណារ៉ា លើកឡើងថា គម្រោងនេះអាចអភិវឌ្ឍទៅបានមុនឆ្នាំ២០៣០អាស្រ័យថា កម្ពុជាមានការអភិវឌ្ឍផ្នែកសេដ្ឋកិច្ច សង្គម បរិស្ថាន និងមានការចូលរួមពីគ្រប់ភាគីពាក់ព័ន្ធទាំងអស់។
លោកថា៖ «អាស្រ័យលើកត្តាកំណើនសេដ្ឋកិច្ច ការអភិវឌ្ឍសង្គម និងការការពារបរិស្ថាន សុខុមាលភាពប្រជាជន ហើយមួយទៀត ថាធនធានជាតិរបស់យើងដែលមាន ក្នុងការប្រតិបត្តិការរបស់រដ្ឋក្នុងឆ្នាំនីមួយៗ ស្ថេរភាពសេដ្ឋកិច្ច សន្តិភាព និងការចូលរួមពីប្រជាជន ហើយសំខាន់ត្រូវមានការចូលរួមពីភាគីពាក់ព័ន្ធទាំងអស់»។
គោលការណ៍អភិវឌ្ឍប្រកបដោយចីរភាពរបស់អង្គការសហប្រជាជាតិ មានចំនួន១៧ចំណុច តែកម្ពុជាបានបន្ថែមគោលការណ៍ចំនួន១ទៀតទៅលើគោលការណ៍១៧នោះ គឺការបោសសម្អាតមីន។ គោលការណ៍អភិវឌ្ឍប្រកបដោយចីរភាពរបស់កម្ពុជា មានដូចជា ការបញ្ចប់ភាពក្រីក្រ លើកកម្ពស់វិស័យកសិកម្ម ការលើកកម្ពស់សុខភាព ពង្រឹងវិស័យអប់រំ បំបាត់ការរើសអើងភេទ ការធានានូវទឹកស្អាតសម្រាប់ប្រជាជនប្រើប្រាស់ ការលើកកម្ពស់កំណើនសេដ្ឋកិច្ច ការកសាងហេដ្ឋារចនាសម្ព័ន្ធ ធ្វើឲ្យមានភាពស្មើគ្នារវាងប្រជាជន សុវត្ថិភាពទីក្រុង សេ្ថរភាពនៃការប្រើប្រាស់ផលិតផល ការប្រឆាំងនឹងការប្រែប្រួលអាកាសធាតុ អភិរក្សធនធានក្នុងសមុទ្រ ការទប់ស្កាត់ទៅនឹងការបាត់បង់ជីវៈចម្រុះ យុត្តិធម៌សង្គម ពង្រឹងភាពជាដៃគូសម្រាប់ការអភិវឌ្ឍ និងការបោសសម្អាតមីន៕
រាយការណ៍បន្ថែមដោយ កញ្ញា ថាញ់ ចន្ទសុធារី
