ក្រុមជនជាតិដើមភាគតិចដែលរងគ្រោះពីការសង់ទំនប់វារីអគ្គិសនីនៅខេត្តស្ទឹងត្រែង បានរិះគន់មន្ដ្រីខុទ្ទកាល័យនាយករដ្ឋមន្ដ្រី ថាប្រើពាក្យសម្ដីមិនសមរម្យ ខណៈពួកគាត់ស្វែងរកកិច្ចអន្ដរាគមពីលោកនាយករដ្ឋមន្ដ្រី។
កាលពីថ្ងៃទី២៩ខែសីហាម្សិលមិញ ក្រុមជនជាតិដើមភាគតិចប្រមាណជិត២០នាក់ មកពីឃុំក្បាលរមាស និងឃុំស្រែគរ ក្នុងស្រុកសេសាន ខេត្តស្ទឹងត្រែង បានប្រមូលផ្ដុំគ្នា ដាក់ញត្តិនៅខុទ្ទកាល័យនាយករដ្ឋមន្រ្តី ដើម្បីសុំឲ្យរដ្ឋាភិបាលដំណើរការសេវាសាធារណៈឡើងវិញ និងបញ្ឈប់ការប្រើកំលាំងប្រដាប់អាវុធគំរាមកំហែងលើពួកគាត់។
ប៉ុន្ដែនៅពេលស្នើដាក់ញត្តិនោះ មន្ដ្រីខុទ្ទកាល័យនាយករដ្ឋមន្រ្តី ហ៊ុន សែន លោក គង់ ចំរើន បានប្រាប់ឲ្យក្រុមប្រជាពលរដ្ឋរៀនប្រើពាក្យសម្ដីសមរម្យដោយប្ដូរពីការហៅឈ្មោះ «នាយករដ្ឋមន្ដ្រី ហ៊ុន សែន» ទៅជា «សម្ដេចតេជោនាយករដ្ឋមន្ដ្រី» វិញ ដោយពន្យល់ថា ជាពាក្យរបស់ព្រះមហាក្សត្រ។
បន្ទាប់មកស្ត្រីម្នាក់ជាជនជាតិដើមនិយាយថា មិនចេះនិយាយ ហើយលោក គង់ ចំរើន ក៏បានថ្លែងថា អ្នកមានញត្តិឲ្យយកទៅដាក់ ហើយបើមិនមាន ឲ្យត្រឡប់ទៅវិញ។ លោកថ្លែងថា៖ «មានទេ មោះអ្នកណាកាន់ញត្តិ? អ្នកណាកាន់ឯកសារ? បើអត់មានទេ អញ្ជើញត្រឡប់ទៅវិញ!»។
បុរសម្នាក់ដែលចូលរួមដាក់ញត្តិឆ្លើយតបឡើង៖ «បងអើយ ខ្ញុំមកនេះ ឆ្លងកាត់ខេត្តពីរ ខេត្តបី ទម្រាំមកដល់ កុំនិយាយអញ្ចឹង!» លោក គង់ ចំរើន តបថា «ខ្ញុំអត់មានថា លោកឯងនិយាយថាម៉េចទេ! គ្រាន់តែថា បើមានញត្តិដាក់មក បើមិនមានត្រឡប់ទៅវិញ!»។
ក្រុមជនជាតិដើមភាគតិចបានឆ្លើយតបវិញថា ពួកគាត់ជាពលរដ្ឋសាមញ្ញ មិនបានរៀនសូត្រ និងថាមកទីក្រុងភ្នំពេញនេះ គឺគ្រាន់ដើម្បីសុំឲ្យតំណាងរាស្ដ្រពួកគាត់ ជាពិសេសលោកនាយករដ្ឋមន្ដ្រី ហ៊ុន សែន ជួយអន្ដរាគមន៍ដោះស្រាយបញ្ហាប៉ុណ្ណោះ។ ពួកគាត់រិះគន់លោក គង់ ចំរើន ថាប្រើសម្តីខ្លាំង ទឹកមុខកាចដាក់ពួកគាត់ដែលកំពុងមានបញ្ហាស្វែងរកដំណាងឲ្យដោះស្រាយ។
ក្រុមពលរដ្ឋឲ្យដឹងថា គម្រោងទំនប់វារីអគ្គិសនីសេសានក្រោម២ បានធ្វើឲ្យប៉ះពាល់ដល់ភូមិចំនួន៦ ក្នុងឃុំចំនួន២ ក្នុងស្រុកសេសាន ខេត្តស្ទឹងត្រែង ដែលមានពលរដ្ឋចំនួន៨៤៦គ្រួសារ កំពុងរស់នៅ។ ប៉ុន្ដែរហូតមកដល់ពេលនេះ អ្នកដែលរងផលប៉ះពាល់បានសម្រេចទទួលយកសំណងប្រមាណ៨៧ភាគរយ ខណៈ១២៦គ្រួសារកំពុងរង់ចាំដំណោះស្រាយ៕
