កូរ៉េខាងជើង​នឹងបាញ់មីស៊ីលច្រើនគ្រាប់ទៀតរំលងប្រទេសជប៉ុន

កូរ៉េខាងជើងបានអះអាងថា ការបាញ់មីស៊ីលរំលងប្រទេសជប៉ុនកាលពីម្សិលមិញនោះ វាគ្រាន់តែជាដំណាក់កាលដំបូងនៃប្រតិបត្តិការនៅតំបន់មហាសមុទ្រប៉ាស៊ីហ្វិកតែប៉ុណ្ណោះ ហើយថានឹងមានការបាញ់សាកល្បងជាច្រើនគ្រាប់បន្ថែមទៀត។

ប្រព័ន្ធផ្សព្វផ្សាយរបស់សហរដ្ឋអាមេរិក​បានចុះផ្សាយថា កូរ៉េខាងជើង​កំពុងគំរាមកំហែងដល់កោះហ្គាមរបស់អាមេរិក​នៅក្នុងសមុទ្រប៉ាស៊ីហ្វិក​ ដែលថានេះជាការបង្កជម្លោះធ្វើឲ្យរាលដាល។​

កាលពីថ្ងៃអង្គារម្សិលមិញ កូរ៉េខាងជើង​បានបាញ់មីស៊ីលរំលងប្រទេសជប៉ុន ត្រង់កោះ Hokkaido ហើយឆ្លងទៅធ្លាក់នៅក្នុងសមុទ្រ។​

ក្រុមប្រឹក្សាសន្តិសុខអង្គការសហប្រជាជាតិ បានយល់ព្រម​ជា​ឯកច្ឆន្ទហើយថ្កោលទោស សកម្មភាពរបស់កូរ៉េខាងជើង​ ចំពោះការបាញ់​មីស៊ីលនេះ។ នៅក្នុងកិច្ចប្រជុំនៅទីក្រុង New York សហរដ្ឋអាមេរិក កាលពីល្ងាចថ្ងៃអង្គារម្សិលមិញ ក្រុមប្រឹក្សាសន្តិសុខអង្គការសហប្រជាជាតិ​បានចាត់ទុកថា សកម្មភាពរបស់កូរ៉េខាងជើង​ជាការបង្កជម្លោះដែលមិនអាចទទួលយកបាន ហើយទាមទារឲ្យកូរ៉េខាងជើង​បញ្ឈប់សកម្មភាពនេះ។​

ទោះយ៉ាងណា នៅក្នុងសេចក្តីថ្លែងការណ៍ក្រុមប្រឹក្សាសន្តិសុខអង្គការសហប្រជាជាតិ មិនបានបញ្ជាក់ថា នឹងមានការដាក់ទណ្ឌកម្មថ្មីបន្ថែមលើកូរ៉េខាងជើងនោះទេ។​

ទោះយ៉ាងណាកូរ៉េខាងជើង​បញ្ជាក់ថា នឹងមានការបាញ់មីស៊ីលច្រើនបន្ថែមទៀត បើទោះជា មានការហាមឃាត់ពីអង្គការសហប្រជាជាតិក៏ដោយ។​

មីស៊ីលដែលកូរ៉េខាងជើង​បាញ់កាលពីម្សិលមិញ​ប្រភេទ Hwasong-12 បាញ់នៅព្រឹកប្រលឹម ចេញពីតំបន់នៅក្បែរទីក្រុងព្យុងយ៉ាង។ មីស៊ីលនោះមានលទ្ធភាពហោះបាន ២៧០០០ គីឡូម៉ែត្រ ហើយធ្លាក់នៅចម្ងាយ១ ១៨០គីឡូម៉ែត្រ ឆ្នេរភាគខាងកើតរបស់ជប៉ុន៕