សារព័ត៌មានឯករាជ្យ ជាភាសាអង់គ្លេស The Cambodia Daily ថាខ្លួននៅមិនទាន់មានដំណោះស្រាយសមស្រប សម្រាប់ការបង់ពន្ធនៅឡើយ ហើយសព្វថ្ងៃកំពុងតែប្រឈមនឹងការបិទដំណើរការ ខណៈរដ្ឋាភិបាលដាក់កំហិតត្រឹមថ្ងៃទី៤ ខែកញ្ញា ឆ្នាំ២០១៧។
ក្នុងសារអេឡិចត្រូនិចឆ្លើយតបនឹងសំណួររបស់ VOD និពន្ធនាយករបស់សារព័ត៌មាន The Cambodia Daily ប្រចាំកម្ពុជា លោកស្រី ចូឌី ដេជុន បានប្រាប់វីអូឌីនៅថ្ងៃនេះថា ស្ថាប័ននេះនឹងខំប្រឹងចរចាជាមួយរដ្ឋាភិបាលបន្តទៀត។ លោកស្រីមានប្រសាសន៍ថា៖ «សព្វថ្ងៃ The Cambodia Daily នៅមិនទាន់មានដំណោះស្រាយពិតប្រាកដមួយទេ ហើយក៏កំពុងតែប្រឈមមុខនឹងការបិទស្ថាប័ននៅពេលខាងមុខនេះ។ សារព័ត៌មាន The Cambodia Daily ត្រូវបានចោទប្រកាន់រឿងរ៉ាវពាក់ព័ន្ធការជំពាក់ពន្ធច្រើនមិនគួរឲ្យជឿ ដែលនេះមិនបានផ្អែកលើសវនកម្មច្បាស់លាស់ទេ។ ជាងនេះទៅទៀត ពាក់ព័ន្ធការទម្លាយឯកសាររបស់រដ្ឋាភិបាលទៅសារព័ត៌មាន Fresh News រដ្ឋាភិបាលមិនបានមានវិធានការណ៍តាមផ្លូវច្បាប់ ឬ ឆ្លងកាត់តុលាការទទួលយោបល់ពីសាធារណជន»។
សារព័ត៌មាន The Cambodia Daily ត្រូវបានរដ្ឋាភិបាលអះអាងថា បានជំពាក់ពន្ធរដ្ឋអស់រយៈពេល១០ឆ្នាំមកហើយ ដែលសរុបជាទឹកប្រាក់ប្រមាណ២ម៉ឺនលានរៀល ឬស្មើនឹង៦.៣លានដុល្លាអាមេរិក។
នៅពេលថ្មីៗនេះ ចាងហ្វាងស្ថាប័នសារព័ត៌មានដើមអំពិលដែលស្និទ្ធនឹងរដ្ឋាភិបាល លោក សយ សុភាព បានចេញមុខឲ្យយោបល់ទៅ The Cambodia Daily ថាឲ្យសរសេរលិខិតទៅលោក ហ៊ុន សែន ដើម្បីធ្វើការសម្របសម្រួល។
ឆ្លើយតបទៅនឹងបញ្ហានេះ លោកស្រី ចូឌី ដេជុន មានប្រសាសន៍ថា The Cambodia Daily បានសរសេរលិខិតទៅលោក ហ៊ុន សែន សុំការអន្តរាគមន៍ រួចទៅហើយកាលពីថ្ងៃទី២០ សីហាកន្លងទៅ ហើយការឆ្លើយតបរបស់លោក ហ៊ុន សែន គឺថាឲ្យសារព័ត៌មានមួយនេះទៅពិភាក្សាជាមួយអគ្គនាយកនៃអគ្គនាយកដ្ឋានពន្ធដារ លោក គង់ វិបុល កាលពីសបា្តហ៍កន្លងទៅរួចហើយដែរ។
ប៉ុន្តែកាលពីថ្ងៃទី២៩ ខែសីហា ក្រោយពីបានជួបជាមួយសារព័ត៌មាន The Cambodia Daily អគ្គនាយកដ្ឋានពន្ធដារ បានចេញសេចក្តីប្រកាសថា ក្រសួងមានតែអនុវត្តតាមផ្លូវច្បាប់ចំពោះអ្នកដែលមិនបានបង់ពន្ធ ដើម្បីឲ្យការប្រមូលពន្ធកាន់តែមានប្រសិទ្ធភាព តម្លាភាព និងសមភាព ហើយនេះក៏មិនមែនធ្វើតែលើ The Cambodia Daily តែមួយដែរ គឺធ្វើលើគ្រប់ស្ថាប័ន។
គួរបញ្ជាក់ថាចាប់តាំងពីរដ្ឋាភិបាលព្រមានបិទកាសែត The Cambodia Daily បើសិនជាមិនបង់ពន្ធនៅត្រឹមថ្ងៃទី៤ខែកញ្ញានោះ បុគ្គលិកទាំងអស់នាំគ្នាធ្វើយុទ្ធនាការសុំជំនួយតាមប្រព័ន្ធផ្សព្វផ្សាយសង្គម ដោយមានសរសេរស្លាក «Save the Daily» ឬ «សូមជួយសង្គ្រោះ The Cambodia Daily»៕
