អ្នកវិភាគនិងអ្នកឃ្លាំមើលសិទ្ធិមនុស្សលើកឡើងថា យុទ្ធនាការចេញញត្តិគាំទ្រចំណាត់ការចាប់ខ្លួនមេដឹកនាំបក្សប្រឆាំងលោក កឹម សុខា ថាជាការបន្ទរតាមគ្នា ដូចករណី សម្តេចសីហនុ ដែលត្រូវគេធ្វើរដ្ឋប្រហាចោទថា ក្បត់ជាតិដែរ។
កាលពីឆ្នាំ១៩៧០ របបលោក លន់ នុល បានធ្វើរដ្ឋប្រហារទម្លាក់ សម្តេចសីហនុ ចេញពីតំណែង ដោយចោទថា ព្រះអង្គមានទោស «ក្បត់ជាតិ»។
នៅប៉ុន្មានថ្ងៃនេះ ស្ថាប័នរដ្ឋ វិស័យឯកជន មេបញ្ជាការកងទ័ព និងសហព័ន្ធសហជីពជាដើម បានចេញញត្តិគាំទ្ររដ្ឋាភិបាល ដែលបានចាប់ខ្លួន លោក កឹម សុខា ចោទថាមានទោស «ក្បត់ជាតិ» និងស្នើឲ្យតុលាការផ្តន្ទាទោសមេបក្សប្រឆាំងនេះតាមច្បាប់។
អ្នកវិភាគនយោបាយ លោកបណ្ឌិត ឡៅ ម៉ុងហៃ លើកឡើងថា កាលពី លន់ នុល ធ្វើរដ្ឋប្រហា ទម្លាក់ សម្តេច ព្រះនរោត្តមសីហនុ ចេញពីអំណាច លោកថាពេលនោះ ក្រសួងមន្ទីរ និងមន្ត្រីរាជការ បានចេញញត្តិគាំទ្ររបបរដ្ឋប្រហារនោះ ហើយថ្កោលទោស សម្តេចព្រះនរោត្តមសីហនុ ថាក្បត់ជាតិ ដូចករណីញត្តិគាំទ្រការចាប់ខ្លួនលោក កឹម សុខា ពេលនេះដែរ។
លោកថា៖ «កាលពីទម្លាក់ សម្តេចសីហនុ មានញត្តិគាំទ្រ លន់ នុល ច្រើនណាស់ ថ្កោលទោស សម្តេចសីហនុ ថាជាជនក្បត់ជាតិអីអញ្ចឹងដែរ [ពេលហ្នឹង] មានក្រសួងជាច្រើន មន្ត្រីរាជការនានា ធ្វើញត្តិគាំទ្រការផ្តន្ទាទោស សម្តេចសីហនុ ថាក្បត់ជាតិ ស្រាប់តែមកដល់ពេលនេះមានរបៀបអញ្ចឹងដែរ ចោទថា កឹម សុខា នឹងបានឃុបឃិតជាមួយអាមេរិក ដើម្បីរំលំរដ្ឋាភិបាលថាក្បត់ជាតិ ចាប់ កឹម សុខា ទៅ»។
លោក ឡៅ ម៉ុងហៃ ពន្យល់ថា ការផ្ញើសារនយោបាយ ឬចេញញត្តិគាំទ្រចំណាត់ការណាមួយ ខណៈសំណុំរឿងដល់ដៃតុលាការហើយ លោកថារំលោភស្ថាប័នតុលាការ។
លោកថា៖ «តែកាលណាសំណុំរឿងដល់តុលាការហើយ អ្នកនយោបាយគេអត់កាត់សេចក្តីជំនួសតុលាការទេ និយាយឲ្យចំទៅ។ ហើយបើកាលណាយើងប្រកាសថា អ្នកនេះជាប់ចោទ អ្នកនោះមានទោសអីហ្នឹង គេថាយើងចេះជាងតុលាការ ឈ្លានពានទៅលើភារកិច្ចរបស់តុលាការ គេមានច្បាប់ដាក់ទណ្ឌកម្ម គេថាអាហ្នឹងប្រមាថតុលាការ»។
បើទោះបីជាមានញត្តិជាច្រើនគាំទ្ររដ្ឋាភិបាល ទៅលើចំណាត់ការចាប់ខ្លួន លោក កឹម សុខា ក៏ដោយ តែមហាអំណាចមានសហរដ្ឋអាមេរិកនិងសភាពអឺរុបជាដើម រួមទាំងអង្គការអន្តរជាតិធំៗបង្ហាញការព្រួយបារម្ភពីកម្តៅនយោបាយនៅកម្ពុជានេះ ខណៈចិនគាំទ្រចំណាត់នេះ។
នាយកប្រតិបត្តិមជ្ឈមណ្ឌលសម័ន្ធភាពការងារ និងសិទ្ធិមនុស្ស លោក មឿន តុលា លើកឡើងថា ញត្តិជាបន្តបន្ទាប់គាំទ្រចំណាត់ការរបស់រដ្ឋាភិបាលនេះ លោកថា មិនមែនជារឿងថ្មីនៅកម្ពុជាទេ។
ប៉ុន្តែលោក មឿន តុលា បង្ហាញការព្រួយបារម្ភថា វិស័យកាត់ដេរនឹងរងគ្រោះមុនគេ បើវិវាទរវាងកម្ពុជានិងប្រទេសមហាអំណាច មានសហរដ្ឋអាមេរិកនិងសហភាពអឺរុបកាន់តែតានតឹងនោះ។
លោកថា៖ «សហភាពអឺរុប គេបានបញ្ចាក់ច្បាស់ហើយថា ការចាប់ខ្លួនហ្នឹង រំលោភអភ័យឯកសិទ្ធិអ្នកតំណាងរាស្ត្រហើយ អាហ្នឹងជារឿងធ្ងន់ធ្ងរណាស់ ហើយសហរដ្ឋអាមេរិកក៏ចេញសេចក្តីថ្លែងការណ៍ថ្កោលទោសរឿងហ្នឹងដែរ។ អញ្ចឹងប្រទេសអឺរុបនិងអាមេរិក ជាទីផ្សារសំខាន់របស់កម្ពុជា គេចាប់ផ្តើមប្រតិកម្មគ្រប់គ្នា ដូច្នេះខ្ញុំគិតថា បើកម្ពុជាអត់ពិចារណា ខ្ញុំបារម្ភថា យើងខាតនៅថ្ងៃក្រោយ គឺខាតផ្នែកទំនិញនាំចេញផ្នែកសំលៀកបំពាក់ និងស្បែកជើងហ្នឹងឯង»។
ជាការកត់សម្គាល់ មកដល់ពេលនេះ ញត្តិគាំទ្ររដ្ឋាភិបាល ទៅលើការចាប់ខ្លួន លោក កឹម សុខា និងប្រតិកម្មថ្កោលទោសរដ្ឋាភិបាលកម្ពុជា ពីសំណាក់សហគមន៍អន្តរជាតិ បានបន្តកើតឡើងជាបន្តបន្ទាប់ ខណៈមិនទាន់មានពន្លឺចរចាផ្នែកនយោបាយនៅឡើយនោះ៕
