មន្ត្រីជាន់ខ្ពស់គណបក្សប្រឆំាងបានអះអាងថា មេដឹកនាំបក្សរបស់ខ្លួនមិនលាលែងពីតំណែងមុនតុលាការកាត់ទោសស្របតាមនីតិវិធីច្បាប់នោះទេ។
លោក កឹម សុខា ត្រូវបានចាប់ខ្លួនបញ្ជូនទៅពន្ធនាគារត្រពាំងថ្លុង ជាប់ព្រំដែនវៀតណាម ទាំងពាក់កណ្តាលយប់ថ្ងៃអាទិត្យចុងសប្តាហ៍មុន តាមបញ្ជារបស់លោក ហ៊ុន សែន ដោយចោទថា លោក កឹម សុខា ថាបានប្រព្រឹត្តអំពើ ក្បត់ជាតិ និងចារកម្មឃុបឃិតជាមួយបរទេស ផ្ដួលរំលំរដ្ឋាភិបាល។
សមាជិកគណបក្សសង្គ្រោះជាតិ ព្រះអង្គម្ចាស់ ស៊ីសុវត្ថិ ធម្មិកោ បានសរសេរលើហ្វេសប៊ុករបស់ទ្រង់ នៅថ្ងៃទី៥ខែកញ្ញានេះថា ប្រធានគណបក្សសង្គ្រោះជាតិលោក កឹម សុខា ធ្លាប់បានប្រាប់ព្រះអង្គថា លោកមិនរត់ចោលសមរភូមិ មុននឹងប្រយុទ្ធទេ ដរាបណាតុលាការមិនទាន់កាត់ទោសស្របតាមនីតិវិធីច្បាប់។
លោកនិយាយថា៖ «លោកប្រធាន កឹម សុខា បានប្រាប់ខ្ញុំថា “ខ្ញុំមិនដែលចោលសមរភូមិ មុននឹងប្រយុទ្ធទេ” នេះមានន័យថា ដាច់ខាតលោកនឹងមិនលាលែងពីប្រធានសង្គ្រោះជាតិ មុននឹងគេបានកាត់ទោសលោក ស្របតាមនីតិវិធីច្បាប់»។
ទោះជាយ៉ាងណា VOD មិនអាចសុំការបំភ្លឺបន្ថែមលើករណីនេះ ពីមន្ត្រីជាន់ខ្ពស់គណបក្សសង្គ្រោះជាតិបានទេ នៅថ្ងៃនេះ។
នៅថ្ងៃទី៥ខែកញ្ញានេះ អយ្យការអមសាលាដំបូងរាជធានីភ្នំពេញបានចេញសេចក្តីថ្លែងការណ៍មួយ ដោយបានសម្រេចចោទប្រកាន់លោក កឹម សុខា តាមបញ្ញាត្តិនៃមាត្រា៤៤៣ ពីបទសន្និដ្ឋិភាពជាមួយបរទេស ដោយតុលាការចាត់ទុកថាទំនាក់ទំនងរបស់ លោក កឹម សុខា ជាមួយបរទេសនេះថាជាទំនាក់ទំនងដែលក្បត់ជាតិកម្ពុជា។
បើរកឃើញកំហុសពិតមែនតាមក្រមព្រហ្មទណ្ឌកម្ពុជា លោក កឹម សុខា អាចប្រឈមនឹងទោសដាក់ពន្ធនាគារពី១៥ឆ្នាំ ទៅ៣០ឆ្នាំ។
ប៉ុន្តែសង្គមស៊ីវិលជាតិ និងសហគមន៍អន្តរជាតិ រួមទំាងគណបក្សប្រឆំាង បានចេញសេចក្តីថ្លែងការណ៍ជាបន្តបន្ទាប់ ថ្កោលទោសចំពោះវិធានការរបស់រដ្ឋាភិបាលក្នុងការចាប់ខ្លួនមេបក្សប្រឆំាងរូបនោះ ដោយថា ធ្វើឡើងដោយគ្មានដីកាពីតុលាការ និងរំលោភបំពានលើអភ័យឯកសិទ្ធិសភា ដែលត្រូវបានធានាដោយរដ្ឋធម្មនុញ្ញ។
បើតាមខ្លឹមសារច្បាប់គណបក្សនយោបាយ ដែលបានស្នើកែប្រែជាលើកទី២ ដោយលោក ហ៊ុន សែន កំណត់ថា គណបក្សនឹងត្រូវគេរំលាយ ប្រសិនបើប្រធាន អនុប្រធាន ឬសមាជិកគណៈកម្មាធិការនាយក ជាទណ្ឌិត ឬបានប្រព្រឹត្តល្មើសច្បាប់ធ្ងន់ធ្ងរ៕
