អាមេរិកបានជំរុញទៅក្រុមប្រឹក្សាសន្តិសុខអង្គការសហប្រជាជាតិនៅថ្ងៃនេះ ឲ្យដាក់វិធានការខ្លាំងក្លាបំផុតទៅលើកូរ៉េខាងជើង ជាការឆ្លើយតបទៅនឹងការធ្វើតេស្តសាកល្បងគ្រាប់បែកនុយក្លេអ៊ែរលើកទី៦ ប៉ុន្តែ ប្រទេសចិន និងរុស្ស៊ី បានលើកឡើងថា គេត្រូវជជែកគ្នាតាមវិធីកាទូតដើម្បីដោះស្រាយបញ្ហានេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
អគ្គរដ្ឋទូតអាមេរិកប្រចាំអង្គការសហប្រជាជាតិ អ្នកស្រី Nikki Haley បាននិយាយថា ក្រុងវ៉ាស៊ីងតោននឹងដាក់សំណើទណ្ឌកម្មថ្មីមួយទៀតទៅក្រុមប្រឹក្សាសន្តិសុខអង្គការសហប្រជាជាតិ ដែលនឹងត្រូវគេយកទៅជជែកនៅប៉ុន្មានថ្ងៃខាងមុខ មុននឹងមានការបោះឆ្នោតនៅថ្ងៃចន្ទសប្ដាហ៍ក្រោយ។
អាមេរិក អង់គ្លេស បារាំង ជប៉ុន និងកូរ៉េខាងត្បូង បានកោះប្រជុំជាបន្ទាន់មួយកាលពីថ្ងៃម្សិលមិញនេះ។ ក្នុងកិច្ចប្រជុំនោះ អ្នកស្រី Haley បានថ្លែងថា មានតែទណ្ឌកម្មខ្លាំងក្លាបំផុតទេ ទើបអាចដោះស្រាយបញ្ហានេះបានតាមរយៈមធ្យោបាយកាទូត។
កូរ៉េខាងជើង បានបង្កក្ដីបារម្ភយ៉ាងខ្លាំងកាលពីថ្ងៃអាទិត្យកន្លងមកនេះ បន្ទាប់ពីរដ្ឋឯកោមួយនេះ បានបំផ្ទុះគ្រាប់បែកនុយក្លេអ៊ែរសាកល្បង ដែលគ្រាប់បែកនោះ ត្រូវបានគេជឿថា ជាគ្រាប់បែកអ៊ីដ្រូសែន ត្រូវបានផលិតឡើងសម្រាប់បំពាក់លើគ្រាប់មីស៊ីល៕
