ស្នងការនគរបាលរាជធានីភ្នំពេញ បានចេញបំរាម ហាមឃាត់ការបើកបរយានជំនិះកែច្នៃគ្រប់ប្រភេទ ដែលថា បង្កឲ្យមានសំឡេងរំខាន និងប៉ះពាល់សណ្ដាប់ធ្នាប់សាធារណៈ។
ក្នុងសេចក្ដីជូនដំណឹង ចុះថ្ងៃទី៦ខែកញ្ញាឆ្នាំ២០១៧ ស្នងការនគរបាលរាជធានីភ្នំពេញ លោក ជួន សុវណ្ណ បានប្រកាសហាមឃាត់មិនឲ្យពលរដ្ឋ ដែលនិយមប្រើប្រាស់យានយន្ដ ឬយានជំនិះកែច្នៃខុសបច្ចេកទេស ដែលនាំឲ្យមានផ្សែង និងសំឡេងខ្លាំង រំខានដល់អ្នកដទៃ អ្នករស់នៅជាប់ដងផ្លូវ បង្កផលប៉ះពាល់បរិស្ថាន និងសុខភាពប្រជាពលរដ្ឋ។
ស្នងការនគរបាលរាជធានីភ្នំពេញថា នឹងចាត់វិធានការម៉ឺងម៉ាត់ លើករណីប្រើប្រាស់យានយន្ដខុសស្ដង់ដា និងល្មើសនឹងច្បាប់ចរាចរណ៍ផ្លូវគោក ត្រង់ជំពូកទី៩ មាត្រា៦៦ ដែលកំណត់ថា «មន្ដ្រីនគរបាលចរាចរណ៍ផ្លូវគោក ត្រូវឃាត់យានជំនិះមិនឲ្យធ្វើចរាចរណ៍ ឬ ឃាត់ទុកយានជំនិះរយៈពេលមិនលើសពី៣ថ្ងៃ ដើម្បីផាកពិន័យ និងកែតម្រូវ…»។
ស្នងការនគរបាលរាជធានីភ្នំពេញសង្ឃឹមថា ពលរដ្ឋនឹងចូលរួមអនុវត្តសេចក្ដីជូនដំណឹងនេះ ដោយថា ដើម្បីរក្សាសណ្ដាប់ធ្នាប់សង្គម បរិស្ថាន និងសោភ័ណ្ឌភាពទីក្រុងភ្នំពេញ៕
