កម្លាំងសន្តិសុខចម្រុះរាប់រយនាក់ត្រូវបានដាក់ពង្រាយនៅឯពន្ធនាគារត្រពាំងផ្លុង ស្ថិតក្នុងខេត្តត្បូងឃ្មុំ នៅព្រឹកថ្ងៃនេះ ខណៈដែលក្រុមតំណាងរាស្ត្របក្សប្រឆាំង ធ្វើដំណើរទៅសួរសុខទុក្ខមេដឹកនាំរបស់ពួកគេ ដែលត្រូវបានចាប់ដាក់ឃុំនៅទីនោះ។
ផ្សាយបន្តផ្ទាល់ពីពន្ធនាគារត្រពាំងផ្លុង នៅព្រឹកថ្ងៃនេះ ទំព័រហ្វេសប៊ុករបស់អនុប្រធានគណបក្សសង្គ្រោះជាតិ អ្នកស្រី មួរ សុខហួរ បានបង្ហាញក្រុមតំណាងរាស្ត្រគណបក្សសង្គ្រោះជាតិ ធ្វើដំណើរចូលទៅពន្ធនាគារត្រពាំងផ្លុង។
វីដេអូនោះ បង្ហាញកម្លាំងសន្តិសុខចម្រុះមានទាំងនគរបាល កងរាជអាវុធហត្ថ និងយោធាផងដែរ ត្រូវបានដាក់ពង្រាយនៅបរិវេណពន្ធនាគារនោះ រួមទាំងសម្ភារៈ និងឧបករណ៍ប្រឆាំងបាតុកម្មផងដែរ។
ស្នងការនគរបាលខេត្តត្បូងឃ្មុំ ត្រូវបានសារព័ត៌មាន Fresh News ដកស្រង់សម្ដីចុះផ្សាយថា កម្លាំងចម្រុះជិត ៦០០នាក់ ត្រូវបានដាក់ពង្រាយនៅបរិវេណនោះ។
មេបក្សប្រឆាំង លោក កឹម សុខា ត្រូវបានសមត្ថកិច្ចចាប់ខ្លួន និងបញ្ជូនទៅឃុំខ្លួននៅពន្ធនាគារត្រពាំងផ្លុង ស្ថិតនៅជាប់ព្រំដែនវៀតណាម ក្រោមការចោទប្រកាន់ពីរដ្ឋាភិបាលថា «ក្បត់ជាតិ» ជុំវិញការថ្លែងរបស់លោក កឹម សុខា កាលពីឆ្នាំ២០១៣ថា លោកទទួលបានការគាំទ្រពីអាមេរិក៕
