ក្រុមតំណាងរាស្ត្របក្សកាន់អំណាច នៅព្រឹកនេះ បានសម្រេចបើកផ្លូវឲ្យតុលាការចាត់ការលើមេដឹកនាំបក្សប្រឆាំង លោក កឹម សុខា ហើយនៅព្រឹកថ្ងៃនេះ ទាំងមិនមានវត្តមានរបស់ក្រុមតំណាងរាស្ត្របក្សប្រឆាំងនោះឡើយ។
លោក កឹម សុខា ត្រូវបានសាលាដំបូងរាជធានីភ្នំពេញ សម្រេចចោទប្រកាន់ពីបទសន្និដ្ឋិភាពជាមួយបរទេស ដោយថានេះ ជាទោសក្បត់ជាតិ ខណៈលោក កឹម សុខា កំពុងជាប់ឃុំបណ្តោះអាសន្ននៅពន្ធនាគារត្រពាំងថ្លុង ខេត្តត្បូងឃ្មុំ ជាប់ព្រំដែនវៀតណាម។
ក្នុងអង្គប្រជុំវិសមញ្ញនៅថ្ងៃទី១១ខែកញ្ញា ប្រធានរដ្ឋសភាលោក ហេង សំរិន បានប្រកាសឲ្យតុលាការបន្តនីតិវិធី លើសំណុំរឿងមេដឹកនាំគណបក្សសង្គ្រោះជាតិ លោក កឹម សុខា ដោយសំឡេងគំាទ្ររបស់រាស្ត្របក្សកាន់អំណាច ចំនួន៦៧រូប ខណៈការប្រជុំនោះ ពុំមានវត្តមានបក្សប្រឆំាងចូលរួមប្រជុំនោះទេ។
អគ្គលេខាធិការរដ្ឋសភាលោក ឡេង ប៉េងឡុង បានពន្យល់បន្ថែមថា ការប្រជុំសភានៅព្រឹកនេះ បើទោះជាពុំមានវត្តមានតំណាងរាស្ត្រគណបក្សប្រឆំាងចូលរួម ក៏សភាអាចប្រជុំបាន ស្របតាមរដ្ឋធម្មនុញ្ញដែរ ដោយថា សភាយកប្រការ៤១ថ្មី នៃបទបញ្ជាផ្ទៃក្នុងនៃរដ្ឋភា មកអនុវត្ត។ ករណីនេះ លោកថា តុលាការអាចបន្តនីតិវិធីលើលោក កឹម សុខា ដើម្បីចាត់វិធានការច្បាប់។
លោកមានប្រសាសន៍ថា៖ «២ភាគ៣ សម្រាប់ប្រជុំដកអភ័យឯកសិទ្ធិ ដើម្បីប្រជុំសម្រេចយើងយោងប្រការ៤១ថ្មី នៃបទបញ្ជាផ្ទៃក្នុង ប្រការ៤១ថ្មី ការអនុម័តទំាងឡាយណា ត្រូវយកមតិភាគច្រើន ដែលមានកំណត់នៅក្នុងរដ្ឋធម្មនុញ្ញ ក្រៅពីនេះ មតិភាគច្រើន ដាច់ខាតនៃចំនួនសមាជិកសភាទំាងមូល ត្រូវទុកជាបានការ វាលែងតែមានការកំណត់ក្នុងច្បាប់ដោយឡែក។ រដ្ឋធម្មនុញ្ញ កំណត់តែពីរទេ មាត្រា៨៨ នៃរដ្ឋធម្មនុញ្ញ គេនិយាយកូរ៉ុមតែពីរទេ គឺកូរ៉ូម២ភាគ៣ សម្រាប់ដកអភ័យឯកសិទ្ធិ កូរ៉ុមលើសពីពាក់កណ្តាល ចំពោះការសម្រេច វាទាមទារឲ្យការអនុម័យ ៥០បូក១ អញ្ចឹងបានយើងយកវាក្យខ័ណ្ឌទី២ នៃប្រការ៤១នេះ ក្រៅពីនេះមតិភាគច្រើនដាច់ខាតនៃសមាជិករដ្ឋសភាទំាងមូលត្រូវទុកជាបានការ វាលែងតែមានការកំណត់ក្នុងច្បាប់ដោយឡែក យើងយកកូរ៉ុម៥០បូក១នេះមកបញ្ចូល ដើម្បីសម្រេច»។
ភ្លាមៗ VOD មិនអាចសុំប្រតិកម្ម ពីតំណាងរាស្ត្រគណបក្សសង្គ្រោះជាតិបានទេ។
តំណាងរាស្រ្តគណបក្សប្រឆាំង លោក សុន ឆ័យ បានឲ្យដឹងកាលពីថ្ងៃ១០ខែកញ្ញាថា ការអនុម័តក្នុងអង្គប្រជុំនោះ នឹងខុសច្បាប់ និងរំលោភរដ្ឋធម្មនុញ្ញមាត្រា៨០ ដោយលោកថា គណបក្សកាន់អំណាច មិនមានសំឡេងគាំទ្រ២ភាគ៣ ក្នុងការសម្រេចព្យួរអភ័យឯកសិទ្ធិ ឬមានសំឡេង៣ភាគ៤ នៃសមាជិករដ្ឋសភា ក្នុងការគាំទ្រឲ្យតុលាការ ចាត់ការលើករណី លោក កឹម សុខា។
ចំពោះ លោកមេធាវី សុក សំអឿន ហាក់ស្ទាក់ស្ទើក្នុងការពន្យល់ពាក់ព័ន្ធនិងសភាសម្រេចបន្តនីតិវិធីរបស់តុលាការលើរឿងលោក កឹម សុខា ដោយលោកថា ច្បាប់កម្ពុជានៅចន្លោះប្រហោងពាក់ព័ន្ធអភ័យឯកសិទ្ធិរបស់តំណាងរាស្ត្រ។
លោកនិយាយថា៖ «រដ្ឋធម្មនុញ្ញ បានកំណត់ថា បើចង់ផ្អាក [នីតិវិធី]ត្រូវការសំឡេង៣ភាគ៤ ដូច្នេះផ្អាកអត់កើតផង ដកអភ័យឯកសិទ្ធិ អត់កើតទៀត មានតែតុលាការដំណើរការទៅមុខ ទាល់តែមានស្ថាប័នណាមួយ សម្រេចថា អត់ទៅមុខកើត ទេ ព្រោះអត់ទាន់បានដកអភ័យឯសិទ្ធិកើតផង ដូច្នេះរដ្ឋធម្មនុញ្ញត្រង់ហ្នឹង ត្រូវកែឲ្យបានច្បាស់លាស់ បានអត់មានបញ្ហាដូច សព្វថ្ងៃ»។
មាត្រា៨០ នៃរដ្ឋធម្មនុញ្ញមានខ្លឹមសារថា ការចោទប្រកាន់ ចាប់ខ្លួន ឃាត់ខ្លួន ឬឃុំខ្លួនសមាជិកសភាណាមួយ នៃរដ្ឋសភានឹងអាចធ្វើទៅកើត លុះត្រាតែមានការយល់ព្រមពីរដ្ឋសភា ឬពីគណៈកម្មាធិការអចិន្ត្រៃយ៍រដ្ឋសភា វៀវលែងតែក្នុងករណីបទល្មើសព្រហ្មទណ្ឌជាក់ស្តែង។ ករណីនេះ ស្ថាប័នមានសមត្ថកិច្ច ត្រូវរាយការណ៍ជូនរដ្ឋសភា ឬគណៈកម្មាធិការអចិន្ត្រៃយ៍របស់សភាជាបន្ទាន់ ដើម្បីសម្រេច។ ការសម្រេចនេះ ត្រូវមានការយល់ព្រមពីមតិភាគច្រើន២ភាគ៣ នៃសមាជិកសភាទំាងមូល។
មាត្រាដដែលបញ្ជាក់ថា ចំណែក ការឃុំខ្លួន ការចោទប្រកាន់តំណាងរាស្ត្រណាមួយ ត្រូវផ្អាក ប្រសិនបើរដ្ឋសភាបានបញ្ចេញមតិឲ្យផ្អាកតាមមតិភាគច្រើន៣ភាគ៤ នៃចំនួនសមាជិកសភាទំាងមូល។
លោក កឹម សុខា ត្រូវបានចាប់ខ្លួន ទាំងកណ្តាលយប់ដោយគ្មានដីកា កាលពីយប់ថ្ងៃទី០២ ចូលដល់ថ្ងៃទី០៣ ខែកញ្ញានេះ ខណៈអ្នកវិភាគ អ្នកច្បាប់ និងគណបក្សប្រឆំាង អះអាងប្រហាក់ប្រហែលគ្នាថា ករណីចាប់ខ្លួន កឹម សុខា រំលោភអភ័យឯកសិទ្ធិសភា និងរដ្ឋធម្មនុញ្ញ។
ក្រោយពីអាជ្ញាធរចាប់ខ្លួនមេបក្សប្រឆំាងលោក កឹម សុខា តំណាងអង្គការសហប្រជាជាតិ និងស្ថានទូតធំៗ រួមមាន អង់គ្លេស អូស្ត្រាលី អាមេរិក សហភាពអឺរ៉ុប អាល្លឺម៉ង់ និងប្រទេសមួយចំនួនទៀត បានសម្តែងការព្រួយបារម្ភជាខ្លាំង ជុំវិញការចាប់ខ្លួនមេបក្សរូបនោះ ហើយពួកគេ ជំរុញឲ្យរដ្ឋាភិបាលកម្ពុជា បញ្ឈប់ការគំរាមកំហែងលើគណបក្សប្រឆាំង។ ប៉ុន្តែប្រទេសកុំមុយនីស្តចិន បានគំាទ្រចំណាត់ការរបស់រដ្ឋាភិបាលកម្ពុជា៕
