សហមេធាវីការពារក្ដីឲ្យប្រធានគណបក្សសង្គ្រោះជាតិ ឲ្យដឹងថា ក្រុមមេធាវីនឹងប្ដឹងជំទាស់ទៅតុលាការកំពូល នៅក្នុងសប្ដាហ៍នេះ ដើម្បីប្រឆាំងនឹងដីកាសម្រេចរបស់សាលាឧទ្ធរណ៍ ដែលឲ្យបន្តឃុំខ្លួនលោក កឹម សុខា នៅពន្ធនាគារ ដូចសាលាដំបូងរាជធានីភ្នំពេញ។
លោក សំ សុគង់ មេធាវីម្នាក់ ក្នុងចំណោម៧នាក់ ដែលការពារក្ដីឲ្យលោក កឹម សុខា ប្រាប់វីអូឌីថា ការសម្រេចប្ដឹងជំទាស់នេះ ក្រោយពីសាលាឧទ្ធរណ៍ បានសម្រេចឲ្យបន្តឃុំខ្លួនកូនក្តីនៅពន្ធនាគារដដែល និងបន្ទាប់ពីពួកគេ បានជួបពិភាក្សាជាមួយកូនក្ដី។
លោកមានប្រសាសន៍ថា ក្រុមមេធាវី បានឯកភាពគ្នាថា នឹងប្ដឹងជំទាស់ទៅតុលាការកំពូល នៅថ្ងៃសុក្រសប្ដាហ៍នេះ ដើម្បីឲ្យតុលាការជាន់ខ្ពស់មួយនេះ ពិនិត្យមើលឡើងវិញ ចំពោះការសម្រេចរបស់តុលាការថ្នាក់ក្រោម។
លោក៖ «ក្រុមមេធាវីយល់ឃើញថា លក្ខខណ្ឌក៏ដូចជា សំអាងហេតុ នៅក្នុងដីកាសម្រេចឲ្យឃុំខ្លួន មិនទាន់មានលក្ខណៈមួយត្រឹមត្រូវ ហើយមិនបានបំពេញទៅតាមលក្ខខណ្ឌ ដែលមានចែងនៅក្នុងមាត្រា ២០៥ នៃក្រមនីតិវិធីព្រហ្មទណ្ឌដោយសា ឯកឧត្ដម កឹម សុខា មានលក្ខខណ្ឌគ្រប់គ្រាន់ ដែលតុលាការគួរតែសម្រេចឲ្យឯកឧត្តម បាននៅក្រៅឃុំបណ្ដោះអាសន្ន»។
កាលពីថ្ងៃទី២៦ ខែកញ្ញា ឆ្នាំ២០១៧ សាលាឧទ្ធរណ៍ បានបង្គាប់ឲ្យបន្តឃុំខ្លួនមេដឹកនាំបក្សប្រឆាំង លោក កឹម សុខា ដូចសាលាដំបូងរាជធានីភ្នំពេញដែរ ដោយសម្រេចច្រានចោលបណ្តឹងជំទាស់របស់ក្រុមមេធាវីការពារក្តីឲ្យលោក កឹម សុខា។
នៅថ្ងៃសវនាការដដែលនោះ ក្រុមមេធាវីការពារក្តីលោក កឹម សុខា ទាំង៦នាក់ បានដើរចេញពីបន្ទប់សវនាការ ក្រោយពីចូលរួមតតាំងជាមួយចៅក្រមរយៈពេលជិត២ម៉ោង ដើម្បីទាមទារឲ្យលើកពេលសវនាការ ដោយសំអាងថា អវត្តមានកូនក្តី ប៉ុន្តែចៅក្រមមិនព្រម។
ប្រធានគណបក្សសង្គ្រោះជាតិ លោក កឹម សុខា ត្រូវបានសាលាដំបូងរាជធានីភ្នំពេញ បានបង្គាប់ឲ្យឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ កាលពីដើមខែកញ្ញា ដោចោទថា «ក្បត់ជាតិ»។
ទោះជាយ៉ាងណា ការចាប់ខ្លួន លោក កឹម សុខា រដ្ឋាភិបាល អះអាងថា ជាវិធានការច្បាប់។ ប៉ុន្តែសហគមន៍អន្តរជាតិ មានសហភាពអឺរុប បារាំង អាលឺម៉ង់ និងសហរដ្ឋអាមេរិកផងនោះ ហៅការចាប់ខ្លួននេះថា ជាការគាំរាមកំហែងផ្នែកនយោបាយ និងទាមទារឲ្យដោះលែងជាបន្ទាន់ ដោយថា ដើម្បីឲ្យដំណើរការបោះឆ្នោតខាងមុខ ដំណើរការទៅដោយសេរី ត្រឹមត្រូវ និងយុត្តិធម៌៕
