ចេតិយសម្រាប់តម្កល់អដ្ឋិធាតុ របស់ស្ថាបត្យករដ៏ល្បីនា សម័យសង្គមរាស្ដ្រនិយម គឺលោកតា វណ្ណ ម៉ូលីវណ្ណ ត្រូវបានសាងសង់រួចរាល់តាំងពីខែកក្កដាឆ្នាំ២០១៦ ដោយយកលំនាំតាមរចនាបថប្រាសាទបាគង។
លោកតា វណ្ណ ម៉ូលីវណ្ណ ជាស្ថាបត្យករល្បីល្បាយរូបនោះ បានទទួលមរណភាព នៅព្រឹកថ្ងៃទី២៨ ខែកញ្ញា ឆ្នាំ២០១៧ វេលាម៉ោង៩ និង៤៥នាទីព្រឹក ក្នុងជន្មាយុ៩១ឆ្នាំ ដោយជរាពាធ ស្ថិតនៅភូមិមណ្ឌល៣ សង្កាត់ស្លក្រាម ក្រុងសៀមរាប។
អ្នកមើលថែលោកតា វណ្ណ ម៉ូលីវណ្ណ គឺលោក ជិន ឈឿន អោយដឹងថា ចេតិយនេះ បានកសាងអស់ថវិកាប្រមាណ ២ម៉ឺនដុល្លារ មានទីតាំងស្ថិតនៅខ្លោងទ្វារ ចូលវត្តព្រះឥន្ទ្រកោសីយ៍ ពីខាងកើតស្ថិតក្នុងភូមិទ្រាំង សង្កាត់ស្លក្រាម ក្រុងសៀមរាប។ ចេតិយនេះ ផ្តើមធ្វើចាប់ពីពាក់កណ្តាលឆ្នាំ២០១៦ និងរួចរាល់នៅចុង ខែកក្កដា ឆ្នាំ២០១៦។
លោក ឈឿន បញ្ជាក់ថា ថវិកាទាំងនោះ គឺបានពីការរៃអង្គាសគ្នា ពីអ្នកដែលស្រឡាញ់ និងគោរពលោកតា វណ្ណ ម៉ូលីវណ្ណ។
កាលពីលោកនៅមានជីវិត ស្ថាបត្យកររូបនេះ ក៏បានទៅមើលចេតិយនេះជា បន្តបន្ទាប់ដែរ ព្រោះនៅមិនឆ្ងាយប៉ុន្មានទេពីភូមិគ្រឹះរបស់លោកក្នុងសៀមរាប៕
