សាលារាជធានីភ្នំពេញបានលើកឡើងករណី២ ដែលបណ្ដាលឲ្យលិចផ្លូវ ស ឡា ឬផ្លូវ ២០០៤ ខ្លាំងគឺដោយសារផ្ទះពលរដ្ឋលើប្រឡាយស្ទឹងមានជ័យ និងខ្វះអណ្ដូងលូ។
សាលារាជធានីភ្នំពេញ បានលើកឡើងបែបនេះនៅលើទំព័រហ្វេសប៊ុករបស់ខ្លួនកាលពីថ្ងៃទី ២៨ ខែកញ្ញា បន្ទាប់ពីភ្លៀងមួយមេធំ និងរងការត្អូញត្អែរពីប្រជាពលរដ្ឋតាមបណ្ដាញសង្គមករណីលិចផ្លូវនេះ។
ករណីលិចផ្លូវស ឡា នេះ សាលារាជធានីភ្នំពេញ ពន្យល់ថា បណ្ដាលមកពីផ្ទះពលរដ្ឋចំនួន ៥៦២គ្រួសារ ដែលសាងសង់ និងរស់នៅលើប្រឡាយស្ទឹងមានជ័យ ចាប់ពីទ្វារទឹកដើមស្លែងនៃផ្លូវលេខ ៣៧១ ដល់ស្ពានអាកាសស្ទឹងមានជ័យ មានសំរាមកកស្ទះក្រោមផ្ទះបណ្តាលទឹកហូរយឺត។
សាលារាជធានីភ្នំពេញ បញ្ជាក់ទៀតថា ពលរដ្ឋទាំងនោះបានប្តឹងតវ៉ាជាញឹកញាប់ ជំទាស់និងគម្រោងជីកស្តារប្រឡាយដែលប៉ះពាល់ផ្ទះរបស់ពួកគេ និងសុំអភិវឌ្ឍន៍នៅនិងកន្លែងបង្កអោយស្ទះផ្លូវទឹកបង្ហូរពីផ្លូវ ស ឡា ឬផ្លូវលេខ ២០០៤៕
