គណបក្សថ្មីមួយបានសម្រេចដាក់ពាក្យបណ្ដឹងទៅកាន់តុលាការកំពូលឲ្យរំលាយគណបក្សសង្គ្រោះជាតិចោល ដោយថា មេដឹកនាំបក្សប្រឆាំងលោក កឹម សុខា បានប្រព្រឹត្ត «អំពើក្បត់ជាតិ» ដូចទៅនឹងការចោទប្រកាន់ពីសំណាក់រដ្ឋាភិបាល។
ប្រធានគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចចាប់ខ្លួនកាលពីយប់ឈានចូលថ្ងៃទី០៣ ខែកញ្ញា ក្រោមការចោទប្រកាន់ពីរដ្ឋាភិបាលថា «ក្បត់ជាតិ»។
រដ្ឋាភិបាលដឹកនាំដោយគណបក្សប្រជាជនកម្ពុជា បានចោទមេដឹកនាំបក្សប្រឆាំងបែបនេះ ដោយផ្អែកលើវីដេអូនៃការថ្លែងរបស់លោក កឹម សុខា នៅក្នុងប្រទេសអូស្ត្រាលី កាលពីឆ្នាំ២០១៣កន្លងមក។
នៅក្នុងវីដេអូនោះ លោក កឹម សុខា បានថ្លែងថា លោកទទួលបានការគាំទ្រពីអាមេរិក សម្រាប់ការផ្លាស់ប្ដូរតាមបែបប្រជាធិបតេយ្យនៅក្នុងប្រទេសកម្ពុជា ប៉ុន្តែ សម្ដីរបស់មេបក្សប្រឆាំងរូបនេះ ត្រូវបានរដ្ឋាភិបាលចាត់ទុកជា «ការឃុបឃិតគ្នាដោយសម្ងាត់ជាមួយអាមេរិក» ដើម្បីផ្ដួលរំលំរដ្ឋាភិបាល។
មិនមែនតែបក្សកាន់អំណាចទេដែលយល់ឃើញដូច្នេះ គណបក្សយុវជនកម្ពុជា ដែលទើបតែត្រូវបានបង្កើតឡើងនោះ ក៏យល់ឃើញថា មេបក្សប្រឆាំង លោក កឹម សុខា បានប្រព្រឹត្តអំពើ «ក្បត់ជាតិ»ផងដែរ។
ក្នុងសេចក្ដីថ្លែងការណ៍នៅថ្ងៃទី០១ ខែតុលានេះ គណបក្សយុវជនកម្ពុជា បានប្រកាសថា ខ្លួនបានសម្រេចដាក់ពាក្យបណ្ដឹងទៅតុលាការកំពូល ដោយស្នើឲ្យរំលាយគណបក្សសង្គ្រោះជាតិ។ គណបក្សយុវជនកម្ពុជា បានថ្លែងថា គណបក្សប្រឆាំងដ៏ធំមួយនេះ បានប្រព្រឹត្តអំពើ «ក្បត់ជាតិមានលក្ខណៈជាប្រព័ន្ធ» ដែលបក្សនេះថា មិនអាចលើកលែងបាន។
ក្នុងសេចក្ដីថ្លែងការដដែល គណបក្សយុវជនកម្ពុជា បានចាត់ទុកបណ្ដឹងរបស់ខ្លួនទៅតុលាការកំពូលថា ជាការដាស់តឿនដល់អ្នកនយោបាយគ្រប់ជំនាន់ ឲ្យគិតពីផលប្រយោជន៍ជាតិជាធំ កុំឲ្យយកគំរូតាមគណបក្សសង្គ្រោះជាតិដែលជាហេតុធ្វើឲ្យកម្ពុជាធ្លាក់ក្នុងនឹមត្រួតត្រារបស់បរទេស។
គិតមកដល់ថ្ងៃនេះ លោក កឹម សុខា ត្រូវបានចាប់ដាក់ឃុំនៅពន្ធនាគារត្រពាំងផ្លុង ស្ថិតនៅក្នុងខេត្តត្បូងឃ្មុំ អស់រយៈពេលជិត ១ខែហើយ ក្រោមការចោទថា «ក្បត់ជាតិ» ពីសំណាក់រដ្ឋាភិបាល។
ការចាប់ខ្លួននេះ ត្រូវបានមន្រ្តីរដ្ឋាភិបាល អះអាងថា ជាការអនុវត្តច្បាប់ ដោយរដ្ឋាភិបាលបានចោទមេបក្សប្រឆាំងរូបនេះថា “ក្បត់ជាតិ”។
ទោះបីជាយ៉ាងណា គណបក្សប្រឆាំងបានចេញសេចក្ដីថ្លែងការណ៍ភ្លាមៗជំរុញឲ្យរដ្ឋាភិបាលដោះលែង លោក កឹម សុខា ដោយគ្មានលក្ខខណ្ឌ។ គណកប្សប្រឆាំងបានហៅការចាប់ខ្លួនលោក កឹម សុខា ថា ជាការរំលោភបំពានអភ័យឯកសិទ្ធិសភា និងគាបសង្កត់ផ្នែកនយោបាយ។
ជាមួយគ្នានោះ តំណាងអង្គការសហប្រជាជាតិ និងស្ថានទូតធំៗរួមមាន អង់គ្លេស អូស្ត្រាលី អាមេរិក និងសហភាពអឺរ៉ុប និងប្រទេសមួយចំនួនទៀត បានសម្តែងការព្រួយបារម្ភជាខ្លាំង ជុំវិញការចាប់ខ្លួនមេបក្សរូបនោះ ហើយពួកគេ ជំរុញឲ្យរដ្ឋាភិបាលកម្ពុជា បញ្ឈប់ការគំរាមកំហែងលើគណបក្សប្រឆាំង។
ទោះជាយ៉ាងណា មានតែប្រទេសកុម្មុយនីស្តចិនប៉ុណ្ណោះ បានគាំទ្រចំណាត់ការរបស់រដ្ឋាភិបាលកម្ពុជា ដោយថា ដើម្បីរក្សាស្ថេរភាព និងសន្តិសុខជាតិ៕
