ស្ថានទូតខ្មែរប្រចាំនៅម៉ាឡេស៊ី បានអន្ដរាគមន៍ជួយសង្គ្រោះពលករខ្មែរជាច្រើននាក់ បន្ទាប់ពីពួកគេថាមិនអាចស៊ូទ្រាំនឹងការងារនៅទីនោះ។
ក្នុងសេចក្ដីប្រកាសព័ត៌មាន ចេញផ្សាយនៅថ្ងៃទី៣តុលាឆ្នាំ២០១៧នេះ អ្នកនាំពាក្យក្រសួងការបរទេសកម្ពុជា លោក ជុំ សុន្ទរី ឲ្យដឹងថា ស្ថានទូតខ្មែរនៅប្រទេសម៉ាឡេស៊ី បានជួយសង្គ្រោះ ពលករ ពលការិនីខ្មែរចំនួន១៦នាក់ ក្នុងនោះ មានប្រុស៨នាក់ និងស្រី៨នាក់។ ហើយ បើតាមក្រសួង ពលករខ្មែរទាំងនេះ មានដើមកំណើតពីខេត្តក្រចេះ កំពង់ធំ កំពត ត្បូងឃ្មុំ កំពង់ចាម និងសៀមរាប។
បើតាមសេចក្ដីប្រកាស ពលករខ្មែរទាំង១៦នាក់ បានត្រឡប់មកប្រទេសកម្ពុជាវិញហើយ កាលពីថ្ងៃទី៣០ខែកញ្ញាកន្លងទៅ។
បើតាមរបាយការណ៍របស់ក្រសួងការបទេសកម្ពុជា រយៈពេល៦ខែដើមឆ្នាំ២០១៧ អាជ្ញាធរកម្ពុជាបានជួយសង្គ្រោះនិងធ្វើមាតុភូមិនិវត្តន៍ ពលករខ្មែរចំនួន ៤៥០នាក់។ ក្នុងនោះ បញ្ជូនមកពីប្រទេសថៃ មានចំនួន១៧៨នាក់ ម៉ាឡេស៊ី ចំនួន១៣៤នាក់ វៀតណាម ចំនួន៦៨នាក់ មកពីឡាវ ចំនួន២៤នាក់ និង ចំនួន ២២នាក់ផ្សេងទៀត បញ្ជូនមកពីប្រទេសចិន៕
