លោកនាយករដ្ឋមន្ត្រី ហ៊ុន សែន នៅថ្ងៃពុធនេះ បានរំឭកក្រសួងការងារ ឲ្យពិនិត្យឡើងវិញពីការប្រើកិច្ចសន្យាខ្លី និងទប់ស្កាត់កុំឲ្យមានជើងកាងតាមរោងចក្រកាប់ចាក់គ្នា ដូចពេលមុនៗទៀត ដោយថា ដើម្បីធានាប្រយោជន៍ និងសុវត្ថិភាពការងាររបស់កម្មករ។
លោក ហ៊ុន សែន ក្នុងពិធីចុះជួបកម្មករ នៅរាជធានីភ្នំពេញ នាថ្ងៃទី៤ខែតុលានេះ បានថ្លែងថា មានកម្មករប្រាប់លោកថា ការប្រើប្រាស់កិច្ចសន្យាខ្លីកន្លងមក ធ្វើឲ្យពួកគេងាយបាត់បង់ការងារ និងអត្ថប្រយោជន៍ផ្សេងៗ បើថៅកែរោងចក្រ មិនពេលចិត្តដោយប្រការណាមួយ។
លោក ហ៊ុន សែន រំឭកឲ្យក្រសួងការងារ និងថៅរោងចក្រ ត្រូវរួមគ្នាដោះស្រាយបញ្ហានេះ ដោយការយោគយល់ ដោយថា ដើម្បីធានាប្រយោជន៍ទាំងសងខាង ចៀសវាងការផ្ទុះបាតុកម្ម ដោយសារតែវិវាទផលប្រយោជន៍នេះ។
លោកថា៖ «កន្លងទៅ៣ខែចុះ[កិច្ចសន្យា]ម្តង។ ៣ខែអាចបន្ត អារឿងអាចបន្តនេះហើយ ដែលកម្មករមានការបារម្ភ បារម្ភថាបន្ទាប់ពី៣ខែហើយ តើគេឲ្យធ្វើការតទៅទៀតឬអត់។ អញ្ចឹងទេ អំពាវនាវចំពោះម្ចាស់រោងចក្រ អំពាវនាវចំពោះសមាគម និយោជក និងក្រសួងការងារ ធ្វើការងារនេះ ដើម្បីធានាសុវត្ថិភាពការងាររបស់កម្មករ កម្មការនី របស់យើង»។
លោក ហ៊ុន សែន រំឭកដែរថា កន្លងទៅ មានកម្មករមួយក្រុមធ្វើបាតុកម្ម តែកម្មករមួយក្រុមទៀត ពួកគេចង់ធ្វើការកែរ។ ប៉ុន្តែលោកថា ពួកគេទាំងនោះ មិនបានគោរពសិទ្ធិគ្នាទៅវិញទៅមកទេ បង្កឲ្យមានហិង្សាកើតឡើង។ លោកជំរុញឲ្យភាគីពាក់ព័ន្ធទប់ស្កាត់បញ្ហានេះ។
លោកថា៖ «មិនអាចឲ្យមានរោងចក្រ ដែលមានសុវត្ថិភាពការងារ ដោយមានបងតូចបងធំ ដែលកាប់គ្នា ដោយដាវសាមារ៉ៃ ឬកាប់គ្នាដោយកាំបិតនោះទេ»។
VOD មិនទាន់អាចសុំការឆ្លើយតបពីភាគីរោងចក្របាននៅឡើយទេ ប៉ុន្តែបើតាមលោកនាយករដ្ឋមន្ត្រី ហ៊ុន សែន ថា ករណីនេះ លោកបានពិភាក្សា ជាមួយរដ្ឋមន្ត្រីក្រសួងការងារ លោក អ៊ិត សំហេង រួចហើយកាលពីយប់មិញ។
ប្រធានសហភាពការងារកម្ពុជាលោក អាត់ ធន់ ហៅការជំរុញរបស់ប្រមុខរដ្ឋាភិបាលនេះ ថាហាក់ចំបញ្ហា របស់កម្មករ ដែលលោកថា កម្មករជាង៩០ភាគរយ ច្រើនឆ្នាំមកនេះ បានរងគ្រោះដោយសារការប្រើប្រាស់កិច្ចខ្លីនេះ។
លោកថា៖ «បច្ចុប្បន្នហ្នឹង ថៅកែរោងចក្រចូល៩៥ភាគរយហើយ ដែលព្យាយាមប្រើប្រាស់កិច្ចសន្យាខ្លី ដោយទុកឲ្យកម្មករហ្នឹងមិនមានការងារជាប់លាប់ មិនមានសុវត្ថិភាពការងារ ហើយងាយស្រួលនឹងកេញប្រវ័ញ្ញ ហើយជើងកាងនៅមុខរោងចក្រហ្នឹងច្រើនមែនទែន។ ជាពិសេស បង្កឲ្យក្រុមថៅកែ ក្រុមរដ្ឋបាល ក្រុមសហជីពមួយចំនួនដែលភាគច្រើនការពារថៅកែ អាចនិយាយបានថាពាក់ព័ន្ធនឹងអាជ្ញាធរផងដែរ ដែលបង្កបញ្ហាហ្នឹង។ អញ្ចឹងបើគាត់រកឃើញបញ្ហាហ្នឹង គាត់ដោះស្រាយបញ្ហាហ្នឹង ខ្ញុំគិតថាជារឿងល្អ»។
ទោះជាយ៉ាងណា លោក អាត់ ធន់ បង្ហាញការព្រួយបារម្ភថា កម្មករនៅតែបន្តបាត់បង់ប្រយោជន៍ដដែល បើរដ្ឋាភិបាល ខ្វះយន្តការពង្រឹងប្រសិទ្ធភាពនៃការអនុវត្ត។
បើតាមលោក អាត់ ធន់ កម្មករដែលថៅកែប្រើកិច្ចសន្យាខ្លី ពួកគេគ្មានសិទ្ធិចូលសហជីពដើម្បីជំរុញលក្ខខណ្ឌការងារ គ្មានសិទ្ធិចរចាប្រាក់ឈ្នួល មិនទទួលបានប្រាក់អតីភាពការងារ មិនទទួលបានប្រាក់ឧបត្ថម្ភពេលឆ្លងទន្លេ និងមិនទទួលបានការប្រើប្រាស់សេវាថែទាំសុខភាពដោយឥតគិតថ្លៃពីស្ថាប័នរដ្ឋជាដើម។
ប៉ុន្តែលោក ហ៊ុន សែន អះអាងថា ការធ្វើដំណើរទៅកាន់រោងចក្រ រៀងរាល់សប្តាហ៍ ដូចពេលនេះ លោកថាបានដឹងពីបញ្ហារបស់កម្មករកាត់តែច្រើន៕
