លោកនាយករដ្ឋមន្ត្រីបានប្រកាសលើហ្វេសប៊ុករបស់លោកនៅថ្ងៃនេះថា ចាប់ពីពាក់កណ្តាលខែតុលានេះទៅ អ្នកប្រើប្រាស់ ស្ពានព្រែកព្នៅ (លីយ៉ុងផាត់) និងផ្លូវភ្ជាប់ពីផ្លូវជាតិលេខ៥ ទៅផ្លូវជាតិ៦A នឹងមិនត្រូវបង់ថ្លៃទៀតទេ ដោយថារដ្ឋាភិបាលទិញផ្លូវនេះ មកធ្វើជាសម្បត្តិរដ្ឋវិញ។
លោក ហ៊ុន សែន បានសរសេរនៅថា ដើម្បីលើកម្ពស់ជីវភាព និងសម្រួលដល់ការធ្វើដំណើរទៅមក របស់ប្រជាពលរដ្ឋ លោកថាចាប់ពីម៉ោង ០០:០០ នាទី ថ្ងៃទី១៥ ខែតុលា ឆ្នាំ២០១៧ នេះតទៅ អ្នកធ្វើដំណើរពីស្ពានព្រែកព្នៅ (ផ្លូវជាតិលេខ៥) ទៅផ្លូវជាតិលេខ ៦ A នឹងមិនត្រូវបង់ប្រាក់ទៀតទេ ដោយថារដ្ឋាភិបាលនឹងទិញយកមកគ្រប់គ្រងវិញ។
បើតាមលោក ហ៊ុន សែន ក្រសួងសេដ្ឋកិច្ចនិងហិរញ្ញវត្ថុ ក្រសួងសាធារណការនិងដឹកជញ្ជូន សាលារាជធានីភ្នំពេញ និងស្ថាប័នពាក់ព័ន្ធ ត្រូវពិភាក្សាជាមួយក្រុមហ៊ុន ដើម្បីពិនិត្យដោះស្រាយបញ្ហាមួយចំនួនដែលនៅសេសសល់។
ការដែលរដ្ឋាភិបាលប្រកាសទិញស្ពានព្រែកព្នៅគ្រប់គ្រងវិញនេះ ចំពេលដែលស្ពានជ្រោយចង្វារទី១ ឬហៅស្ពានមិត្តភាពកម្ពុជា-ជប៉ុន ប្រកាសឲ្យផ្អាកធ្វើចរាចរណ៍បណ្តោះអាសន្នចាប់ពីថ្ងៃទី១ខែតុលាឆ្នាំ២០១៧ ដោយសារស្ពានឆ្លងទន្លេមួយនេះ ត្រូវជួសជុលឡើងវិញ។ បើតាមគម្រោង ស្ពានមិត្តភាពកម្ពុជា-ជប៉ុននេះ នឹងត្រូវបើកឲ្យធ្វើចរាចរណ៍ឡើងវិញនៅខែមិថុនាឆ្នាំ២០១៩៕
