អ្នកនាំពាក្យរដ្ឋាភិបាលកម្ពុជាថ្លែងថាទាំងសេដ្ឋកិច្ចនិងការអភិវឌ្ឍ កម្ពុជាអាចឈរដោយខ្លួនឯងបាន បើទោះបីគ្មានជំនួយពីសហរដ្ឋអាមេរិក ខណៈសេចក្តីស្នើច្បាប់ទណ្ឌកម្មលើកម្ពុជាក្នុងឆ្នាំ២០១៨ត្រូវបានសមាជិកសភាអាមេរិកដាក់ស្នើទៅកាន់សភារបស់ខ្លួន។
ការថ្លែងរបស់មន្ត្រីជាន់ខ្ពស់នេះគឺបន្ទាប់ពីមានព័ត៌មានថា សមាជិកព្រឹទ្ធសភាសហរដ្ឋអាមេរិកលោក Ted Cruz កំពុងរៀបចំស្នើច្បាប់មួយដែលដាក់ទណ្ឌកម្មបិទជំនួយនៅឆ្នាំ២០១៨ខាងមុខ។ សមាជិកព្រឹទ្ធសភាអាមេរិករូបនេះ ព្រមានថា ច្បាប់នោះនឹងរុញឲ្យដំណើរការបើសិនជា រដ្ឋាភិបាលកម្ពុជាមិនដោះលែងលោក កឹម សុខា ឲ្យបានមុនថ្ងៃទី៩ខែវិច្ឆិកា។
អ្នកនាំពាក្យទីស្តីការគណៈរដ្ឋមន្ត្រីលោក ផៃ ស៊ីផាន បានឲ្យអ្នកសារព័ត៌មានដឹងនៅព្រឹកថ្ងៃទី២៦ តុលានេះថា ការប៉ុនប៉ងដាក់ទណ្ឌកម្មទាំងនោះមកកម្ពុជាគឺគ្រាន់តែជាការបំភិតបំភ័យ និងស្ថិតក្នុងការស្រមើស្រមៃប៉ុណ្ណោះ។ លោកថាប្រសិនជាអាមេរិកផ្តាច់ជំនួយរបស់ខ្លួនមកកម្ពុជាមែន អ្នកដែលរងគ្រោះមុនគេ គឺអង្គការសង្គមស៊ីវិលទៅវិញទេ ហើយថា ប្រទេសចិន រុស្ស៊ី និងជប៉ុន នៅតែអាចជាជំហរសម្រាប់ការអភិវឌ្ឍ និងសេដ្ឋកិច្ចកម្ពុជាបាន។
លោកថា៖ «យើងបានត្រៀមខ្លួនរួចជាស្រេចហើយ យើងមិនមែនជាកូនបៅដោះតទៅទៀតទេ។ ដែលជាប្រជាជាតិមួយអាចឈរខ្លួនឯងបានកន្លែងខ្លះ។ ហើយជាមួយមិត្តដ៏ល្អៗរបស់យើងដូចជារុស្ស៊ី ដូចជាជប៉ុន ដូចជាចិនគេបាន គេបានសំដែងនូវការគោរពនូវអធិបតេយ្យភាពនៅកម្ពុជា យើងអាចរកទទួលបានជាមួយហ្នឹងពួកគេ។ ហើយអតិភាពរបស់យើងៗជាសមាជិកនៃអង្គការពាណិជ្ជកម្មពិភពលោកគឺមិនមានហេតុផលអ្វីទៅដាក់គំនាបទៅលើអង្គការពាណិជ្ជកម្មពិភពលោកទេ ពីព្រោះរបៀបរបបនៃការជួញដូរ របៀបពាណិជ្ជកម្មគឺដាច់ដោយឡែកពីនយោបាយរបស់សហរដ្ឋអាមេរិក»។
តែទោះជាយ៉ាងណាកាលពីពេលថ្មីៗនេះអ្នកនាំពាក្យក្រសួងពាណិជ្ជកម្មបានអះអាងថាទំហំពាណិជ្ជកម្ម និងសេដ្ឋកិច្ចកម្ពុជាមិនអាច ដកចេញពីសហរដ្ឋអាមេរិក និងសហគមន៍អឺរ៉ុបបាននោះទេ។
សាស្ត្រាចារ្យវិទ្យាសាស្ត្រនយោបាយលោក ឯម សុវណ្ណរ៉ា ធ្លាប់បានលើកឡើងប្រាប់វីអូឌីថា កម្ពុជាគួរតែពិចារណាទៅលើសំណើររបស់អន្តរជាតិដែលបានជំរុញដល់កម្ពុជាផងដែរ ដោយថាប្រសិនជាស្ថានការណ៍កាន់តែធ្ងន់ធ្ងរជាងពេលនេះទៀតនោះ សម្ពោធគឺកាន់តែខ្លាំងឡើង ហើយអ្នករងគ្រោះគឺពលរដ្ឋ និងប្រទេសកម្ពុជាទៅវិញទេ។
លោកថា៖ «កម្ពុជាជាប្រទេសហត្ថលេខីនៃអនុសញ្ញាអង្គការសហប្រជាជាតិស្តីពីសិទ្ធិមនុស្ស អាហ្នឹងយើងត្រូវមើលលើគោលការណ៍ហ្នឹងទៀត អាហ្នឹងបានយើងអាចនិយាយគ្នាត្រូវ។ បើសិនជាយើងគិតតែថាកម្ពុជាធ្វើត្រូវ សហគមន៍អន្តរជាតិគេថាអត់ត្រូវ អញ្ចឹងទស្សនៈពីរនៅតែប្រឈមខុសគ្នា អូសបន្លាយពេលកាន់តែយូរបានន័យថាកម្ពុជាកាត់តែខាតបង់ទេ»។
រដ្ឋាភិបាលកម្ពុជាមួយរយៈចុងក្រោយនេះ រងការរិះគន់ពីសហគមន៍អន្តរជាតិ ជាបន្តបន្ទាប់ ដូចជាសហរដ្ឋអាមេរិក អាលឺម៉ង់ បារាំង សភាពអឺរុប និងសហភាពអន្តរសភា IPU ដែលមានសមាជិក១៧៣ប្រទេស ជាដើម ដោយថា របត់ដឹកនាំពេលនេះ កំពុងងាកចេញពីគន្លងប្រជាធិបតេយ្យ និងបានជំរុញឲ្យរដ្ឋាភិបាល ដោះលែង លោក កឹម សុខា បើកលំហ ប្រជាធិបតេយ្យឡើងវិញ ដើម្បីធានាថា រដ្ឋាភិបាលដែលកើតក្រោយបោះឆ្នោតឆ្នាំ២០១៨ជារដ្ឋាភិបាលស្របច្បាប់ កើតចេញពីឆន្ទៈម្ចាស់ឆ្នោត៕
