គណបក្សមិនមានអាសនៈក្នុងសភាមួយទៀត បានប្រកាសជំហរមិនទទួលយកកៅអីក្រុមប្រឹក្សាឃុំសង្កាត់របស់បក្សសង្គ្រោះជាតិ នៅពេលដែលបក្សប្រឆាំងធំមួយនេះ ត្រូវរំលាយ តាមវិសោធនកម្មច្បាប់បោះឆ្នោតដែលទើបចូលជាធរមាន។
សំណើកែច្បាប់ ៤ពាក់ព័ន្ធនឹងការបោះឆ្នោត ត្រូវបានព្រះមហាក្សត្រឡាយព្រះហស្ថលេខាចូលជាធរមានកាលពីថ្ងៃទី២៥ ខែតុលានេះ បន្ទាប់ពីត្រូវបានក្រុមតំណាងរាស្ត្រគណបក្សប្រជាជនកម្ពុជា បានសម្រេចអនុម័តសំណើវិសោធនកម្មច្បាប់នេះ។
វិសោធនកម្មច្បាប់នេះ ត្រូវបានគេមើលឃើញថា ជាការប៉ុនប៉ងឈានទៅរំលាយគណបក្សសង្គ្រោះជាតិ និងបែងចែកអាសនៈរបស់បក្សនេះ ដែលបានមកពីការបោះឆ្នោតរបស់ប្រជាពលរដ្ឋ ទៅឲ្យគណបក្សតូចៗ។
បើទោះបីជាគណបក្សរាជានិយមហ៊្វុនស៊ិនប៉ិចរបស់សម្ដេចក្រុមព្រះ នរោត្ដម រណឫទ្ធិ បានប្រកាសទទួលយកអាសនៈសភារបស់បក្សប្រឆាំងក៏ដោយ ប៉ុន្តែ គណបក្សតូចៗផ្សេងទៀត បានបង្ហាញជំហរមិនទទួលយកអាសនៈទាំងនោះឡើយ ប្រសិនបើបក្សប្រឆាំងត្រូវបានរំលាយមែននោះ។
ក្នុងសេចក្ដីថ្លែងការណ៍មួយចេញនៅថ្ងៃនេះ គណបក្សអំណាចខ្មែររបស់លោក សួន សេរីរដ្ឋា ដែលកំពុងជាប់ឃុំនោះ បានប្រកាសជំហរមិនទទួលយកអាសន្នក្រុមប្រឹក្សាឃុំសង្កាត់របស់គណបក្សសង្គ្រោះជាតិជាដាច់ខាត នៅពេលដែលបក្សប្រឆាំងធំមួយនេះ ត្រូវបានរំលាយតាមវិសោធនកម្មច្បាប់បោះឆ្នោតទាំង ៤។
គណបក្សអំណាចខ្មែរ បានលើកឡើងថា ខ្លួនគាំទ្រនូវការលើកកម្ពស់លទ្ធិប្រជាធិបតេយ្យសេរីពហុបក្ស ការរក្សាសន្តិភាព ស្ថេរភាពសង្គម និងយកពលរដ្ឋជាធំ។
គណបក្សអំណាចខ្មែរ បានក្លាយជាបក្សនយោបាយទី៤ ដែលបដិសេធទទួលយកអាសនៈជាប់ឆ្នោតរបស់បក្សប្រឆាំង បន្ទាប់ពីគណបក្សប្រជាធិបតេយ្យមូលដ្ឋាន គណបក្សសម្ព័ន្ធដើម្បីប្រជាធិបតេយ្យ គណបក្សខ្មែរឈប់ក្រ។
ការប៉ុនប៉ងរំលាយ និងបែងចែកអាសនៈជាប់ឆ្នោតរបស់គណបក្សប្រឆាំង ត្រូវបានក្រុមសិទ្ធិមនុស្សជាតិ និងអន្តរជាតិ និងបណ្ដាប្រទេសប្រជាធិតេយ្យនានា រិះគន់ និងថ្កោលទោសជាបន្តបន្ទាប់ ដោយចាត់ទុកថា ធ្វើឲ្យអន្តរាយដល់លំហូរប្រជាធិបតេយ្យនៅក្នុងប្រទេសនេះ។
ក្នុងសេចក្តីថ្លែងការណ៍មួយចុះផ្សាយកាលថ្ងៃទី១២ ខែតុលា តំណាងពិសេសអង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំកម្ពុជា លោកស្រី រ៉ូណា ស្មីត បានហៅចេតនាចង់រំលាយគណបក្សសង្គ្រោះជាតិ ដែលមានអ្នកគាំទ្រជិតពាក់កណ្ដាលប្រទេសនេះថា នឹងប៉ះពាល់ដល់សិទ្ធិនយោបាយ សិទ្ធិមូលដ្ឋានរបស់ពលរដ្ឋ និងថា ជាការដើរថយក្រោយនៃអនាគតលទ្ធិប្រជាធិបតេយ្យរបស់កម្ពុជា៕
