រដ្ឋាភិបាលបានហាមឃាត់ការផ្សាយស្ប៉តពាណិជ្ជកម្មរបស់ក្រុមហ៊ុនផ្ទេរប្រាក់មួយ នៅលើប្រព័ន្ធផ្សព្វផ្សាយក្នុងស្រុក ដោយថា ស្ប៉តពាណិជ្ជកម្មនោះ ធ្វើឲ្យប៉ះពាល់អ្នកស្ដាប់ និងតម្លៃសីលធម៌សង្គម។
ក្រសួងវប្បធម៌ និងវិចិត្រសិល្បៈ បានចេញលិខិតមួយទៅកាន់ប្រធានសមាគមទូរទស្សន៍កម្ពុជាកាលពីថ្ងៃទី២៥ ខែតុលា ដោយស្នើរសុំអន្តរាគមន៍ហាមឃាត់ដល់គ្រប់ស្ថាប័នទូរទស្សន៍ ឲ្យផ្អាកការចាក់ផ្សាយស្ប៉តពាណិជ្ជកម្មដែលប្រើពាក្យអសុរោះប៉ះពាល់ដល់អារម្មណ៍អ្នកស្ដាប់ និងតម្លៃសីលធម៌សង្គម។
ក្នុងលិខិតដដែល ក្រសួងវប្បធម៌ បានលើកឡើងថា កន្លងមកស្ថានីយទូរទស្សន៍មួយចំនួនកំពុងចាក់ផ្សាយស្ប៉តឃោសនាពាណិជ្ជកម្មរបស់ក្រុមហ៊ុនឯកជន ដោយប្រើពាក្យប៉ះពាល់ដល់អារម្មណ៍អ្នកស្ដាប់ និងប្រាសចាកពីតម្លៃសីលធម៌សង្គម ដូចជាពាក្យ «ដកស្រួល ដាក់ស្រួល ឬហែកស្រួល ស៊កស្រួល» ដែលធ្វើឲ្យមានការរិះគន់ពីសាធារណជន និងសំណូមពរឲ្យមានការចាត់វិធានការបញ្ឈប់ការចាក់ផ្សាយ ឬប្តូរពាក្យទាំងនោះចេញ។
ក្រសួងវប្បធម៌ ក៏បានប្រាប់ទៅប្រធានសមាគមទូរទស្សន៍កម្ពុជា ឲ្យសហការជួយហាមឃាត់ ទប់ស្កាត់នូវរាល់ការផលិត និងចាក់ផ្សាយស្ប៉តដែលប្រើពាក្យពេចន៍អសុរោះ នៅតាមស្ថានីយទូរទស្សន៍ ដើម្បីចូលរួមលើកកម្ពស់សីលធម៌សង្គម និងទំនៀមទម្លាប់ប្រពៃណីដ៏ផូរផង់របស់ជាតិ។
ទោះបីមិនបានបញ្ជាក់ថា ស្ប៉តពាណិជ្ជកម្មនោះជារបស់ក្រុមហ៊ុនឯកជនណាមួយក៏ដោយ ប៉ុន្តែ ឃ្លា «ដកស្រួល ដាក់ស្រួល» ត្រូវបានគេដឹងថា វាស្ថិតនៅក្នុងស្ប៉តពាណិជ្ជកម្មរបស់ក្រុមហ៊ុនផ្ដល់សេវាផ្ទេរប្រាក់ True Money។
ទោះជាយ៉ាងណា ឃ្លា «ដកស្រួល ដាក់ស្រួល» ត្រូវបានអ្នកប្រើប្រាស់បណ្ដាញសង្គមហ្វេសប៊ុកយកមកប្រើ និងចែកចាយតៗគ្នា ក្រោយពីអតីតប្រធានសុខាភិបាលរាជធានីភ្នំពេញ លោក សុខ សុគន្ធ ត្រូវបានលោកនាយករដ្ឋមន្ត្រី ហ៊ុន សែន ដកហូតពីតំណែងកាលពីថ្ងៃទី១៣ ខែសីហា ឆ្នាំ២០១៦ ហើយត្រូវបានតែងតាំងតំណែងជាអគ្គនាយករងបច្ចេកទេសសុខាភិបាលវិញតែ ២ថ្ងៃក្រោយមក។
ការសម្រេចដកហូតតំណែង និងតែងតាំងឡើងវិញភ្លាមៗនូវតំណែងមន្ត្រីសុខាភិបាលរូបនេះ បានកើតឡើងជុំវិញវិវាទដ៏ចម្រូងចម្រាស់មួយជាមួយម្ចាស់ស្ថានីយ៍វិទ្យុ ABC លោក សេង ប៊ុនវេង ហៅ អាចារ្យ បន្ទាប់ពីក្រុមមន្ត្រីសុខាភិបាលរាជធានីភ្នំពេញឃាត់រថយន្តសង្គ្រោះរបស់វិទ្យុ ABC៕
