សេចក្ដីរាយការណ៍ពីទីភ្នាក់ងារព័ត៌មានអន្តរជាតិ បានឲ្យដឹងថា រថយន្តក្រុងដឹកអ្នកដំណើរត្រឡប់ពីពិធីបុណ្យសាសនាហិណ្ឌូមួយទៅកាន់រដ្ឋធានីកាតាម៉ាន់ឌូ បានធ្លាក់ចេញពីផ្លូវធំ ហើយធ្លាក់ចូលទៅក្នុងទន្លេមួយកាលពីថ្ងៃម្សិលមិញនេះ ដោយបានសម្លាប់មនុស្សយ៉ាង ៣១នាក់ ហើយមនុស្សផ្សេងទៀតជាប់នៅក្នុងរថយន្តក្រុងនោះ។
ដោយបានដកស្រង់សម្ដីមន្ត្រីនេប៉ាល់ Reuters បានចុះផ្សាយបន្តថា គ្រោះថ្នាក់នោះ បានកើតឡើងនៅពេលថ្ងៃរៀបលិច ស្ថិតនៅចម្ងាយប្រហែល ៥០គីឡូម៉ែត្រភាគខាងលិចទីក្រុង នៅលើមហាវិថីប៊្រីដវី ដែលភ្ជាប់រដ្ឋធានីកាតាម៉ាន់ឌូទៅនឹងវាលទំនាបភាគខាងត្បូងប្រទេស។
មន្ត្រីរដ្ឋាភិបាលនេប៉ាល លោក រ៉ាម ម៉ានី មីស្រា ត្រូវបានដកស្រង់សម្ដីដែលបាននិយាយថា អាជ្ញាធរបានរកឃើញសពមនុស្ស ៣១នាក់ ហើយកំពុងស្វែងរកអ្នកដទៃទៀត ប៉ុន្តែ លោកថា វាហាក់ដូចជាគ្មានសង្ឃឹមថា មានអ្នកនៅរស់រានមានជីវិតនៅក្នុងទឹកនោះឡើយ។
លោកបន្ថែមថា ក្រុមជួយសង្គ្រោះនៅលើទូកជ័រ និងប៉ូលិសជំនាញខាងមុជទឹក បានព្យាយាមស្វែងរករថយន្តក្រុងនោះ ប៉ុន្មានក្រោយពីវាបានធ្លាក់ចូលទន្លេ ហើយពួកគេបានព្យាយាមទាញរថយន្តក្រុងនោះចេញពីទឹកទន្លេ។
ក្រៅពីអ្នកស្លាប់ មនុស្ស ១៦នាក់ទៀត បានរងរបួស ក្នុងនោះ អ្នករបួស ២នាក់ ត្រូវបាននាំទៅព្យាបាលនៅរដ្ឋធានីកាតាម៉ាន់ឌូ ខណៈដែលអ្នករបួសផ្សេងទៀត ត្រូវបាននាំទៅព្យាបាលតាមមន្ទីរពេទ្យនៅក្នុងតំបន់៕
ប៉ូលិសនិយាយថា អ្នកនៅរស់រានមានជីវិត បានលោតចេញពីរថយន្តនោះបានបង្អួច ប៉ុន្តែ មនុស្ស ១៣នាក់ទៀត ត្រូវបានគេជឿថា នៅជាប់នៅក្នុងរថយន្តនោះ៕
