អេស៉្បាញ​អំពាវ​នាវ​មេដឹកនាំ​តំបន់​កាតាឡូណា​ចូល​រួម​ការ​បោះ​ឆ្នោត​ខាង​មុខ

រដ្ឋាភិបាល​ក្រុង​ម៉ាឌ្រីត បាន​និយាយ​នៅ​ថ្ងៃ​នេះ​ថា ខ្លួន​នឹង​ស្វាគមន៍​ការ​ចូល​រួម​ពី​ប្រធានាធិបតី​តំបន់​កាតាឡូណា លោក Carles Puigdemont ដែល​ត្រូវ​បាន​បណ្ដេញ​ចេញ​ពី​តំណែង​នោះ សម្រាប់​ការ​បោះ​ឆ្នោត​ថ្នាក់​តំបន់​មួយ​ដែល​គ្រោង​រៀបចំ​ធ្វើ​ឡើង​នៅ​ខែ​ធ្នូ​ខាង​មុខ។ នេះ​ដោយ​យោង​តាម​សេចក្ដី​រាយការណ៍​របស់​ទីភ្នាក់ងារ​ព័ត៌មាន Reuters។

Reuters បាន​ចុះ​ផ្សាយ​បែប​នេះ ដោយ​បាន​ដក​ស្រង់​សម្ដី​អ្នក​នាំ​ពាក្យ​រដ្ឋាភិបាល​អេស្ប៉ាញ លោក Inigo Mendez de Vigo ដែល​បាន​ថ្លែង​នៅ​ក្នុង​កិច្ច​សម្ភាស​មួយ​ថា ប្រសិន​បើ​លោក Puigdemont ចង់​បន្ត​នៅ​ក្នុង​នយោបាយ ដែល​ជា​សិទ្ធិ​របស់​លោក​នោះ លោក​គួរ​តែ​រៀប​ចំ​ខ្លួន​សម្រាប់​ការ​បោះ​ឆ្នោត​ខាង​មុខ។

លោក Puigdemont បាន​អំពាវ​នាវ​ឲ្យ​មាន​ការ​ជំទាស់​តាម​បែប​ប្រជាធិតេយ្យ​ទៅ​នឹង​ការ​ដាក់​ការ​គ្រប់​គ្រង​ដោយ​ផ្ទាល់​ពី​សំណាក់​រដ្ឋាភិបាល​កណ្ដាល​ក្រុង​ម៉ាឌ្រីត ទៅ​លើ​តំបន់​កាតាឡូណា បន្ទាប់​ពី​ការ​ប្រកាសឯករាជ្យ​របស់​តំបន់​នេះ។

អ្នក​នាំ​ពាក្យ​រដ្ឋាភិបាល​រូប​នេះ បាន​លើក​ឡើង​ថា លោក​ច្បាស់​ណាស់​ថា ប្រសិន​បើ​លោក Puigdemont ចូល​រួម​ក្នុង​ការ​បោះ​ឆ្នោត​នោះ លោក​អាច​អនុវត្ត​ការ​ជំទាស់​តាម​បែប​ប្រជាធិបតេយ្យ​បែប​នេះ​បាន។

ក្រោយ​ពី​រំលាយ​សភា និង​រំសាយ​រដ្ឋាភិបាល​តំបន់​កាតាឡូណា​កាល​ពី​ថ្ងៃ​សុក្រ​កន្លង​មក​នេះ នាយករដ្ឋ​មន្ត្រី​អេស៉្បាញ លោក Mariano Rajoy បាន​និយាយ​ថា ការ​បោះ​ឆ្នោត​ថ្មី​សម្រាប់​តំបន់​កាតាឡូណា នឹង​ត្រូវ​រៀបចំ​ធ្វើ​ឡើង​នៅ​ថ្ងៃ​ទី​២១ ខែ​ធ្នូ​ខាង​មុខ។

លោក Mendez de Vigo ក៏​បាន​និយាយ​ផង​ដែរ​ថា លោក​ជឿ​ជាក់​ថា ប៉ូលិស​តំបន់​កាតាឡូណា នឹង​គោរព​ច្បាប់ បន្ទាប់​ពី​រដ្ឋាភិបាល​អេស៉្បាញ​បាន​រំសាយ​មន្ត្រី​តំបន់​កាតាឡូណា៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ