សេចក្ដីរាយការណ៍បានឲ្យដឹងថា អ្នកកាសែតបរទេស ២នាក់ ដែលធ្វើការឲ្យប្រព័ន្ធផ្សព្វផ្សាយរដ្ឋតួកគីរួមទាំងជនជាតិភូមា ២នាក់ផងដែរ ត្រូវបានប៉ូលិសភូមាបានចោទប្រកាន់ពីបទរំលោភលើច្បាប់នាំចូល បន្ទាប់ពីពួកគេបានបង្ហោះយន្តហោះតូចគ្មានមនុស្សបើកបរ នៅជុំវិញបរិវេណវិមានរដ្ឋសភាប្រទេសនេះ។
សេចក្ដីរាយការណ៍របស់ទីភ្នាក់ងារព័ត៌មាន AFP បានឲ្យដឹងថា អ្នកកាសែតជនជាតិសិង្ហបុរីម្នាក់ និងអ្នកកាសែតជនជាតិម៉ាឡេស៊ីម្នាក់ នឹងត្រូវដាក់ឲ្យស្ថិតនៅក្រោមការឃុំខ្លួនក្នុងពន្ធនាគាររហូតដល់សវនការលើកដំបូង ក្រោមការចោទប្រកាន់ដែលអាចប្រឈមមុខនឹងការជាប់ពន្ធនាគារដល់ទៅ ៣ឆ្នាំ ឬក៏ពិន័យសម្រាប់ការនាំចូល និងនាំចេញនូវ«ទំនិញត្រូវបានហាមឃាត់ ឬរឹតត្បិត» ដោយពុំមានអាជ្ញាប័ណ្ណ។
ប៉ូលិសភូមា លោក Kyaw Moe បាននិយាយថា អ្នកកាសែតសិង្ហបុរី លោក Lau Hon និងអ្នកកាសែតម៉ាឡេស៊ី អ្នកនាង Mok Choy Lin ត្រូវបានចាប់ខ្លួនកាលពីថ្ងៃសុក្រកន្លងមកនេះ នៅទីក្រុងណៃពិដោរ ខណៈដែលពួកគេត្រូវបានចាត់តាំងឲ្យទៅយកព័ត៌មានសម្រាប់ទូរទស្សន៍រដ្ឋតួកគី TRT។
អ្នកកាសែតទាំងពីរ បានធ្វើការជាមួយអ្នកបកប្រែ និងអ្នកកាសែត Aung Naing Soe ព្រមទាំងអ្នកបើកបរជនជាតិភូមាឈ្មោះ Hla Tin។
ទូរទស្សន៍រដ្ឋភូមា MRTV បានផ្សាយថា ក្រសួងការបរទេសភូមា បានជូនដំណឹងនេះទៅស្ថានទូតសិង្ហបុរី និងម៉ាឡេស៊ីហើយ។
ការចាប់ខ្លួនអ្នកកាសែតទាំងពីររូបនេះ បានកើតឡើងចំពេលមានភាពតានតឹងរវាងភូមា និងតួកគី ដែលបានរិះគន់ភូមា ជុំវិញការប្រព្រឹត្តអំពើឃោឃៅទៅលើជនជាតិមូស្លីមរ៉ូហ៊ីងយ៉ា។
ប្រធានាធិបតីតួកគី លោក តាយយីប អឺដូហ្គែន បានចោទភូមាថា បានប្រព្រឹត្តអំពើប្រល័យពូជសាសន៍ទៅលើជនមូស្លីម៕
