ប្រព័ន្ធដឹកជញ្ជូនបែបទំនើបមួយដែលបង្ហាញនូវ «រថភ្លើងគ្មានផ្លូវដែក» ដែលបានរត់នៅលើបណ្ដាញផ្លូវធម្មតានោះ ត្រូវបានដាក់ឲ្យប្រើប្រាស់សាកល្បងនៅលើដងផ្លូវនៅទីក្រុងជូចូវ ក្នុងខេត្តហ៊ួណាន។ នេះដោយយោងតាមសេចក្ដីរាយការណ៍របស់សារព័ត៌មានចិន People’s Daily។
ដោយត្រូវបានដាក់រហស្សនាមថា រថភ្លើងឆ្លាតវៃដំបូងរបស់ពិភពលោកនោះ ប្រព័ន្ធដឹកជញ្ជូនស្វ័យប្រវត្តិថ្មីនេះ អាចរត់បានល្បឿនអតិបរមា ៧០គីឡូម៉ែត្រក្នុងមួយម៉ោង ហើយអាចដឹកអ្នកដំណើរបានដល់ទៅ ៣០០នាក់ នៅក្នុងទូរដឹកជញ្ជូន ៣។
ដោយត្រូវបានផលិតឡើងដោយក្រុមហ៊ុនចិន CRRC Corporation ដែលជាក្រុមហ៊ុនផលិតរថភ្លើងធំបំផុតមួយនៅលើពិភពលោកនោះ គោលបំណងនៃការផលិតប្រព័ន្ធរថភ្លើងនេះ គឺដើម្បីបង្កើនប្រព័ន្ធដឹកជញ្ជូនសាធារណៈនៅក្នុងទីក្រុងជូចូវ មុននឹងពង្រីកទៅកាន់ទីក្រុងដទៃទៀតនៅក្នុងប្រទេសចិន។
យោងតាមសេចក្ដីរាយការណ៍របស់សារព័ត៌មានចិន រថភ្លើងនេះ ដែលត្រូវបានគេហៅថា រថភ្លើងកូនកាត់ជាមួយរថយន្តក្រុងនោះ បានរត់នៅលើផ្លូវដែកសិប្បនិម្មិត មានទំហំទឹក ៣.៧៥ម៉ែត្រ ដែលបង្ហាញក្នុងទម្រង់បណ្ដាញក្រហម ដែលត្រូវបានគេគូសនៅលើផ្លូវ។
ដោយសាកភ្លើងត្រឹមតែ ១០នាទីនោះ រថភ្លើងដែលប្រើប្រាស់កងកៅស៊ូជំនួសកង់ដែកនោះ អាចរត់បានចម្ងាយជាង ២៥គីឡូម៉ែត្រ ហើយត្រូវបានគេរាយការណ៍ថា អាចមានអាយុកាលប្រើប្រាស់ដល់ទៅប្រហែល ២៥ឆ្នាំ។
រថភ្លើងនេះក៏បានបំពាក់ប្រព័ន្ធ sensor ដ៏កំពូលផងដែរ ដើម្បីប្រមូលព័ត៌មានធ្វើដំណើរ និងកំណត់គន្លងនៅលើផ្លូវ៕
