ពលរដ្ឋអេស្ប៉ាញរាប់រយពាន់នាក់ បានប្រមូលផ្ដុំគ្នាធ្វើបាតុកម្មនៅទីក្រុងបាសេឡូណា តំបន់កាតាឡូណា កាលពីថ្ងៃម្សិលមិញនេះ ដោយបានគ្រវីទង់ជាតិ និងទង់សហភាពអឺរ៉ុប ហើយស្រែកថា «Viva Espana!» ដើម្បីបរិហារក្រុមសមាជិកសភាតំបន់ ដែលបានបោះឆ្នោតផ្ដាច់ខ្លួនចេញពីប្រទេសអេស្ប៉ាញ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្រុមបាតុករដើរដង្ហែក្បួន ស្រែកច្រៀង និងទះដៃ នៅតាមដងផ្លូវនានាក្នុងទីក្រុងបាសេឡូណា ជាមួយបដាសរសេរថា «De Todos» ឬដែលមានន័យថា «វាជាកម្មសិទ្ធិយើងទាំងអស់គ្នា»។
ប៉ូលិសទីក្រុងបាសេឡូណា បាននិយាយថា ក្រុមបាតុករមានចំនួនប្រហែល ៣សែននាក់ ខណៈដែលក្រុមអ្នករៀបចំអះអាងថា មនុស្សចំនួន ១លាន ៣សែន បានចេញធ្វើការតវ៉ា ហើយតំណាងរដ្ឋាភិបាលអេស្ប៉ាញនៅតំបន់កាតាឡូណា បានអះអាងពីចំនួនអ្នកចូលរួមថា ១លាននាក់។
វិបត្តិនយោបាយដ៏ធំបំផុតរបស់អេស្ប៉ាញនៅក្នុងប៉ុន្មានទសវត្សរ៍ចុងក្រោយនេះ បានកើនឡើងកាន់ខ្ពស់កាលពីថ្ងៃសុក្រសប្ដាហ៍មុន នៅពេលដែលក្រុមចង់បានឯករាជ្យនៅក្នុងសភាតំបន់កាតាឡូណា បានបោះឆ្នោតប្រកាសឯករាជ្យតំបន់ភាគឦសានប្រទេសអេស្ប៉ាញមួយនេះ ទៅជាសាធារណរដ្ឋឯករាជ្យមួយ។ តំបន់ដ៏ស្តុកស្ដមមួយនេះ មានប្រជាជនប្រហែល ៧លាន ៥សែននាក់។
រដ្ឋាភិបាលកណ្ដាលរបស់លោកនាយករដ្ឋមន្ត្រី ម៉ារីយ៉ាណូ រ៉ាចយ បានប្រតិកម្មទៅនឹងសេចក្ដីសម្រេចនេះ តាមរយៈការរំសាយចោលស្វ័យភាពតំបន់កាតាឡូណា និងរំលាយចោលរដ្ឋសភា និងរដ្ឋាភិបាលតំបន់ដឹកនាំដោយប្រធានាធិបតី Carles Puigdemont៕
