តុលាការកំពូលបើកសវនាការលើសំណុំរឿង លោក កឹម សុខា នៅព្រឹកថ្ងៃអង្គារនេះតាមការគ្រោងទុក ប៉ុន្តែមិនមានវត្តមានមេបក្សប្រឆាំងរូបនេះទេ បើទោះជាមានការទាមទារពីក្រុមមេធាវីឲ្យនាំកូនក្តីរបស់ពួកគេចូលរួមដើម្បីមានសិទ្ធិពេញលេញតតាំងតាមផ្លូវច្បាប់ក៏ដោយ។
នៅព្រឹកនេះ តុលាការកំពូលបើកសវនាការតាមបណ្តឹងរបស់ក្រុមមេធាវីការពារក្តីឲ្យ លោក កឹម សុខា ដើម្បីជំទាស់ទៅនឹងការឃុំខ្លួនកូនក្តីរបស់ពួកគេ។ មុនថ្ងៃសវនាការ ក្រុមមេធាវីបានទាមទារឲ្យនាំខ្លួន លោក កឹម សុខា ពីពន្ធនាគារត្រពាំងផ្លុងចូលរួមក្នុងសវនាការ ប៉ុន្តែនៅព្រឹកនេះមិនមានវត្តមានលោក កឹម សុខា ទេ ហើយក៏មិនមានការបកស្រាយណាមួយជុំវិញការមិននាំខ្លួន លោក កឹម សុខា ចូលរួមនេះដែរ។
ផ្លូវមួយចំនួននៅជុំវិញតុលាការកំពូលនៅព្រឹកនេះ មានការដាក់របាំងបិទ មានសមត្ថកិច្ចរាប់រយនាក់ឈរយាមតាមគោលដៅ និងមានរថយន្តសមត្ថកិច្ចដាក់ប្រចាំការក្បែរៗនោះ។
នៅព្រឹកនេះក៏មានវត្តមានមន្ត្រីអង្គការសង្គមស៊ីវិលក្នុងស្រុក តំណាងអង្គការសហប្រជាជាតិឃ្លាំមើល ចំណែកតំណាងរាស្ត្រគណបក្សសង្គ្រោះជាតិ១ក្រុមប្រមាណ៥នាក់ក៏ទៅឃ្លាំមើលដំណើរការសវនាការនេះដែរ៕
