ក្រុមមេធាវីការពារក្តីឲ្យលោក កឹម សុខា នៅថ្ងៃនេះ បានស្នើឲ្យចៅក្រមតុលាការកំពូលបង្ហាញច្បាប់ដែលពន្យល់ពីបទល្មើសជាក់ស្តែង ពាក់ព័ន្ធការបង្ហោះវិដេអូឡើងវិញ ចំពោះរឿងដែលកើតមានច្រើនឆ្នាំមកហើយនោះ។
លោក កឹម សុខា ត្រូវកងកម្លាំងពិសេសរបស់រដ្ឋាភិបាលចាប់ខ្លួនដោយសំអាងលើវីដេអូឃ្លីប ដែលគេបង្ហោះឡើងវិញតាមបណ្តាញសង្គមហ្វេសប៊ុក ទាក់ទិននឹងការថ្លែងរបស់លោកប្រាប់អ្នកគាំទ្រនៅប្រទេសអូស្ដ្រាលីកាលពីឆ្នាំ២០១៣ ពាក់ព័ន្ធនឹងយុទ្ធសាស្ត្រប្តូរមេដឹកនាំតាមរយៈយន្តការណ៍ប្រជាធិបតេយ្យ។
នៅថ្ងៃអង្គារនេះ តុលាការកំពូលបានបើកសវនាការលើបណ្ដឹងសារទុក្ខរបស់ក្រុមមេធាវីការពារក្ដីឲ្យប្រធានគណបក្សសង្គ្រោះជាតិ ប្រឆាំងនឹងដីកាឃុំខ្លួនលោក កឹម សុខា។
ក្នុងបន្ទប់សវនាការក្រុមមេធាវីលោក កឹម សុខា បានប្រាប់ទៅចៅក្រមជំនុំជម្រះថា ការប្ដឹងជំទាស់របស់ក្រុមមេធាវី ដោយសារការសម្រេចរបស់តុលាការថ្នាក់ក្រោមដែលបន្តឲ្យឃុំខ្លួនកូនក្ដី គឺផ្ទុយទៅនឹងច្បាប់ជាតិនិងអន្តរជាតិ៖ «ផ្ទុយទៅនឹងច្បាប់រដ្ឋធម្មនុញ្ញ កតិកាសញ្ញាអន្តរជាតិ ក្រមព្រហ្មទណ្ឌ នីតិវិធីព្រហ្មទណ្ឌ និងច្បាប់លក្ខខណ្ឌតិក្ខៈតំណាងរាស្ត្រ»។
ក្នុងសវនាការនោះក្រុមមេធាវីទាំង៧រូប បានចោទសួរទៅក្រុមប្រឹក្សាជំនុំជម្រះឲ្យបញ្ជាក់ពីច្បាប់ថា ការបង្ហោះវីដេអូឡើងវិញជាបទល្មើសជាក់ស្ដែងឬ? បានសមត្ថកិច្ចទៅចាប់ខ្លួនកូនក្ដីទាំងមានអភ័យឯកសិទ្ធិសភា៖ «ច្បាប់អត់មានបានចែងពីការបង្ហោះហ្វេសប៊ុកឡើងវិញជាបទល្មើសជាក់ស្តែងទេ ហើយការបង្ហោះ នោះមិនមែនលោក កឹម សុខា ជាបង្ហោះនោះទេ គឺជនអណាមិកជាអ្នកបង្ហោះ។ តើមានភស្តុតាង អ្វីដែលចោទលោក កឹម សុខា ឃុបឃិតជាមួយបរទេស»។
ក្រុមមេធាវីបានស្នើទៅចៅក្រមជំនុំជម្រះឲ្យបដិសេធដីកាឃុំខ្លួន ហើយដោះលែងកូនក្ដីឲ្យមានសេរីភាពវិញ ដើម្បីកុំឲ្យសហគន៍ជាតិនិងអន្តរជាតិ រិះគន់ប្រព័ន្ធយុត្តិធម៌បន្តទៀត។
ទោះជាយ៉ាងណានៅក្នុងសវនាការនោះ ក្រុមប្រឹក្សាជំនុំជម្រះមិនបានឆ្លើយតបសំនួររបស់ក្រុមមេធាវីវិញទេ។ ក្រោយពីសម្រាក២ជិតម៉ោង ប្រធានក្រុមប្រឹក្សាជំនុំជម្រះនៃតុលាការកំពូល លោក ឃឹម ប៉ុណ្ណ បានប្រកាសសាលដីកា ដោយសម្រេចឲ្យបន្តឃុំខ្លួនលោក កឹម សុខា ដដែល ដោយសំអាងថា ការសម្រេចរបស់តុលាការថ្នាក់ក្រោមធ្វើឡើងត្រឹមត្រូវតាមនីតិវិធីច្បាប់។
ប្រាប់អ្នកសារព័ត៌មាននៅក្រៅបន្ទប់សវនាការ លោក សំ សុគង់ សម្ដែងការខកចិត្ត ចំពោះការសម្រេចរបស់តុលាការកំពូល ដោយចាត់ទុកការសម្រេចនោះថា មិនបានផ្ដល់យុត្តិធម៌ឲ្យកូនក្ដី។
បន្ទាប់ពីមានការចាប់ខ្លួនមេដឹកនាំគណបក្សរូបនេះ ក៏មានប្រតិកម្មជាច្រើនពីសហគមន៍ជាតិ និងអន្តរជាតិ ដោយហៅចំណាត់ការចាប់ និងឃុំខ្លួននោះថា ជាការគំរាមកំហែងផ្នែកនយោបាយ និងទាមទារឲ្យដោះលែងជាបន្ទាន់ ដោយថា ដើម្បីឲ្យដំណើរការបោះឆ្នោតខាងមុខ ដំណើរការទៅដោយសេរី ត្រឹមត្រូវ និងយុត្តិធម៌៕
